Свет
Кадиров го негира тврдењето на Израел за терористи во Чеченија
Лидерот на Чеченската Република, Рамзан Кадиров, ги критикува израелските власти за додавање на Чеченија на списокот на области што Израелците треба да ги избегнуваат поради терористички закани.
Кадиров на „Телеграм“ напиша: „Имам впечаток дека оваа листа не е обновена во изминатите две децении“.
Тој додаде: „Навистина мислам дека е подготвена по диктат од одредена страна. Мислев дека Израел не е една од земјите што дозволуваат некој да им диктира услови. Значи, мене ми е чудно што суверена држава си дозволува да биде под диктат од одредени страни и целосно ја игнорираат реалноста“.
Обраќајќи им се на членовите на Израелскиот совет за национална безбедност, Кадиров рече: „Борбите во Чеченската Република завршија многу одамна и во нашата земја нема терористи“.
Кадиров ги покани израелските официјални лица да ја посетат Чеченија за да видат дека таму е мирно и дека земјата не е непријателска кон Израелците.
„Мило ми е што израелските граѓани ја знаат вистината бидејќи ја посетуваат нашата република, каде што имаат деловни активности, одмораат и патуваат. Би сакал да го советувам Израелскиот совет за безбедност да не ги заплашува своите граѓани со непостојни чеченски терористи бидејќи овие термини, како и самата терористичка закана, престанаа да постојат во Чеченската Република многу одамна… Доцните“, додаде тој.
Претходно неделава, Израелскиот совет за национална безбедност ги предупреди своите граѓани дека Иран може да ги таргетира во странство и ги повика да бидат повнимателни во голем број земји, вклучувајќи ги Грузија, Азербејџан, Турција, Обединетите Арапски Емирати, Бахреин, Ирак, Египет и Јордан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Хамас предаде тела, Израел порачува: „Борбата за нашите заложници не запира“
Израел ги презеде телата на двајца заложници кои ги држел Хамас во Газа, пренесе ЦНН. Посмртните останки биле предадени преку Црвениот крст и пренесени на идентификација во израелскиот форензички институт.
Од кабинетот на израелскиот премиер соопштија дека „напорите за враќање на сите заложници продолжуваат и нема да престанат додека не се вратат сите“.
Примопредавањето се случува два дена по израелските воздушни напади во Газа, во кои, според палестинското министерство за здравство, загинале повеќе од 100 лица. И покрај ескалацијата, и Израел и Хамас изјавиле дека остануваат посветени на прекинот на огнот посредуван од САД.
Американскиот претседател Доналд Трамп порача дека „ништо нема да го загрози примирјето“ и се закани дека ќе го „елиминира Хамас“.
Последното примопредавање, според медиумите, поминало без компликации, за разлика од претходните случаи кога Хамас ја повлекуваше одлуката за предавање поради израелски напади.
Свет
Медведев го нарече белгискиот министер „имбецил“, Франкен му возврати со песна на Селена Гомез
Белгискиот министер за одбрана Тео Франкен влезе во вербален судир со поранешниот руски претседател и сегашен заменик-претседател на Советот за безбедност на Русија, Дмитриј Медведев.
Се започнало кога Франкен изјавил дека, доколку Русија ја нападне Белгија, „НАТО би ја израмнил Москва со земја“. На тоа, Медведев остро реагирал, нарекувајќи го „имбецил“ и потсетувајќи дека оваа недела Русија го тестирала нуклеарното суперторпедо „Посејдон“, кое го опишал како „вистинско оружје на судниот ден“.
Франкен утрово возвратил преку Инстаграм: „Главниот руски насилник не престанува да се заканува и навредува. НАТО не е во војна со Русија, но принципот на одмазда е неприкосновен веќе 76 години. Не повлекувам ниту збор.“
На крајот, министерот ја споделил песната „Calm Down“ од Селена Гомез со порака до Медведев – да се „смири“.
Свет
Зеленски: Новите санкции ќе ѝ донесат на Русија загуби од најмалку 50 милијарди долари годишно
Украинскиот претседател Володимир Зеленски изјави дека новите санкции против Русија ќе ѝ предизвикаат годишни загуби од најмалку 50 милијарди долари, пренесе „Укринформ“.
Тој се повика на извештај на шефот на украинската надворешна разузнавачка служба Олег Ивашченко и рече дека санкциите против нафтените компании веќе создаваат сериозни финансиски последици за Москва.
Зеленски изрази надеж дека ќе следат и нови санкциски мерки, нагласувајќи дека арапските земји со своите испораки нафта можат да спречат какви било потреси на светскиот пазар.
Тој додаде дека Украина сојузниците редовно ги информира за лица и структури што заслужуваат санкции и дека „голем дел од нашите предлози се земаат предвид“.
На 23 октомври високата претставничка на ЕУ за надворешна политика Каја Калас објави дека е одобрен 19-от пакет санкции против Русија, а американското министерство за финансии веќе воведе мерки против „Росњефт“ и „Лукоил“. Зеленски претходно изјави дека американските санкции би можеле да ги намалат руските приходи за околу 5 милијарди долари месечно.

