Свет
Камала Харис ќе го одржи најважниот говор во нејзината политичка кариера

Потпретседателката на САД Камала Харис денеска ќе го одржи најважниот говор во нејзиниот политички живот кога ќе ја прифати номинацијата на демократите за претседател на САД, еден месец откако претседателот Џо Бајден се откажа од трката под притисок на партијата.
Претседателските амбиции на Харис отсекогаш биле јасни, но тие биле поткопани од несигурната кампања во 2020 година и сличниот потпретседателски мандат, пишува Ројтерс.
Откако стигна на врвот на листата, таа ги подобри изгледите на демократите во претседателската трка против републиканецот Доналд Трамп. Нејзините остри говори беа дочекани со бран на ентузијазам кај гласачите.
Харис (59) денеска планира да зборува за својот живот како ќерка на татко од Јамајка и мајка Индијка, да ги претстави плановите за справување со зголемените трошоци и унапредување на личните слободи, вклучително и правата за абортус, рекоа нејзините помошници.
Тие рекоа дека остро ќе го осуди и поранешниот претседател Трамп.
„Има еден човек кој сака да не подели, а таа ќе тврди дека тоа едноставно не можеме да си го дозволиме, дека ова е Америка и дека можеме сите заедно да се кренеме“, рече за Ројтерс, Седрик Ричмонд, копретседател на кампањата и долгогодишен советник на Камала Харис.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Висок руски функционер ќе го посети Вашингтон оваа недела

Се очекува руски функционер да го посети Вашингтон оваа недела на разговори со администрацијата на Трамп, објави вчера Си-eн-eн, повикувајќи се на американски функционер и два извори запознаени со плановите.
Функционерот Кирил Дмитриев ќе се сретне со претставникот на администрацијата на Трамп, Стив Виткоф, за да разговараат за зајакнување на односите меѓу двете земји, додека тие се обидуваат да стават крај на војната во Украина, објави Си-ен-ен.
Дмитриев, шеф на рускиот државен фонд, минатиот месец беше назначен за специјален претставник на Русија за меѓународна економска и инвестициска соработка.
Свет
Американската војска распоредува дополнителни воздушни сили на Блискиот Исток

Американскиот секретар за одбрана Пит Хегсет распореди дополнителни воени авиони за зајакнување на американските поморски сили на Блискиот Исток, соопшти Пентагон, во услови на бомбардирање на Јемен и зголемени тензии со Иран.
Во кусото соопштение на Пентагон не се споменуваат конкретни авиони, но анонимни извори велат дека најмалку четири бомбардери Б-2 се преместени во американско-британската воена база на островот Диего Гарсија во Индискиот Океан. Тоа е доволно блиску за да се стигне до Јемен или Иран, велат експертите.
„САД и нивните партнери остануваат посветени на регионалната безбедност во ЦЕНТКОМ (областа на одговорност) и се подготвени да одговорат на секој државен или недржавен чинител кој се обидува да го прошири или ескалира конфликтот во регионот“, се вели во соопштението.
„Секретарот Хегсет и понатаму јасно кажува дека доколку Иран или неговите полномошници го загрозат американскиот персонал и интереси во регионот, Соединетите држави ќе преземат решителна акција за одбрана на нашиот народ“, се додава.
ЦЕНТКОМ се однесува на Централната команда на САД, која се состои од регион кој се протега преку североисточна Африка, Блискиот Исток и централна и јужна Азија.
Европа
Единаесетгодишно девојче исчезна откако вчера влегло во реката Темза во Лондон

Единаесетгодишното девојче кое исчезна откако вчера влегло во реката Темза во источен Лондон е именувано како Калија Коа, потврди полицијата.
Калија беше надвор и играше и влезе во реката во близина на аеродромот во Лондон Сити.
Итната помош била повикана на местото на настанот во 13 часот и 23 минути. по локално време, а во потрагата по девојчето се вклучени лондонската Брза помош, пожарникари, крајбрежна стража и спасувачка служба.
Метрополитенската полиција води операција за пребарување и спасување долж Темза.
Ден Кард, началникот на локалната полиција за североисточен Лондон, рече: „Нашите службеници специјалисти го поддржуваат семејството на девојчето во овој исклучително тежок момент, а нашите мисли се со сите погодени од овој настан. Посветени сме на наоѓање на Калија и, работејќи со партнерите, спроведуваме детална потрага на широк простор, користејќи беспилотни летала и чамци“.
Тој им се заблагодари на граѓаните, полицајците и другите служби за итни случаи за брзата реакција и големата операција за пребарување.
Една жена која се обидела да помогне, рече дека стигнала до брегот со појас за спасување, но не можела да го најде девојчето.
Кери Бенаџауд (62) изјави за новинската агенција PA дека децата трчале и викале дека нивната другарка е во реката.
„Ми се јави еден сосед. Тој рече дека повикал полиција и тогаш видел дека нејзините раце исчезнуваат под водата. Кога пристигнав со појасот за спасување, повеќе не ја видов“, рекла таа.