Свет
Кина избршиша 1,4 милиони објави од Интернет

Кинескиот регулатор за сајбер-простор објави дека избришал 1,4 милиони објави на социјалните мрежи по двомесечна истрага, меѓу другото, за ширење дезинформации, незаконска заработка и имитирање на владини функционери.
Кинеската агенција за сајбер простор (CAC) во петокот соопшти дека отстранила 67.000 кориснички профили на социјалните мрежи и избришала стотици илјади објави меѓу 10 март и 22 мај, како дел од пошироката кампања за „корекција“.
Кина прегледува милијарди кориснички профили од 2021 година за да го исчисти сајбер просторот и да им олесни на властите да го контролираат, пишува Ројтерс.
Во последната кампања, беа прегледани профилите на популарни кинески социјални апликации како што се WeChat, Douyin и Weibo.
Од вкупно 67.000 профили што беа укинати, 8.000 се поради „ширење лажни вести, гласини и штетни информации“, соопшти CAC.
Околу 930.000 други беа казнети поблаго – пример, отстранување на сите следбеници.
Во посебна кампања, CAC неодамна затвори над 100.000 профили за кои се тврди дека имитираат медиуми.
Во петокот агенцијата објави дека отстранила и речиси 13.000 лажни воени наредби со имиња како „Команда на Црвената армија“ или „Кинески контратерористички сили“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Неколкумина загинаа откако патнички воз излета од шините во југозападна Германија

Неколку лица загинаа, а многу други се повредени откако патнички воз излета од шините во југозападна Германија, јави ДПА, повикувајќи се на безбедносни извори.
Спасувачките тимови се на местото на настанот и го пребаруваат возот и околината во потрага по патници.
Свет
Тројца мажи завршија во болница поради топлотен удар во Кипар

Тројца мажи се хоспитализирани денеска во Лимасол и Никозија во Кипар поради топлотен удар, при што еден од нив е во критична состојба.
Во исто време, двајца постари мажи, на возраст од 78 и 89 години, се хоспитализирани во Никозија во сериозна, но стабилна состојба. Уште еден 88-годишен пациент бил примен со симптоми на топлинска исцрпеност и е надвор од животна опасност.
Се апелира населението, особено до ранливите категории, да избегнуваат директна изложеност на сонце, да бидат внимателни и да внесуваат доволно течности, поради екстремно високите температури што зафатија делови од островот.
Свет
Фон дер Лајен се сретна со Трамп во обид да се договорат околу царините

Претседателката на Европската комисија, Урсула фон дер Лајен попладнево во шкотското место Трнбери ќе се сретне со американскиот претседател Доналд Трамп, во обид да биде постигнат трговски договор во пресрет на истекот на крајниот рок – 1 август за воведување на царини од 30 отсто за извозот на европски производи во САД.
Најавувајќи ја средбата во објава на Икс, Фон дер Лајен наведе дека со Трамп ќе „разговараат за трансатлантските трговски односи и за тоа како тие може да се одржат силни“.
Американската администрација веќе воведе царина од 50 отсто за увозот на челик и алуминиум од ЕУ, од 25 проценти за автомобили и автомобилски делови, како и основен данок од 10 отсто за поголемиот дел европски производи, со кои е опфатен околу 70 проценти од вкупниот извоз на Унијата во САД.
Средбата се одржува во услови на зголемени надежи во ЕУ дека Европската комисија би можела да постигне договор со Вашингтон по примерот на оној постигнат претходно неделава меѓу САД и Јапонија за просечна царина од 15 отсто на извозот на јапонски стоки на американскиот пазар.
ЕУ се надева дека, исто така, ќе постигне договор со САД за царинска стапка од 15 проценти, која би ја вклучувала и просечната царина од 4,8 отсто што ја плаќаат европските извозници на американскиот пазар уште од пред враќањето на Трамп во Белата куќа во јануари годинава.
Средбата доаѓа откако во четвртокот Европската комисија усвои пакет контрамерки на увозот на американски стоки во ЕУ, како одговор на најавената царина од САД од 30 отсто.
Портпаролот на ЕК за економска безбедност, трговија и царини Олоф Гил во четвртокот изјави дека фокусот на ЕУ е на постигнување на договор со САД за царините, а доколку тоа не се случи усвоените контрамерки ќе стапат во сила на 7 август.