Европа
Карлсон го коментира интервјуто со Путин: Една од најглупавите работи што сум ги слушнал
Такер Карлсон го критикува оправдувањето на Путин за инвазијата на Украина велејќи дека денацификацијата на земјата е „една од најглупавите работи што некогаш ги слушнал“. Зборувајќи со водителот Лекс Фридман на поткаст објавен во вторникот, Карлсон го коментира своето контроверзно интервју со рускиот претседател.
Поранешната ѕвезда на „Фокс њуз“ се соочи со бурни реакции за неговата средба со лидерот на Кремљ, првпат Путин се согласи на интервју со западен новинар од почетокот на војната во Украина. Во интервјуто се допреа повеќе теми, од лекции по руска историја до размислувањата на Путин за следните претседателски избори во САД.
Карлсон рече дека првиот впечаток му е дека Путин изгледал нервозно и дека влегол во интервјуто како преподготвен студент. Фридман го прашал Карлсон што мисли за оправдувањето на Путин да продолжи да води војна во Украина, пишува „Њузвик“.
Да потсетиме, рускиот лидер во континуитет тврди дека целта е денацификација на Украина. Украинскиот претседател Володимир Зеленски, кој е Евреин, постојано ги отфрла тврдењата на Кремљ дека владата во Киев е отворено пронацистичка.
„Мислев дека тоа е една од најглупавите работи што некогаш сум ги слушнал. Не разбрав што значи. Го мразам целиот тој разговор бидејќи не е реален. Тоа беше само ad hominem. Тоа беше начин да се поврзе некого со злобниот режим, кој повеќе не постои“, објасни Карлсон.
Според Карлсон, нацизмот повеќе не постои бидејќи е „неразделен од германската нација“. „Јас сум многу антинацист. Само велам дека во 2024 година нема нацистичко движење. Тоа е начин луѓето да се прикажат злобни“, рече Карлсон.
Путин го коментира и разговорот со Карлсон велејќи му на рускиот новинар Павел Александрович Зарубин дека се подготвил за „агресивното однесување и поставувањето таканаречени остри прашања на Карлсон“. „Не бев само подготвен за ова, туку и го сакав бидејќи тоа ќе ми даде можност да одговорам на ист начин“, рече рускиот лидер.
Инаку, Путин за време на интервјуто го исмејуваше Карлсон шегувајќи се со фактот дека неговите обиди да се вработи во ЦИА постојано биле неуспешни. Портпаролот на Кремљ, Дмитриј Песков, претходно им изјави на новинарите дека Путин му го дал интервјуто на Карлсон бидејќи „има став што се разликува“ од другите западни медиуми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Напнато во Полска: подигнати борбените авиони поради руските напади врз западна Украина
Полски и сојузнички авиони полетаа рано утрово за да го обезбедат полскиот воздушен простор откако Русија изврши воздушни напади во западна Украина, во близина на полската граница, соопштија вооружените сили на членката на НАТО.
„Парови борбени авиони за брза реакција и авион за рано предупредување беа подигнати во воздух, додека системите за воздушна одбрана и радарска контрола беа ставени на највисоко ниво на готовност“, соопшти Оперативната команда во објава на социјалната мрежа Икс, објави Ројтерс.
Во 05:00 часот по централноевропско време, речиси целата територија на Украина беше под воздушна тревога откако украинските воздухопловни сили предупредија за нови руски ракетни и беспилотни летала напади.
фото: принтскрин
Европа
Руски дронови погодија станбена зграда во Харков: има повредени, избувна пожар
Руски беспилотни летала погодија станбена зграда во Харков, вториот по големина град во Украина. Во нападот избувна пожар, неколку лица беа повредени, а властите евакуираа дел од населението, објави Ројтерс.
Беспилотни летала погодија две централни градски области – Слобидски и Основјански – по полноќ.
Регионалниот гувернер Олех Сињехубов изјави дека во нападот биле употребени 11 беспилотни летала и дека седум лица се повредени. Градоначалникот на Харков, Игор Терехов, изјави дека 22 жители биле евакуирани од еден дел од оштетената зграда.
Градоначалникот, исто така, рече дека друг дрон го погодил подрачјето пред медицинската установа, повредувајќи еден лекар и оштетувајќи ја зградата и околните возила.
Харков, кој се наоѓа на околу 30 километри од руската граница, успешно се спротивстави на заземањето во раните фази од руската инвазија во февруари 2022 година и останува честа цел на руските воздушни напади.
фото: принтскрин
Европа
Русија привремено ги прекина летовите на аеродромот Краснодар
Руската служба за цивилно воздухопловство „Росавијација“ соопшти дека рано утрово привремено ги прекинува летовите на аеродромот Краснодар во јужна Русија за да се обезбеди безбедноста на летовите.
Неофицијалните руски и украински канали на Телеграм објавија серија експлозии низ регионот Краснодар, каде што се наоѓаат нафтениот терминал Новоросијск и рафинеријата Илски.
Ројтерс не можеше независно да ги потврди неофицијалните извештаи за експлозиите.
фото: принтскрин

