Свет
Кинески хирурзи со помош на технологија оперираа пациентка оддалечена речиси пет илјади километри
Со помош на технологијата за роботска хирургија, напојувана со 5G, кинески хирург успешно го отстрани воспаленото жолчно кесе на пациентка која живее илјадници километри подалеку во северозападна Кина. Високо ефективната операција на далечина беше завршена за само 30 минути на 16 февруари, објави „Ксинхуа“.
Лианг Ксијао ја спроведе процедурата со помош на роботска конзола во болница во Хангжу, главен град на источната кинеска провинција Жеџијанг. Во исто време, пациентката била во болница во градот Алаер во автономниот регион Ксинџијанг Ујгур, на речиси 5.000 километри оддалеченост од локацијата на хирургот.
„Кога дадов инструкции од оперативната платформа, роботот за ендоскопија со четири раце во болницата Алаер одговори синхронизирано“, рече Лианг. Операцијата помина без проблеми, со незначително заостанување помеѓу хирургот и апаратот, додаде тој.
Оваа операција не само што ја излечи болеста што ја мачеше пациентката со денови, туку покажа и како оваа молскавична безжична технологија може да им обезбеди на пациентите во оддалечените региони на Кина поголем пристап до висококвалитетни медицински услуги. Болниците во некои внатрешни региони, далеку од источните крајбрежни региони богати со медицински ресурси, се соочуваат со недостиг на добро обучен персонал и напредна опрема.
Пациентите од оддалечените области кои страдаат од критични болести често се соочуваат со значителни предизвици и временски ограничувања кога станува збор за патување во поголемите градови за лекување. Поради ова, локалните болници обично бараат помош од истакнати лекари од водечки медицински центри за да вршат операции и да ги задоволат потребите на своите пациенти. Но, целиот овој процес е подеднакво стресен и за медицинскиот персонал. Претходно, лекарите во Хангжу мораа да патуваат речиси девет часа со авион, по што следеше уште 30-минутно возење со автобус за да стигнат до болницата во Алаер. Благодарение на хируршката технологија овозможена од 5G, овој проблем сега може ефективно да се реши.
„Отстранувањето на жолчното кесе сега за нас е рутинска операција“, рече Лианг.
Кинеските производители на медицински роботи моментално работат на подобрување на технологијата за дополнително да го надминат ограничувањето на просторот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Тони Блер: Треба да донесеме трета страна за да ја завршиме војната во Газа
Поранешниот британски лидер Тони Блер денеска изјави дека треба да се донесе трета страна да управува со Газа за да се стави крај на војната во областа, истовремено изразувајќи ја поддршката за војната на Израел против либанското движење Хезболах.
Кога Блер беше британски премиер за време на војната меѓу Израел и Хезболах во 2006 година, тој го поддржуваше Израел и се спротивстави на повиците на неговата влада да воведе ембарго, пренесува „Политико“.
Тој ги поврза сегашните непријателства со кршењето на Хезболах на резолуцијата за прекин на огнот од 2006 година на Советот за безбедност на ОН, со која се повикува движењето да се повлече од границата со Израел и да се разоружа.
Регион
Бугарија до своите граѓани: Веднаш напуштете го Иран
Бугарија денеска ги повика своите граѓани веднаш да го напуштат Иран поради ескалацијата на тензиите на Блискиот Исток, јавува „Анадолија“.
На Бугарите им се препорачува строго да ги следат безбедносните упатства на локалните власти, да бидат информирани за ситуацијата и да избегнуваат посета на воени локации и масовни собири“, се вели во соопштението на бугарското МНР.
Се препорачува бугарските државјани во Иран веднаш да стапат во контакт со бугарската амбасада во Техеран за да дадат детали за своето место на живеење и планираното времетраење на престојот или со јавување во Амбасадата или преку е-пошта до Генералниот конзулат во Техеран.
Свет
Двајца белгиски новинари ранети во Бејрут, едниот има фрактура на лицето
Двајца новинари на белгиската телевизија ВТМ се повредени денеска во Бејрут додека известувале за воздушен напад врз центарот на либанската престолнина во време на отворен конфликт меѓу Израел и Хезболах, соопшти нивната редакција.
Воениот репортер Робин Рамаекерс доби фрактура на лицето, а камерманот Стијн де Смет си ја повреди ногата, така што и двајцата беа хоспитализирани. Нивната редакција телефонски разговарала со нив и било потврдено дека не се во животна опасност, изјави портпаролот на медиумската групација „ДПГ медија“, сопственик на ВТМ.
Седум лица беа убиени во израелски воздушен напад врз градот во четвртокот наутро, еден ден по убиството на осум израелски војници во судирите со Хезболах. Израел соопшти дека извршил прецизен воздушен напад врз Бејрут. Три проектили го погодија и јужното предградие Дахиџе, каде што минатата недела беше убиен лидерот на Хезболах, Хасан Насрала.
Белгиското Министерство за надворешни работи соопшти дека ќе ја следи состојбата на своите повредени новинари. Во Либан моментно има речиси 1.800 белгиски државјани, а стотина изразиле желба да ја напуштат земјата, соопшти белгиската дипломатија додавајќи дека ќе им помогне во тоа.