Свет
Катастрофа во Бразил: Стотици исчезнати откако наноси од кал прекрија населено место
Бразилските власти објавија дека пронашле 11 тела откако вчера испука огромната брана „Вале“. Дополнително 296 луѓе се водат за исчезнати, а дождот ја отежнува потрагата која продолжува, иако со се помала надеж дека ќе бидат пронајдени преживеани.
„Се надеваме дека ќе најдеме живи луѓе“, изјавил Едгар Естевао, командант на противпожарната служба од државата Минас Жераис, каде што се случи колапсот на браната која го задржувала отпадниот талог од рудник за железо.
Естевао додал дека 14 хеликоптери постојано надлетуваат огромна област целосно покриена со кал.
Со воен хеликоптер напладне на местото на настанот пристигна бразилскиот претседател Жаир Болсонаро, кој не даде изјава, но подоцна на „Твитер“ објави дека бил сведок на страшни сцени.
„Ќе сториме се што е во наша моќ да ги згрижиме погодените од оваа катастрофа, да ги ограничиме штетите, испитаме околностите и да ја спроведеме правдата, со цел да се избегнат нови трагедии“, порача тој.
Во петокот пукна насипот во кој бил насобран отпадниот талог од рудникот за железо на компанијата „Вале СА“ во местото Брумадињо, општина со 39.000 жители, 60 километри југозападно од главниот град, Бело Хоризонте.
Војската со соопштение информираше дека по налог на претседателот Болсонаро, мобилизирани се околу 1.000 војници, кои се подготвени во секое време да се распоредат во областа на несреќата.
Причините за колапсот на браната сè уште не се утврдени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бакингемската палата ја објави здравствената состојба на кралот Чарлс: познато кога ќе се врати на должностите
Кралот Чарлс ќе продолжи со јавните ангажмани следната недела откако е постигнат охрабрувачки напредок во лекувањето на ракот, објави Бакингемската палата.
За кралот тоа нема да биде целосно враќање на официјалните ангажмани, но палатата испраќа позитивни сигнали, јавува Би-Би-Си.
Следниот вторник кралот ќе започне со симболично патување во центар за лекување рак, пренесува медиумот.
Неговите летни планови вклучуваат државна посета, каде што ќе биде домаќин на императорот и царицата на Јапонија.
Во наредните недели, соопштија од палатата, тој ќе преземе неколку надворешни ангажмани.
Свет
Стари книги обложени со отров отстранети од Француската национална библиотека
Властите отстранија четири книги од Француската национална библиотека поради можноста нивните корици да содржат отровен арсен. Имено, некои книги од 19 век, печатени во Британија, имаат смарагдно зелени корици. Арсенот често се користел за боење книги во тоа време.
Научниците од Универзитетот во Делавер во САД ги класифицираа отстранетите томови како потенцијално опасни, но библиотеката вели дека ракувањето со овие книги би предизвикало само мала штета на здравјето. „Ги ставивме во карантин овие дела. Ќе ги анализираме во лабораторија за да можеме да процениме колку арсен е присутен во секој том“, рече портпаролот на Француската национална библиотека, а пренесе Би-би-си.
Списокот на потенцијално опасни книги е составен од „Poison Book Proect“ , иницијатива покрената од научници од Универзитетот во Делавер во соработка со музејот Винтертур во Делавер. Од 2019 година, тимот тестираше стотици корици книги за тешки метали и состави листа на наслови кои се потенцијално опасни.
Издавачите од викторијанската ера користеле арсен за да ги обојат кориците. Светската здравствена организација (СЗО) предупреди на долгорочна изложеност на арсен во водата за пиење и храната, велејќи дека супстанцијата е многу токсична. Сепак, таа не дала никакви упатства за ракување со предмети што го содржат овој отров.
Во 2022 година, библиотекарите во Лидс, Англија открија ретка книга со арсен. Библиотекар ја открил потенцијално отровната книга додека ја споредувал збирката на библиотеката со базата на податоци на проектот „Poison Book“.
Свет
Мигранти плаќале 18.000 евра за превоз преку Ла Манш, биле сексуално експлоатирани
Виетнамска криминална мрежа беше пресечена со акција на полициите на Франција и Англија, со поддршка на Европол.
Оваа група шверцувала мигранти преку Ла Манш и организирала нивна сексуална и трудова експлоатација како и перење пари.
Главниот организатор, идентификуван како десна рака на водачот на оваа банда, го организирал шверцот, додека друг нивни соучесник бил задолжен за собирање пари и организирање на транспортот на мигрантите, кои плаќале од 15.000 до 18.000 евра за превоз преку каналот , соопшти Европол.
На пат од Полска за Франција, некои од мигрантите шверцувале метамфетамин во парискиот регион, снабдувајќи ги азиските групи за шверц на дрога со седиште во областа во замена за намалена цена на патувањето.
Уапсени се 16 членови на оваа група и одземени се разновидна луксузна стока, 100.000 евра во кеш и уште 298.000 евра на банкарски сметки.