Свет
Камала Харис до Нетанјаху: Ставете крај на војната во Газа

Американскaта потпретседателка Камала Харис, која се очекува да биде кандидат на Демократската партија на претседателските избори во ноември, одржа, како што рече, искрени и конструктивни разговори со израелскиот премиер Бенјамин Нетанјаху, јавува Би-би-си.
Со поостар тон од претседателот Џо Бајден, Харис јасно ја истакна својата, како што рече, сериозна загриженост за бројот на жртви во Газа велејќи му на Нетанјаху дека начинот на кој Израел се брани е важен.
„Време е оваа војна да заврши“, рече таа по разговорот во Белата куќа. Харис исто така ја нагласи потребата од пат кон решение со две држави, а истовремено ги повика Американците да бидат свесни за природата на конфликтот.
Нетанјаху претходно се сретна со американскиот претседател Џо Бајден, кој во неделата се повлече од кампањата за реизбор.
Состаноците на Нетанјаху во Белата куќа дојдоа еден ден откога тој одржа жесток говор пред Конгресот ветувајќи тотална победа против Хамас, додека илјадници пропалестински демонстранти демонстрираа пред зградата.
Нетанјаху се соочува со притисок и во Израел и на меѓународно ниво да стави крај на деветмесечната војна меѓу Израел и Газа.
Силната поддршка на Бајден за Израел налути многу пропалестински активисти, чија поддршка можеби ќе им треба на демократите ако сакаат да победат на претседателските избори во ноември.
Според тоа, постои значителен интерес за ставот што Камала Харис ќе го заземе кон Израел доколку го замени Бајден во Белата куќа.
По состанокот со Нетанјаху, кој траеше 40-ина минути, Харис ја изрази својата непоколеблива посветеност на Израел и неговото право да се брани. Таа истакна дека конфликтот почна на 7 октомври кога милитантите на Хамас го нападнаа јужниот дел на Израел од Газа убивајќи 1.200 луѓе и заробувајќи повеќе од 250, според израелските податоци.
Во одмаздничката офанзива на Израел во Газа загинаа повеќе од 39.000 луѓе.
„Израел има право да се брани. И како го прави тоа е важно“, рече Харис изразувајќи загриженост за ужасната хуманитарна ситуација во Газа.
Не можеме да дозволиме да отрпнеме од страдање и затоа нема да молчам, рече таа. „Ќе направиме договор за да можеме да постигнеме прекин на огнот за да се стави крај на војната“, додаде таа. „Да ги вратиме заложниците дома и да ја донесеме неопходната помош за палестинскиот народ“, додаде.
Нетанјаху денеска треба да се сретне со републиканскиот претседателски кандидат, Доналд Трамп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Дали знаете зошто папите не ги користат своите вистински имиња за време на службите

Американскиот кардинал Роберт Франсис Превост е избран за 69-ти поглавар на Католичката црква. Тој го избрал Лав XIV како свое папско име.
Но, дали всушност знаете зошто папите ги менуваат своите имиња кога се избрани? Станува збор за – традиција што трае веќе 470 години.
Иако не е задолжително да ги менуваат своите имиња, новоизбраните папи во повеќето случаи го земаат името на својот предок, изразувајќи ја со тоа својата желба да го следат нивниот пример. Овој преседан го постави првиот папа. Свети Петар чие родено име беше Симон. Новото име може да означува и „ново раѓање“ на почетокот на папството.
Со изборот на името Лав, новиот папа им се придружи на 13-те претходници кои го носеа истото име. Меѓу нив е и Лав XIII, познат по својот реформистички дух и неговата енциклика Rerum novarum од 1891 година, во која се нагласуваше човечкото достоинство и достоинството на работата. Свештеникот Кристофер Робинсон од Универзитетот ДеПол истакна дека ова е основата на современото социјално учење на Црквата. „Со изборот на името Лав XIV, тој ја покажува својата посветеност на општественото учење на Црквата кое го зацврстил Лав XIII“, рече свештеникот и експерт за Ватикан Томас Рис.
Папската историја изобилува со примери за такви симболични избори. На пример, папата Франциско, роден како Хорхе Марио Берголјо, го избрал своето име по Свети Франциск Асишки, „човек на сиромаштија, мир и љубов кон творението“, велејќи дека сонува за Црква „која е сиромашна и за сиромашните“.
Последниот папа со името Лав бил Лав XIII, чие вистинско име било Џоакино Винченцо Рафаеле Луиџи Печи.
Свет
Мексико го тужи Гугл за промена на името на Заливот во Американски Залив

Мексико го тужи интернет гигантот Гугл поради промената од Мексиканскиот Залив во Американскиот Залив на неговата услуга „Мапи“, изјави вчера мексиканската претседателка Клаудија Шајнбаум.
Претседателката го објави ова за време на нејзината дневна прес-конференција, но не сподели многу детали за тужбата. Гугл сè уште не го коментираше случајот.
Во февруари, Гугл го промени името на Мексиканскиот Залив во Американски за американските корисници на својата услуга „Мапс“ откако американската влада еднострано го преименуваше водно тело. Корисниците надвор од САД ќе ги видат обете имиња.
Европа
Илјадници протестираа во Словачка. „Фицо го помина Денот на победата со воен злосторник“

Неколку илјади демонстранти вчера излегоа на улиците на словачкиот главен град Братислава и други градови за да протестираат против посетата на премиерот Роберт Фицо на Москва.
Фицо присуствуваше на годишната руска воена парада по повод победата на Советскиот Сојуз над нацистичка Германија. Додека поголемиот дел од Европа ја одбележа годишнината завчера, Русија секогаш ја одржува својата парада на победата на 9 мај. Фицо беше единствениот лидер на земја-членка на Европската Унија што присуствуваше на настанот и беше критикуван за неговиот проруски став.
Најголемиот протест се одржа во Братислава. „9 мај е Ден на Европа, но не за секого. Роберт Фицо ќе го помине со воен злосторник“, објави организаторот на протестот на Фејсбук, алудирајќи на рускиот претседател Владимир Путин.
Шефицата на ЕУ, Каја Калас, исто така, остро го критикуваше патувањето на Фицо во Москва. „Секој што ја поддржува слободата, независноста и европските вредности треба да биде денес во Украина, а не во Москва. Фицо е на погрешната страна“, рече таа.
Словачкиот премиер го бранеше своето патување во пораки на Фејсбук до своите поддржувачи. Тој рече дека неговото патување е за да им оддаде почит на оние што загинаа за ослободувањето на Словачка од нацистичката власт.