Американскиот претседател Доналд Трамп потпиша извршна наредба со која се наредува одделенијата за финансии и трговија да создадат владин инвестициски фонд за кој рече дека може да ја купи социјалната мрежа „Тик-ток“.

„Тик-ток“, кој има околу 170 милиони американски корисници, накратко беше отстранет од интернет непосредно пред да стапи на сила законот на 19-ти јануари со кој се бара од кинескиот сопственик ByteDance да го продаде или ќе се соочи со забрана за неговата употреба поради национална безбедност.

По преземањето на функцијата на 20 јануари, Трамп потпиша извршна наредба со која се предвидуваше 75-дневно одложување на спроведувањето на законот.

Американскиот претседател рече дека е во разговори со неколку луѓе за купување на „Тик-ток“ и дека најверојатно ќе донесе одлука за иднината на популарната апликација во февруари.

Фридрих Мерц, фаворитот за идниот канцелар на Германија, изјави денеска на партискиот конгрес на неговата конзервативна Христијанско-демократска унија (ЦДУ) во Берлин дека е подготвен да ја води Германија напред, три недели пред парламентарните избори во земјата.

„Подготвени сме повторно да ја водиме Германија напред“, рече Мерц, ветувајќи дека „ќе се фати за работа без одлагање и ќе ги реши основните причини за проблемите што ја парализираа (Германија) толку долго“.

69-годишникот доби громогласен аплауз од делегатите, кои едногласно усвоија „програма за итна акција“ на собранието, вклучително и мерки за реформирање на законите за миграција и зајакнување на германската економија која се бори.

Неговата партија доби тешки критики во последните денови, откако нејзиниот предлог беше усвоен во Бундестагот, долниот дом на германскиот парламент, со гласовите на екстремно десничарската Алтернатива за Германија (АФД).

Критичарите го обвинуваат Мерц дека го уништил долгогодишниот „огнен ѕид“ што ја спречил соработката со АФД, откако неговиот необврзувачки план за спречување на илегалната имиграција освои тесно мнозинство гласови во средата благодарение на поддршката на екстремно десничарската партија.

Протести против потегот на Мерц избија низ целата земја, а организаторите тврдат дека 250.000 луѓе присуствувале на голем настан во Берлин во неделата.

Полицијата соопшти дека околу 450 луѓе денеска протестираа пред конгресната сала на ЦДУ во Западен Берлин.

Мерц во својот говор повторно ја отфрли можноста за соработка со АФД.

„Нема да има соработка, нема да има толеранција, нема да има малцинска влада“, им рече тој на делегатите.

Баварскиот премиер Маркус Содер рече дека само ЦДУ/ЦСУ може да го запре подемот на АфД.

„Не смееме да ја оставиме нашата земја на АфД“, рече Содер, инсистирајќи дека таканаречениот заштитен ѕид не е уништен.

Канцеларот Олаф Шолц, исто така, ја нападна ЦДУ/ЦСУ, тврдејќи дека конзервативниот блок не се согласува со законите што ќе ја реформираат политиката за азил и ќе им дадат дополнителни овластувања на безбедносните служби.

„ЦДУ/ЦСУ ја загрозува внатрешната безбедност“, рече Шолц на самитот на лидерите на Европската унија во Брисел.

„Овие закони за ограничување на илегалната миграција и зајакнување на внатрешната безбедност мора да бидат одобрени пред изборите“, додаде тој.

Францускиот режисер Кристоф Руџа денеска е осуден на четири години затвор, од кои две ќе вклучуваат носење електронска нараквица, поради сексуален напад врз актерката Адел Енел додека била малолетна.

Еден од адвокатите на режисерот веднаш по пресудата изјави дека ќе биде поднесена жалба.

Адел Енел (35) не реагирала на објавувањето на пресудата, а Руџа (60) избегнувал да ја погледне во судницата.

Кривичниот суд му наложи на режисерот да и плати на актерката 15.000 евра отштета како и 20.000 евра за нејзиниот долгогодишен надзор од психолог.

Обвинителството на 10 декември побара затворска казна од пет години за режисерот, кој негираше дека ја нападнал Адел Енел кога имала околу 13 години.

Во ноември 2019 година, актерката изјави за онлајн медиумот „Медиапарт“ дека режисерот несоодветно се однесувал кон неа за време на снимањето на „Les Diables“ (Ѓаволите). Адел Енел во тоа време имала околу 13 години.

Енел тогаш изјавила дека за време на подготовката и снимањето Руџа сексуално ја вознемирувал постојано допирајќи ја и насилно бакнувајќи ја во вратот.

Сето тоа се случувало во неговиот дом и за време на разни меѓународни фестивали, кога таа имала меѓу 12 и 15 години.

Руџа има снимено неколку филмови, меѓу кои „Les Diables“ (2002) и „Dans la tourmente“ (2011).