Свет
Конзервираната храна со поминат рок ги труе жителите на Газа
Јадењето конзервирана храна со поминат рок во Појасот Газа поради големиот недостиг на храна предизвика труење кај Палестинците, објави во понеделникот Канцеларијата за медиуми на владата на Газа.
Канцеларијата наведува дека „луѓето јадат конзервирана храна со истечен рок на траење, што предизвикува голем број труења“.
„Гладот и болестите се во пораст меѓу населението во Газа, особено на децата“, се додава во соопштението.
Канцеларијата го обвини Израел дека спроведува систематска политика на гладување и спречување на жителите на Газа да добијат медицински третман.
Исто така, се додава дека цел на израелските сили биле општинските екипи, кои се обидувале да ги обноват бунарите за вода во регионот.
„Израелската армија директно гаѓаше и тимови за цивилна заштита намерно онеспособувајќи ги“, се наведува во соопштението.
Поради војната и израелските ограничувања, кои го прекршуваат меѓународното право, Палестинците во Појасот Газа, особено во северните области, се соочуваат со екстремен недостиг на храна, вода и лекови, што доведува до гладување.
Мартин Грифитс, потсекретарот за хуманитарни прашања на Обединетите нации, на 12 јуни предвиде дека половина од населението на Појасот Газа ќе се соочи со смрт и глад до средината на јули доколку не се укине блокадата со хуманитарната помош.
Прекршувајќи ја резолуцијата на Советот за безбедност на Обединетите нации, со која се бара итен прекин на огнот, Израел се соочи со меѓународна осуда поради неговата континуирана брутална офанзива врз Појасот Газа, почната по нападот на палестинската група на отпорот Хамас на 7 октомври минатата година.
Оттогаш повеќе од 37.500 Палестинци се убиени во Појасот Газа, повеќето жени и деца, а околу 86.000 се ранети, според локалните здравствени власти.
Израел е обвинет за геноцид пред Меѓународниот суд на правдата, чија последна одлука беше да им се нареди на израелските власти веднаш да ја прекинат воената операција во јужниот град Рафа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Орбан: Сфатете ги сериозно нуклеарните закани на Путин, тоа не е блеф
Унгарскиот премиер Виктор Орбан, еден од ретките европски лидери во добри односи со рускиот претседател Владимир Путин, вели дека Западот треба сериозно да ги сфати заканите на рускиот лидер, пренесуваат медиумите во регионот.
„Сакам само да кажам дека кога Русите ги менуваат правилата за користење на нивниот нуклеарен арсенал, она што се нарекува нуклеарна доктрина, тоа не е комуникациски блеф“, рече тој, мислејќи на промените што Путин ги потпиша минатата недела.
„Тоа не е блеф. Доктрината е изменета и ќе има последици“, рече тој.
Според написите, Унгарија е меѓу неколкуте европски нации кои силно го поддржуваат режимот на Владимир Путин во Русија. Владата на Орбан постојано се противеше на санкциите против Русија, фрустрирајќи ја Европската унија и НАТО. Унгарија исто така се противи на помагање на Украина и на идејата Украина да се приклучи на ЕУ и НАТО, анализираат медиумите.
Свет
Путин: Не постои средство за пресретнување на ракетата „Орешник“
Рускиот претседател Владимир Путин денеска изјави дека ракетниот систем „Орешник“ не е средство за масовно уништување, туку високо прецизно оружје и дека нема средства во светот кои би можеле да го пресретнат.
Тој најави масовно производство на ова оружје, нагласувајќи дека овој нов систем стана уште еден гарант на суверенитетот и територијалниот интегритет на Русија.
„Во денешниот свет нема одговор за таков проектил, ниту средства за нејзино пресретнување. И уште еднаш ќе нагласам дека ќе продолжиме да го тестираме овој најнов систем“, рече Путин.
Тој на состанокот во Кремљ изјави дека ракетниот систем „Орешник“ ќе биде пуштен во употреба со стратешките ракетни сили на Русија и дека е донесена одлука за масовно производство на овој систем.
„Со оглед на посебната сила на ова оружје, неговата моќ, тоа ќе биде ставено во служба на стратешките ракетни сили“, рече Путин.
Тој истакна и дека е донесена одлука за масовно производство на системот „Орешник“, пренесува РИА Новости.
Рускиот лидер истакна дека ракетниот систем „Орешник“ кога масовно се користи „против непријателски цели“ има значење на стратешко оружје и е создаден во согласност со најновите технички достигнувања.
„Орешник“ не е средство за масовно уништување, туку високо прецизно оружје. Безбедноста на Русија е обезбедена“, нагласи тој.
Врховниот командант на руските стратешки ракетни сили Сергеј Каракаев исто така предупреди дека „Орешник“ има способност да погодува цели во Европа.
„Врз основа на поставените задачи и дострелот на ова оружје, тоа може да погоди цели низ Европа, што го разликува од другите видови прецизно оружје со долг дострел“, рече Каракајев.
Путин на состанокот во Кремљ им честитал на раководството на Министерството за одбрана и на конструкторите за успешното тестирање на ракетите „Орешник“.
Регион
(Видео) Излизгани возила, застој на автопатиштата, сообраќаен колапс поради снежна бура во Србија
Попладнево во Србија падна снег кој зад себе остави колапс во сообраќајот и предизвика дефекти во електричната мрежа.
Дождот и силните налети на ветерот се претворија во снег во Белград, каде снегот паѓаше со поголем интензитет, што дополнително ја усложни состојбата во сообраќајот и предизвика тотален колапс, пренесуваат тамошните медиуми.
Поради снежни наноси застој има на автопатот од Ниш кон Белград, на делот од патот од Алексинац кон Ражње.
Сообраќајот се одвива отежнато и на автопатот Ниш-Димитровград кај тунелот Банчарево, поради снежни наноси и сообраќајна несреќа во која учествувале патник и товарно возило, стои во написите.
Јавното претпријатие „Патишта на Србија“ ја информира јавноста дека при денешните обилни врнежи од снег на речиси целата територија на Србија, во повеќе случаи товарни возила се излизгале и на тој начин биле блокирани повеќе патни правци, поради што сообраќајот бил во прекин и на автопатот и и на патиштата со низок степен, поради некористење зимски гуми и опрема од страна на неодговорни возачи на тешки моторни возила – шлепери.
ЈП „Патишта на Србија“ апелира особено до возачите на тешки моторни возила и сите други учесници во сообраќајот да не излегуваат на пат без задолжителна зимска опрема, да користат синџири, особено во ридско-планинските предели, да ги почитуваат ограничувањата на брзината, сообраќајните сигнали и да ја приспособат својата брзина на условите на патот.
На целата територија на Република Србија, механизацијата е достапна на терен 24 часа, а екипите на патиштата се во готовност и подготвени да интервенираат за да се обезбеди безбедно одвивање на сообраќајот, пишуваат српските медиуми.