Русија денес ги осуди обидите за поткопување на нејзиниот конструктивен дијалог со САД, насочен кон наоѓање решение за украинскиот конфликт, неколку дена откако планираната средба меѓу Владимир Путин и Доналд Трамп беше одложена на неодредено време.

„Сведоци сме на титански обиди за поткопување на каков било дијалог меѓу Русија и САД“, рече Кирил Дмитриев, економскиот претставник на Кремљ во видео порака, кој пристигна во Вашингтон завчера. Таму учествува на состаноци и разговори со претставници на администрацијата на Трамп.

„Подготвени сме за конструктивен дијалог и јасна комуникација на руската позиција по неколку прашања“, нагласи Дмитриев.

„Русија сака мирно решение“, рече тој, додавајќи дека почитувањето на руските интереси и искоренувањето на коренските причини за украинската криза треба да послужат како основа за праведни решенија.

Мировните преговори меѓу Москва и Киев се во застој, и покрај посредничките напори на американскиот претседател Доналд Трамп, кој, по враќањето во Белата куќа во јануари, вети брз крај на конфликтот во Украина.

Пред пет дена, Трамп на неодредено време ја одложи претходно најавената средба со Владимир Путин во Будимпешта, велејќи дека не сака залуден состанок, а следниот ден САД воведоа нови санкции кон Москва.

Сепак, завчера, вчера и денес, Кирил Дмитриев  се сретна со претставници на администрацијата на Трамп, како и, според неговите зборови, со претставници на американската заедница кои сакаат позитивен дијалог со Русија“, вклучувајќи ја и републиканската конгресменка Ана Паулина Луна од Флорида.

„Како силен глас за дијалог и мир, г-ѓа Луна ќе организира состанок на американски и руски пратеници за да се поттикне парламентарниот дијалог“, напиша Дмитриев на X по средбата со американската конгресменка.

По пристигнувањето во Малезија за самитот на АСЕАН, американскиот претседател Доналд Трамп се придружи на танцот за добредојде на локалните жители, објавија локалните медиуми.

Американскиот претседател беше пречекан од малезискиот премиер, Анвар Ибрахим, кој му приреди добредојде со традиционален малајски танц, објавува „Манго њуз“.

По краткиот разговор меѓу двајцата лидери, претседателот Трамп одлучи накратко да се придружи и да танцува со локалното население, што предизвика голем ентузијазам кај присутните.

Патем, американскиот претседател Доналд Трамп пристигна утрово во главниот град на Малезија, Куала Лумпур, и присуствуваше на потпишувањето на продолжениот договор за прекин на огнот меѓу Тајланд и Камбоџа, а исто така потпиша и трговски договори со двете земји. Ова е неговата прва станица на азиската турнеја.

Трамп првпат интервенираше во јули за да го заврши смртоносниот петдневен граничен конфликт меѓу двете земји, а мировниот договор беше потпишан утрово кратко по пристигнувањето на Трамп на самитот на земјите од Југоисточна Азија во Куала Лумпур, објави Ројтерс.

Овој состанок во главниот град на Малезија се темели на примирјето постигнато пред три месеци кога Трамп ги повика лидерите на двете земји во тоа време да ги прекинат непријателствата или, како што предупреди, ризикуваат привремено да бидат прекинати трговските преговори со Вашингтон.

Пред да го потпише договорот за прекин на огнот утрово, камбоџанскиот премиер Хун Манет му се заблагодари на Трамп за неговото одлучно водство и неуморните напори за спроведување на договорот.

И тајландскиот премиер му се заблагодари на американскиот претседател за напорите за посредување во примирје и вети дека отстранувањето на оружјето и ослободувањето на воените заробеници ќе започнат брзо, додавајќи дека декларацијата ќе обезбеди „основа за траен мир“ доколку целосно се спроведе.

По договорот за примирје, Тајланд и Камбоџа поединечно потпишаа трговски договори со САД денес во Куала Лумпур, објавува Би-Би-Си.

За време на потпишувањето, Трамп рече дека договорите се од големо значење за двете земји.

Со денешното потпишување и објавување на трговскиот договор на САД со Камбоџа и договорот за минерали со Тајланд, американскиот претседател јасно стави до знаење дека неговата администрација ќе ги користи трговските договори како клучен начин за вршење дипломатски притисок врз земјите за постигнување мир, заклучува Би-Би-Си.

„Ние спроведуваме трансакции, многу од нив, со двете земји сè додека живеат во мир“, рече Трамп, додавајќи дека бизнисот мора да се користи за да се осигури дека двете земји нема да војуваат.

Претседателот на САД, Доналд Трамп, на средбата со емирот на Катар, Тамим бин Хамад ал-Тани, изјави дека сега „има безбеден Блиски Исток“ и дека ќе остане таков „долго време“.

За време на средбата во американскиот претседателски авион, кој се полнеше со гориво во Катар на пат кон Малезија, Трамп рече дека Ал Тани е „еден од големите владетели на светот, не само на Блискиот Исток“, објавува „Тајмс оф Израел“.

„Неговата земја го сака и го почитува. Не знам што е поважно, да бидеш сакан или да бидеш почитуван? Дали имате преференција? Бидејќи ги имате и двете, вие сте еден од ретките“, рече Трамп.

Трамп му рече на катарскиот премиер Мохамед бин Абдулрахман бин Јасим ал-Тани, кој присуствуваше на состанокот, дека е негов пријател „и пријател на светот“.

Американскиот претседател рече дека тој и двајцата катарски лидери направиле многу заедно, „особено во последната година“.

„Мир на Блискиот Исток, и тие беа многу голем фактор во тоа. Ви благодариме, и имате безбеден Блиски Исток во моментов, и ќе го задржите така долго време“, додаде Трамп.