Свет
Климатски промени во Бангладеш: На денот на мојата свадба гром го уби моето семејство

На денот кога требало да се ожени, Мамун погребал 16 негови роднини кои биле убиени од гром на пат кон прославата. Членовите на неговото семејство, облечени во свечени сардери и костуми, се качиле на брод за да ги однесе до местото на венчавката. Но, тогаш започнала бурата.
Бродот запрел поради обилните дождови, а семејството се засолнило под лимена барака на брегот на реката, која подоцна била погодена од гром. Според податоците на ОН, во Бангладеш во просек годишно 300 луѓе умираат од удари на гром. Во САД, има помалку од 20 такви смртни случаи годишно, иако Соединетите Држави имаат речиси двојно повеќе население од Бангладеш.
Громот е главен убиец во Бангладеш, одзема повеќе животи годишно отколку поплавите. НАСА, ОН и владата на Бангладеш тврдат дека причина за се посилните бури и грмотевици се климатските промени.
„Глобалното затоплување, промените во животната средина, начинот на живот се фактори кои влијаат на порастот на смртните случаи од гром“, изјави за Би-Би-Си г-дин Мијанур Рахман, генерален директор на Одделот за управување со катастрофи во Бангладеш.
Ситуацијата е толку сериозна што владата на официјалната листа на елементарни непогоди кои и се закануваат на земјата ги додаде и ударите од гром. Повеќето од жртвите се земјоделци, кои работат на полињата и се изложени на грмотевици во врнежливите монсунски месеци од пролетта и летото.
Мамун првпат зборуваше за Би-Би-Си за тоа што се случило на тој трагичен ден во август 2021 година. 21-годишникот се подготвувал да се венча во домот на семејството на неговата идна сопруга кога слушнал силен гром. Неколку минути подоцна ја дознал шокантната вест.
Тој побрзал кај своето семејство. „Некои луѓе ги гушкаа телата“, се сеќава Мамун, „повредените плачеа од болка, децата врескаа. Не знаев кому прво да се обратам за помош“. Мамун ги загубил таткото, бабата и дедото, братучедите, чичковците и тетките во удар на гром. Неговата мајка не била во бродот и ја преживеала несреќата.
„Кога го најдов мртвото тело на татко ми, само се расплакав. Бев толку шокиран што ми се слоши“, вели Мамун. Подоцна истата вечер, наместо свадба, беше организиран погреб. Мамун подоцна се ожени, но вели дека не слави годишнина од бракот бидејќи буди болни спомени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Катар го прифати извинувањето на Нетанјаху

Катар го поздрави извинувањето и ветувањето на израелскиот премиер Бенјамин Нетанјаху дека Израел нема повторно да изврши напад врз Доха, соопшти Белата куќа.
Нетанјаху претходно денеска од Белата куќа телефонски разговарал со катарскиот премиер Мохамед бин Абдурахман Ал Тани, извинувајќи се за нападот насочен кон раководството на Хамас, со кој била нарушена катарската сувереност.
Во заедничкото соопштение беше потврдено дека е воспоставен „трилатерален механизам“ за подобрување на односите. Катарскиот премиер ги поздравил гаранциите од Израел, нагласувајќи ја подготвеноста на Доха за понатамошна соработка во интерес на регионалната безбедност и стабилност.
Свет
„Ројтерс“: Нетанјаху му се извинил на Катар за нападот врз Доха

Израелскиот премиер, Бенјамин Нетанјаху, се извинил на Катар поради израелскиот воздушен напад врз Доха од почетокот на месецов, во кој цел биле функционери на Хамас, јави „Ројтерс“.
Според извор близок до израелскиот премиер, тој телефонирал со катарскиот премиер Мохамед бин Абдурахман Ал Тани од Белата куќа, каде што во исто време американскиот претседател Доналд Трамп остварил контакт со Катар.
Извинувањето доаѓа во момент кога Нетанјаху престојува во Вашингтон на средба со Трамп. Главна тема е новиот мировен план од 21 точка, со кој се предвидува прекин на огнот, ослободување на израелските заложници и воспоставување ново управување со Газа без учество на Хамас.
Катар претходно го осуди израелскиот напад како „подмолен“ и „груб прекршок на меѓународното право“. Во исто време, Нетанјаху е под силен притисок да го прифати американскиот план кој ја исклучува анексијата на Западниот Брег и бара формирање нова палестинска влада.
Свет
Осомничениот во случајот со Медлин Мек Кен: „Вратете ми го животот!“

Кристијан Брукнер, осомничен во истрагата за исчезнувањето на Медлин Мек Кен, за првпат јавно проговори по излегувањето од затвор. Во интервју за „Скај њуз“ рече дека е жртва на „лов на вештерки“ и побара да му се врати нормалниот живот.
„Не се чувствувам слободен. Носам нараквица и под 24-часовен надзор сум. Сакам ова да престане и некој да преземе одговорност,“ изјави Брукнер.
Тој се обиде да влезе во канцеларијата на германскиот обвинител Ханс Кристијан Волтерс, кој претходно јавно тврдеше дека има докази дека Брукнер ја киднапирал и убил Медлин, иако призна дека тие не се доволни за подигнување обвинение.
Брукнер (49) неодамна беше ослободен по издржана казна за друго кривично дело. Германските медиуми јавуваат дека по неговото ослободување бил сместен во привремено живеалиште, но по јавниот притисок и протестите на граѓаните, бил преместен од градот Нојминстер.
На директно прашање дали има врска со исчезнувањето на британското девојче, Брукнер одговори дека по совет на адвокатите нема да зборува на таа тема.
Тригодишното девојче исчезна од апартмански комплекс во Праја да Луз во Португалија на 3 мај 2007 година, што предизвика истрага низ цела Европа и стана еден од најпознатите случаи на исчезнати лица. Нејзините родители вечерале со пријателите во блискиот ресторан додека таа и нејзините помали браќа и сестри близнаци спиеле во станот. Нејзината мајка Кејт открила дека Медлин ја нема околу 22 часот по локално време.
Случајот останува нерешен, но германските обвинители велат дека имаат докази кои сугерираат дека Брикнер можеби бил во областа кога исчезнала Медлин. Волтерс рече дека иако тој и другите обвинители не веруваат дека имаат доволно докази за формално да го обвинат Брикнер во случајот Меккен, нивните напори ќе продолжат.