Рускиот претседател Владимир Путин потпиша ажурирана верзија на нуклеарната доктрина на земјата.

Основниот принцип на доктрината е дека употребата на нуклеарно оружје е последната мерка за заштита на суверенитетот на земјата. Наведени се предусловите за употреба на нуклеарно оружје. Поточно, изменетата доктрина го проширува опсегот на земји и воени сојузи кои се предмет на нуклеарно одвраќање, како и списокот на воени закани на кои треба да се спротивстави.

Дополнително, во документот се наведува дека Русија сега како заеднички напад ќе го смета секој напад од ненуклеарна земја, поддржана од нуклеарна сила. Москва, исто така, го задржува правото да размисли за нуклеарен одговор на напад со конвенционално оружје што го загрозува нејзиниот суверенитет.

Претходната верзија на руската нуклеарна доктрина беше одобрена во јуни 2020 година и замени сличен документ што беше во сила десет години.

Поранешниот советник на Путин, Сергеј Марков изјави дека САД директно се вклучиле во војната со тоа што дозволиле истрелување ракети со долг дострел на руска територија.

„Џо Бајден сака да ги блокира обидите на Доналд Трамп да склучи мировен договор кога ќе биде инаугуриран за претседател“, изјави Марков за Скај Њуз.

Тој додаде дека ако Украина ги употреби британските ракети со долг дострел, познати како Storm Shadow, против Русија со учество на британски офицери, цел ќе стане и британската војска, но и американската.

„Ако САД и Велика Британија сега директно учествуваат во војната против Русија, тоа значи дека армиите на САД и Велика Британија стануваат легитимни цели на руската армија“, рече тој.

Неколку ученици се повредени откако автомобил удрил во луѓе пред основно училиште во централна Кина, јави државната новинска агенција Ксинхуа, пренесе „Си-Ен-Ен“.

Не е јасно колку луѓе се повредени во инцидентот, кој се случи во градот Чангде во провинцијата Хунан, се додава.

Видео кое кружи на социјалните мрежи покажува десетици деца во паника како врескаат и трчаат во училишниот двор, а во позадината машки глас извикува „брзо, брзо“.

На второто видео се гледаат неколку луѓе, пишува „Си-Ен-Ен“, меѓу кои и возрасни, како лежат на патот, очигледно повредени. Можеше да се види како полицијата му става лисици на маж пред возилото. Полицијата се уште не објавила извештај за инцидентот. Сликите од инцидентот што кружеа на интернет беа брзо избришани од платформите на социјалните медиуми, се вели во соопштението.

Кина минатиот понеделник го претрпе најсмртоносниот познат напад во последната деценија, кога 35 беа убиени откако маж со својот автомобил влета во толпа луѓе кои вежбаа во спортски центар на отворено во јужниот град Жухаи, објавија медиумите.

Неколку дена подоцна, осум лица беа убиени, а 17 повредени во напад со нож на универзитетски кампус во источна Кина.