Свет
Ким Џонг-ун се подготвува да лансира шпионски сателит: јапонските разурнувачи во состојба на готовност
Северна Кореја ја извести Јапонија дека планира да лансира сателит помеѓу 22 ноември и 1 декември, што според Токио и Сеул би можело да биде трет обид да се стави шпионски сателит во орбитата. Јапонската крајбрежна стража денеска соопшти дека Северна Кореја испратила известување за лансирање во правец на Жолтото и Источното Кинеско Море.
Националната агенција за поморска безбедност на Јужна Кореја издаде предупредување до бродовите за планираното лансирање за овие области, како и во случајот со претходните лансирања. На почетокот на оваа година Северна Кореја веќе двапати се обиде да лансира, како што вели, шпионски сателити, но без успех. Јужнокорејските власти во последните денови предупредија дека се чини оти набргу ќе се обидат повторно.
Јапонскиот премиер Фумио Кишида ги осуди плановите и рече дека одбранбените системи на неговата земја, вклучително и разурнувачите „Егис“ и ракетите за воздушна одбрана „PAC-3“, се подготвени за секоја „неочекувана ситуација“.
„Дури и ако целта е да се лансира сателит, употребата на технологија за балистички проектили е кршење голем број резолуции на Советот за безбедност на Обединетите нации“, изјави Кишида за новинарите. „Тоа е исто така прашање што во голема мера влијае на националната безбедност“, додаде тој.
Јапонија ќе соработува со САД, Јужна Кореја и други за да ја убеди Северна Кореја да не продолжува со лансирањето, рече Кишида. Јужнокорејското Министерство за одбрана соопшти дека го набљудува планираното лансирање на Северна Кореја.
Пјонгјанг смета дека нејзините вселенски и воени ракетни програми се суверено право и планира да има флота од сателити за следење на движењата на американските и јужнокорејските сили. Зајакнувањето на воената моќ е суверено право на Северна Кореја и е одговор на системот за вселенски надзор предводен од САД, објави во вторникот државниот медиум КЦНА.
Аналитичарите велат дека шпионските сателити се клучни за надградбата на оружјето на Северна Кореја.
Ова е прво лансирање од септември кога севернокорејскиот лидер Ким Џонг-ун го обиколи рускиот космодром, каде што рускиот претседател Владимир Путин вети дека ќе му помогне на Пјонгјанг да изгради сателит. Јужна Кореја посебно планира да го лансира својот прв извидувачки сателит на 30 ноември од Калифорнија со помош на САД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски се обрати до нацијата: Се браниме кај Харков, во Доњецк е исклучително тешко
Украинските сили продолжуваат со одбранбените операции околу северните погранични населби во регионот Харков, изјави украинскиот претседател, Володимир Зеленски во вечерното обраќање до нацијата.
„Нашите сили извршуваат контранапади и ја штитат украинската територија веќе втор ден“, рече Зеленски.
Украинската војска претходно соопшти дека руските сили се задржани во пограничните села во „сивата зона“, додека Русија објави дека зазела пет локални населби.
Ситуацијата, рече Зеленски, е особено напната во регионот на Доњецк, поточно во правец на Покровское, кај селата Семенивка и Нетаилова.
Зеленски додаде дека попречувањето на руските офанзивни акции сега е задача број еден.
Свет
Макрон: Се надевам дека Французите нема да мора да се борат во Украина
Францускиот претседател Емануел Макрон уште еднаш не ја исклучи можноста за интервенција на француската армија во Украина, но истовремено изрази надеж дека неговата земја нема да мора да војува и да испраќа свои војници во војна.
Како што пренесува „Украинска правда“, Емануел Макрон рече дека во одреден момент Европејците треба да бидат подготвени да ја спречат Русија да напредува понатаму во Украина, но тој најискрено се надева дека нема да мора да се борат.
„Ако сакаме мир, мораме да го заштитиме. Затоа треба да се вооружиме и затоа треба да бидеме средство за одвраќање и убедување. Ако одите предалеку и ги загрозувате нашите интереси и нашата безбедност, тогаш јас не исклучувам интервенци во конфликтот“, рече Макрон.
Тој нагласи дека украинскиот суверенитет и територијалниот интегритет се под закана, но истовремено владеењето на правото и општите правила се под закана.
„И ако оставиме сè како што е во Украина, тогаш ќе победи правото на посилниот. И не можеме да бидеме сигурни бидејќи тоа се случува на 1.500 километри. Значи, во Украина нашата иднина и нашата безбедност се во прашање“, заклучи францускиот претседател.
Свет
Големи пропалестински протести во Малме пред евровизиското финале, се бара исклучување на Израел од натпреварот
Денеска во центарот на Малме, Шведска се одржува масовен пропалестински протест поради учеството на Израел на овогодинешното натпреварување.
Голем број луѓе почнаа да се собираат на главниот плоштад во Малме од 16 часот.
Протестот почна на главниот плоштад во Малме, а насобраните од ова место се упатија кон арената Малме, каде што се одржува Евровизија.
Во четвртокот, кога претставничката на Израел настапи во втората полуфинална вечер, на улиците на Малме протестираа повеќе од 30.000 луѓе, според проценките на шведската полиција.
Барањата се исти – бојкот на Евровизија и исклучување на Израел од натпреварувањето.