Свет
Колку вакцинацијата ќе влијае врз патувањата на граѓаните

Колку вакцинацијата ќе влијае на тоа дали ќе можеме да патуваме на одредени дестинации е еден од најголемите сомнежи на граѓаните, бидејќи веќе има најави дека без потврда за имунизација или „пасош за корона“, ќе биде тешко да се преминуваат границите.
Лидерите на Европската унија наредната недела ќе ги разгледуваат барањата за воведување на таканаречен „европски сертификат за вакцинација“. Ова следува откако Европската комисија доби писмо од грчкиот премиер Киријакос Мицотакис, во кое, меѓу другите барања, се предлага олеснување за патување во рамките на Европската Унија.
Во писмото упатено до претседателката на Европската комисија, Урсула фон дер Лајен, грчкиот премиер Мицотакис бара приоритет да биде враќањето на слободата на движење низ цела Европска Унија. Тој посочува и на важноста од итно усогласување на позициите на земјите-членки за сертификатот за вакцинација, што според него, ќе помогне во повторно заживување на туризмот, но и за зголемен интерес за примање на вакцините.
Многу од граѓаните стануваат свесни дека наскоро ќе биде тешко да ја напуштат земјата без вакцинација и за тоа немаат голема дилема. На граѓаните на Србија, но и на другите земји, повеќе им пречат одредени најави дека постои можноста да не можат да патуваат во САД и земјите на ЕУ доколку примат руска или кинеска вакцина, бидејќи тие не се регистрирани во тие земји.
Претседателот на Србија, Александар Вучиќ, реагираше на тие најави, отфрлајќи ги тврдењата дека патувањата во поединечни земји на ЕУ ќе биде според која вакцина ја имаат примено граѓаните. Вучиќ праша дали тоа значи дека половина од светот нема да може да патува никаде бидејќи ја примиле руската вакцина.
На прашањето да ја искоментира реакцијата на ЕУ дека Унгарците нема да можат да патуваат во ЕУ бидејќи ја користат руската вакцина, Вучиќ кажа дека не го чул тоа, но дека го слушнал тоа. Тој рече дека слушнал како унгарскиот премиер Виктор Орбан бил „нападнат“ поради користење на руската вакцина и кршење на европските правила. Вучиќ останува на ставот дека не е можно да се спроведе правило за патување во ЕУ според потеклото на примената вакцина, бидејќи тоа значи дека ниту еден граѓанин од Русија, Кина, Пакистан, Емирати, Бахреин, Турција и други земји нема да можат да влезат во ЕУ.
„Сметате дека тоа е реално, никогаш не сум чул таква лудост“, рече претседателот на Србија.
Слични ставови имаат и докторите. Епидемиологот, професор д-р Радмило Петровиќ за српска „Политика“ вели дека е противник на таков вид дискриминација, бидејќи кога вакцините се набавувале од Запад, немало проблем за тоа од каде потекнуваат.
„За една година ќе знаеме која вакцина е поуспешна и која има помалку ефект. И во овој момент, кога животот на луѓето е во прашање, невидена глупост е некого да условувате со одредени вакцини за патување“, вели докторот Петровиќ.
Поединци од ЕУ, вели професор д-р Тања Јовановиќ, вирусолог и член на Кризниот штаб за сузбивање на Ковид 19 во Србија, изјавуваат дека ќе ги препознаат само оние вакцини што ги регистрираат европските агенции. Но таа потенцира дека тоа се заснова само на индивидуални изјави.
„Не сум слушнала официјален став дека Европската Унија донела таква одлука. Во овој момент никој не може да одговори на тоа прашање. Сега е најважно да се имунизираме со каква било достапна вакцина и тоа треба да биде приоритет“, вели д-р Јовановиќ.
Професор д-р Радан Стојановиќ, клинички фармаколог од Медицинскиот факултет во Белград, исто така смета дека е рано да се зборува за тоа која вакцина ќе биде услов за патувања.
„Претпоставувам дека сите вакцинирани луѓе ќе бидат група која ќе може да патува без проблеми. Ако се гледа кој чија вакцина примил, тоа ќе ги закомпликува работите“, вели Стојановиќ.
Александар Сеничиќ, директор на Националното здружение на туристички агенции на Србија, напоменува дека рускиот и кинескиот туристички пазар се меѓу најважните во светот, а дека само Кинезите праќаат по повеќе од 100.000 туристи во Европа.
„Мислам дека нема да дојде до тоа во светот да не се признаваат руската и кинеската вакцина. Веројатно се чека тие вакцини да се одобрат во институциите на Европската Унија. Доколку овие вакцини не се признаат, тоа би бил лош економски потег, бидејќи ќе се изгубат многу повеќе пари отколку што ќе се добијат. Руските туристи се главни во Европа, како во летната, така и во зимската сезона. Притоа, во последната година се бележи растечки тренд на кинески туристи во земјите од ЕУ и САД, од 15 до 20 отсто“, вели Сеничиќ.
Тој посочува дека идејата за издавање на „ковид пасоши“ први ја дале авиокомпаниите, а дека СЗО се оградила од тие најави, со образложение дека можеби тоа не е добар модел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Брисел: Почестени сме од желбата на Канаѓаните да влезат во ЕУ, но тоа не е остварливо

Брисел е почестен од резултатите од истражувањето кое покажа интерес на Канаѓаните за влез во Европската унија, изјави денеска Пола Пињо, портпарол на претседателката на Европската комисија Урсула фон дер Лајен, но нагласи дека идејата не е остварлива.
Истражувањето, спроведено на крајот на февруари од истражувачката компанија „Абакус Дата“, покажа дека 44 отсто од канадските испитаници веруваат дека нивната земја треба да се приклучи на ЕУ, додека само 34 отсто се против идејата, објави Политико.
Прашањето за општа поддршка за пристапување во европскиот блок наиде на одобрување од 46 отсто од испитаниците.
Свет
Поранешен советник на Путин: Русија стравува од едно сценарио во прекинот на огнот

Владимир Путин најверојатно планира да одговори на предлогот за прекин на огнот со свое барање, изјави неговиот поранешен советник Сергеј Марков.
Зборувајќи за SkyNews, Марков рече: „Русија стравува дека периодот на прекин на огнот ќе се искористи за целосна милитаризација на украинското општество од страна на НАТО“.
Поради ова, тврди тој, Путин најверојатно ќе бара ембарго за испорака на оружје на украинската армија од други земји.
Но, кога еден новинар го прашал за можноста за испраќање мировници од европските земји, Марков се насмеал.
„Британските и француските трупи се дел од војната“, рече тој, додавајќи дека мировниците обично се од неутрални земји.
„Сите војници од европските земји би се сметале за окупатори, а руските војници би ги убиле сите бидејќи дошле да ја ослободат Украина.
Тензиите се зголемија кога беше прашан дали Русија ќе ги смета британските мировници за непријатели и учесници во војната.
„Да, затоа што Британија е учесник во војната“, одговори Марков, мислејќи на воената помош што Обединетото Кралство и ја дава на Украина.
Свет
Трамп: Никој нема да ги протера Палестинците од Газа

Американскиот претседател Доналд Трамп денеска изјави дека ниту еден Палестинец нема да биде протеран од опколениот Појас Газа, иако тој продолжува со својот план за преземање и обнова на палестинската енклава.
„Никој не ги протерува Палестинците“, рече Трамп одговарајќи на новинарско прашање додека беше домаќин на ирскиот премиер Мајкл Мартин во Овалната соба.
Коментарите на американскиот претседател доаѓаат откако израелскиот екстремно десничарски министер за финансии Безалел Смотрич во неделата изјави дека Тел Авив ќе отвори нова канцеларија за „администрација за емиграција“ во Министерството за одбрана за да управува со принудното раселување на Палестинците од Газа, според повеќе медиумски извештаи.