Свет
Католички свештеници обвинети за педофилија наоѓаат засолниште во Скандинавија
Католичката црква во претежно лутеранските Норвешка и Шведска е во опасност да биде вовлечена во меѓународниот скандал што вклучува обвиненија за злоупотреба на деца против католички свештеници, пренесува „Спутник“.
Најмалку двајца свештеници за кои се смета дека биле вклучени во педофилија во САД не само што продолжиле да работат во Скандинавија туку и таму се обвинети за слични злосторства, пренесува националниот радиодифузер СВТ.
Еден од свештениците бил активен во три различни католички парохии во Гери, Индијана, во 80-тите години и бил посочен како „веродостојно обвинет“ за злоупотреба на шест деца. Бидејќи внатрешната истрага на црквата никогаш не била предадена на полицијата, свештеникот безбедно бил преместен во Шведска во 2000 година.
Портпаролката на шведската католичка црква, Кристина Хелнер, потврди дека свештеникот работел во Гетеборг и во Фалун. Таму бил обвинет за сексуален напад, овој пат против жена. Католичката црква во Шведска никогаш не ги пријавила обвиненијата во полиција бидејќи жената не сакала да сведочи.
„Тоа е харизматичен свештеник кој мисли дека има лековити сили. За време на таква исцелителна сесија тој ја малтретирал “, рече Кристина Хелнер за СВТ.
Свештеникот, кој сега има 78 години, негира дека тоа се случило.
Вториот свештеник доаѓа од Југоисточна Азија и бил ракоположен во Осло, Норвешка, каде што работел неколку години. Кога бил свештеник во Сан Бернардино, Калифорнија, во 1993 година, тој бил пријавен поради секс со малолетничка, но полициската истрага била затворена кога девојчето одбило да сведочи.
Свештеникот бил принуден да се повлече, но се преселил во Малме, Шведска, во 2003 година, каде што работел една година. Таму тој бил обвинет дека малтретирал маж од црковnата заедница, но делото сепак никогаш не било пријавено.
Бискупот на Католичката црква во Норвешка, Бернт Ејдсвиг, изјави за националниот радиодифузер НРК дека еден од обвинетите е осомничен за сексуална злоупотреба во Норвешка во 80-tiте години. Потоа, тој го сменил своето име и веќе не е активен свештеник.
Католичката црква во Шведска брои приближно 1,5 отсто од населението. Се проценува дека во Норвешка има 230.000 католици, што ја прави најкатоличка нација во Северна Европа. Во последните децении, до Католичката црква биле поднесени пријави за злоупотреба за стотици свештеници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Се бараат оставки поради трагедијата во Домот за пензионери
Голем број граѓани на Тузла денеска излегоа на улиците на градот и одржаа протест, изразувајќи го своето незадоволство поради трагедиите и скандалите што го погодија Тузланскиот кантон.
Пожарот што избувна во вторникот во Домот за пензионери во Тузла однесе 13 животи, а 12 пациенти сè уште се наоѓаат во болница. Како што беше утврдено, жртвите починале од труење со јаглерод моноксид.
Една седмица претходно, Тузланскиот кантон го потресе случајот со подведување малолетнички, за што се осомничени полициски службеник и еден професор. Нивното подведување траело неколку месеци во текот на минатата и оваа година.
Присутните граѓани од Тузла, но и оние кои допатуваа од други градови на Босна и Херцеговина, денеска побараа оставки од надлежните.
Свет
Три девојки планирале терористички напад во Париз
Девојки на возраст од 18, 19 и 21 година, беа уапсени и обвинети за терористичка завера и планирање напад во Париз, соопштија денеска истражните органи.
Како што е наведено, тие неколку недели планирале насилен терористички напад врз кафуле или концертна сала во Париз, јави РТЛ.
Апсењето и обвинението против трите жени е резултат на истрагата на Националното обвинителство за борба против тероризмот, која беше успешно завршена пред 10-годишнината од смртоносниот терористички напад на 13 ноември 2015 година во Париз.
Свет
Се запали магацин за парфеми во Турција, загинаа шест лица
Најмалку шест лица загинаа, а две се повредени во пожар што утрово избувна во магацин за парфеми во градот Диловаси, во северозападниот дел на Турција.
Според снимките што ги емитуваше турскиот канал НТВ, изгореле два ката од зградата во која се наоѓале магацинот и работилницата за производство на парфеми.
Засега нема информации за тоа што го предизвикало пожарот.

