Свет
Кислица: Русија одби безусловно примирје во Истанбул

Претставниците на Русија повторно одбија безусловно примирје, изјави Сергеј Кислица, првиот заменик-министер за надворешни работи на Украина и член на украинската делегација, по втората рунда преговори меѓу руската и украинската страна во Истанбул.
На брифингот по преговорите, тој рече дека „претседателот на САД Доналд Трамп предложи безусловно примирје“, додавајќи дека за тоа е разговарано со американската делегација, објави агенцијата „Униан“.
„Нашата делегација го повтори сето ова, но руската страна не ги прифати предлозите“, рече Кислица.
Тој додаде дека Русите се против вклучувањето на Соединетите Американски Држави во преговорите и изјави дека Украина не е задоволна од оваа позиција.
„САД играат многу важна улога и се значаен гарант на довербата. За да се обезбеди долгорочна безбедносна архитектура во Европа, Америка мора да биде вклучена бидејќи во спротивно не можеме да зборуваме за долгорочна одржливост“, рече украинскиот функционер.
Шефот на украинската делегација, министерот за одбрана Рустем Умеров, изјави дека денес двете страни се договориле за нова размена на затвореници, како и за враќање на 6.000 тела на загинати војници во замена за 6.000 загинати од другата страна.
Како што објави украинската агенција, шефот на руската делегација, Владимир Медински, изјавил дека Русија ѝ понудила на Украина прекин на огнот два или три дена, наводно со цел да ги собере телата на загинатите.
Вториот круг преговори меѓу делегациите на Русија и Украина се одржа денес во истанбулскиот дворец Чираган, пренесува Танјуг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
„Подгответе се за голем напад“: американската амбасада во Киев издаде итно соопштение

Американската амбасада во Киев издаде предупредување за растечкиот ризик од големи руски напади врз Украина.
Објавата на Амбасадата на нејзината веб-страница следуваше кратко откога Доналд Трамп и Владимир Путин, претседателите на САД и Русија, разговараа по телефон синоќа.
Путин му кажа на Трамп дека Кремљ ќе мора да одговори на украинската операција „Пајажина“, во која руски стратешки бомбардери беа цел во неделата.
„Русија го зголеми интензитетот на ракетните и на беспилотните напади врз Украина во последните недели и во моментот постои континуиран ризик од значителни воздушни напади. Амбасадата на САД во Киев ги повикува американските граѓани да бидат претпазливи. Како и секогаш, препорачуваме да бидат подготвени веднаш да се засолнат во случај да се издаде предупредување за воздушен напад“, се наведува во соопштението на Амбасадата.
Последното слично предупредување беше издадено од Амбасадата на САД на 9 мај наведувајќи тогаш дека постои ризик од големи воздушни напади во текот на следните неколку дена.
Речиси две недели подоцна, Русија ја почна својата најголема серија воздушни напади против Украина, која почна на 25 мај, целејќи ги Киев и други области на земјата, при што загинаа повеќе од 15 лица, а десетици беа ранети.
По синоќешниот разговор со Путин, Трамп напиша дека „разговарале за украинскиот напад врз руските авиони на терен, како и за разни други напади извршени од двете страни“.
„Беше тоа добар разговор, но не разговор што ќе доведе до моментен мир“, рече Трамп.
Свет
(Видео) Јапонска компанија денес вторпат ќе се обиде да слета на Месечината

Вселенскиот лендер „Резилиенс“ на компанијата Испејс“ денес ќе се обиде да слета на северниот дел од Месечината по шестмесечно патување. Мисијата го означува вториот обид на јапонскиот стартап да изврши меко слетување на површината на Месечината.
Слетувањето е закажано за 21.24 часот по македонско време, во регионот „Маре фригорис“ („Море од студ“), кој се наоѓа во крајниот северен дел од Месечината. Емитувањето ќе биде достапно во живо на јутјуб-каналот на „Испејс“, приближно еден час пред планираното слетување.
Лендерот беше лансиран на 15 јануари 2025 година и влезе во елиптична трансферна орбита, а потоа со помош на поминување блиску до Месечината премина во енергетски ефикасна орбита на ниска надморска височина. Успешно ги заврши сите орбитални маневри и моментно е во лунарна орбита на ниска надморска височина, од која ќе се обиде со последен маневар за слетување.
За време на автоматското спуштање, „Резилиенс“ ќе ги активира своите главни погонски механизми за да ја намали брзината и да ја приспоосби надморската височина со цел меко слетување на „Маре фригорис“.
Лендерот носи мал ровер наречен „Тенесиус“, дизајниран да ја истражува површината на Месечината. Исто така, носи голем број научни инструменти, првенствено од јапонскиот приватен сектор, чија цел е да собираат податоци за лунарните услови и ресурси.
Ова е втор обид за слетување на Месечината за „Испејс“. За време на првиот обид во април 2023 година, мисијата „Хакуто-Р М1“ не успеа: поради погрешна процена на надморската височина, лендерот предвреме го намали потисокот и остана без гориво на надморска височина од 5 километри по што слободно падна и се распадна. Тој лендер исто така носеше мали роботи од јапонската вселенска агенција.
Свет
Руски функционер: Воените авиони беа оштетени, но не и уништени во украинскиот напад

Руските воени авиони беа оштетени, но не уништени во украинскиот напад на 1 јуни, изјави заменик-министерот за надворешни работи, Сергеј Рјабков, додавајќи дека авионите ќе бидат поправени.
Украинските напади беа насочени кон воени аеродроми во Сибир и на далечниот север, каде што Русија одржува тешки бомбардери, кои се дел од нејзиниот стратешки нуклеарен арсенал.
Според процената на Соединетите Американски Држави, погодени се до 20 воени авиони, од кои 10-ина се уништени, изјавија за „Ројтерс“ двајца американски функционери. Оваа бројка е приближно половина од онаа што претходно ја изјави украинскиот претседател, Володимир Зеленски.
Рјабков, кој ја надгледува руската дипломатија во областа на контролата на оружјето, изјави за државната агенција ТАСС: „Дотичната опрема, како што изјавија и претставници на Министерството за одбрана, не е уништена, туку оштетена. Ќе биде обновена“.
Не е познато колку бргу Русија би можела да ги поправи или замени оштетените авиони, особено со оглед на сложеноста на технологијата, староста на некои авиони од советската ера и западните санкции, што го ограничуваат увозот на чувствителни компоненти.
Комерцијалните сателитски снимки направени по нападот со украински беспилотни летала покажуваат, според експертите, дека се оштетени руските стратешки бомбардери „ту-95“ и „ту-22“, кои Русија ги користела за ракетни напади врз Украина.
Според извори во Билтенот на атомски научници, Русија има флота од 67 стратешки бомбардери, вклучувајќи 52 „ту-95“ (познати како „Мечка-Х“ според класификацијата на НАТО) и 15 „ту-160“ (познати како „Блекџек“), од кои се проценува дека 58 се моментно во употреба.
Покрај тоа, Русија има 289 нестратешки борбени авиони и бомбардери, вклучувајќи ги „ту-22“, „су-24“, „су-34“ и „миг-31“.
Руските власти не кажаа точно кои авиони биле оштетени, но потврдија дека целите на нападот биле пет воени бази.