Свет
Климатски протести во Холандија: уапсени над 500 активисти, 10.000 блокираа автопат

Холандската полиција денеска соопшти дека повеќе од 500 климатски активисти биле уапсени за време на вториот ден од протестите против владините субвенции за индустријата за фосилни горива.
Стотици демонстранти маршираа по автопатот А12 во Хаг околу пладне, игнорирајќи ги предупредувањата на властите да не го прават тоа и блокирајќи ја главната сообраќајна артерија, објави Ројтерс.
Во саботата беа уапсени околу 2.400 демонстранти, а околу 10.000 активисти го блокираа истиот автопат неколку часа.
Организаторот на настанот Extinction Rebellion најави дека демонстрантите ќе се обидуваат да го блокираат автопатот секој ден додека холандската влада не престане да користи јавни средства за субвенционирање на нафтената и гасната индустрија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Путин вети помодерно оружје за руските војници

Рускиот претседател Владимир Путин денеска вети дека ќе им обезбеди на руските сили помодерно оружје и технологија, еден ден пред третата годишнина од инвазијата на Москва на Украина.
„Им благодарам на сите учесници во специјалната воена операција за нивната борбеност и одлучноста за победа“, рече Путин во видео пораката по повод одбележувањето на Денот на бранителот на татковината, еден од најважните национални празници во Русија.
Кремљ официјално ја нарекува руската инвазија на Украина „специјална воена операција“.
„Денес, среде брзите промени во светот, нашиот стратешки пат кон зајакнување и развој на вооружените сили останува непроменет“, рече Путин.
„Врз основа на искуството и барањата на бојното поле, опремувањето на војниците со ново оружје е приоритет“, додаде тој.
Путин ја даде оваа изјава пред големата прес-конференција што украинскиот претседател Володимир Зеленски има намера да ја одржи денеска. Се очекува Зеленски да зборува за ситуацијата на првите борбени линии.
Конференцијата на украинскиот лидер доаѓа само неколку дена откако американскиот претседател Доналд Трамп, во пресврт на американската политика, остро го критикуваше, нарекувајќи го „диктатор“ поради одложувањето на изборите поради војната што Путин ја започна на 24 февруари 2022 година.
САД беа најважниот сојузник на Украина и снабдувач со оружје кога претходникот на Трамп, Џо Бајден, беше на функција, но неодамнешните коментари на Трамп сугерираат дека САД можеби нема да продолжат да ја поддржуваат Украина.
Додека руската војска продолжува да напредува во источна Украина, независни експерти проценуваат дека се убиени најмалку 95.000 руски војници, но овие бројки не можат да се потврдат. Од почетокот на војната, Путин ја трансформираше земјата во воена економија, а одбранбената индустрија работи со полна пареа.
Европа
(Фото/Видео) Истанбул под снег

Снегот продолжува да паѓа во некои населби на Истанбул, најнаселениот град во Турција, јавува Анадолија.
Снежните врнежи кои на моменти се интензивираа, особено во северните и повисоките делови, ги зафатија познатите знаменитости на градот кој се простира на два континента.
Бидејќи е викенд, досега не се пријавени поголеми проблеми во сообраќајот.
Иако екипите работат на отстранување на снегот од главните сообраќајници, движењето на возилата е отежнато поради насобирањето снег на споредните улици.
Европа
Шефот на швајцарската армија: Би можеле да учествуваме во мировната мисија во Украина

Швајцарија би можела да придонесе за идната мировна мисија во Украина, доколку тоа се бара, а владата се согласи, изјави командантот на швајцарските вооружени сили Томас Сусли во интервју објавено денеска.
„Веројатно би можеле да обезбедиме околу 200 војници за девет до 12 месеци“, рече Сусли за весникот SonntagsBlick, нагласувајќи дека владата и парламентот ќе одлучат ако Швајцарија биде повикана да го стори тоа.
„Разговорот за испраќање мировници засега е чисто хипотетички бидејќи не е јасно како ќе се развива ситуацијата меѓу Русија и Украина. Се уште нема мир и нема барање од Обединетите нации“, додаде тој.
Неутралната Швајцарија учествува во неколку мировни мисии ширум светот, со најголема во Косово, каде што има војници распоредени за поддршка на силите на НАТО на Косово (КФОР).
Европските сили разговараа за можноста за испраќање мировници во Украина во услови на дипломатски напори да се стави крај на конфликтот, три години по целосната инвазија на Русија во 2022 година.