Турските власти приведоа 19 лица во врска со минатонеделниот пожар во хотел во ски-центар во северниот град Болу, објави државната новинска агенција „Анадолија“.

Уапсени се сопственикот на хотелот Гранд Картал, директорот, локалниот пожарникар и заменик-градоначалникот на Болу. Потерница е распишана и по вработен во фирмата за инспекција, стои во пријавата.

Пожарот, кој избувна рано утрото на 21 јануари, однесе 78 животи. Многумина од повеќе од 230 гости се обиделе да избегаат од хотелот скокајќи од прозорците или спуштајќи се со чаршафите. Инцидентот предизвика широки критики во Турција и обвинувања дека не се почитуваат мерките за спречување пожари.

Централната влада и општината Болу меѓусебно се обвинуваат за пожарот, со оглед на фактот дека градот е под контрола на опозициската Републиканска народна партија (ЦХП). Мерките за безбедност на градежништвото често не се почитуваат во Турција. Во петокот вечерта, зграда во централниот град Коња ненадејно се урна, при што загинаа две лица.

Минатата година 29 лица загинаа во пожар во ноќен клуб во Истанбул. Во силните земјотреси на југот на земјата во 2023 година загинаа повеќе од 50.000 луѓе, делумно поради неисправна градба.

Некои од израелските заложници ослободени од Газа како дел од примирјето биле држени од Хамас до осум месеци без прекин во тунели, лишени од дневна светлина и со мал или никаков човечки контакт, тврди израелски офицер.

Тројца израелски цивили и четири жени војници досега се ослободени како дел од прекинот на огнот, кој започна на 19 јануари.

За возврат, Израел ослободи 290 палестински затвореници.

„Некои од нив ни кажаа дека во последните неколку месеци или цело време биле во тунели, под земја“, изјави за новинарите Ави Банов, заменик-началник на израелските воени лекари.

„Некои од нив цело време биле таму сами“, рече тој.

„Оние кои рекоа дека се заедно (со други) се во подобра состојба“.

Израелската војска ги надгледува првите лекарски прегледи на заложниците по нивното пристигнување на израелска територија.

Ројтерс не можеше да дојде до вооруженото крило на Хамас за коментар.

Заложниците рекле дека нивниот третман се подобрил во деновите пред нивното ослободување кога им било дозволено да се тушираат, да се пресоблечат и да имаат подобра храна.

Американскиот претседател, Доналд Трамп, наскоро ќе потпише извршни наредби за ставање крај на воената програма за различност, правичност и вклучување и враќање на илјадници војници кои беа отпуштени затоа што одбија да се вакцинираат против вирусот за време на пандемијата Ковид-19, објави денеска министерот за одбрана Пит Хегсет.

Хегсет, поранешен водител на Фокс њуз и воен ветеран, беше потврден за министер во американскиот Сенат со минимална поддршка – тој доби 51 глас „за“ и 50 „против“.

Тројца републиканци не го поддржаа, па гласот на потпретседателот на Трамп, Џеј Ди Венс беше 51. одлучувачки глас.

„Доаѓаат уште извршни наредби“, им рече Хегсет на новинарите по пристигнувањето во Пентагон на неговиот прв ден на неговата нова позиција.

Хегсет вети дека ќе направи големи промени во Министерството за одбрана, а еден од неговите приоритети е да ја елиминира програмата различност, еднаквост и вклучување, позната колективно по американскиот акроним DEI.