Свет
Кој беше Алексеј Навални

Рускиот опозициски лидер Алексеј Навални почина во затворoт во кој ја издржуваше казната, одекна во медиумите во светот.
Навални, роден на 4 јуни 1976 година, беше руски опозициски лидер, адвокат и политичка и јавна личност, познат по истрагите за корупцијата во Русија. Тој важеше за главен противник на руското раководство на чело со Владимир Путин.
Тој е основач на Фондот за борба против корупцијата, кој ги обединува проектите Smart Voting, Syndicate Navalny, RosPil, RosZKH, RosYama, RosVybori.
На изборите за градоначалник на Москва во 2013 година тој освои 27,24 отсто од гласовите губејќи од Сергеј Собјанин (Обединета Русија). Од ноември 2013 година е на чело на Централниот совет на политичката партија Русија на иднината.
Во декември 2016 година тој ја објави својата намера да учествува на претседателските избори во Русија, кои се одржаа во март 2018 година. Според весникот „Ведомости“, тој всушност бил единствениот политичар што водел изборна кампања во 2017 година, но на 25 декември 2017 година ЦИК одби да го регистрира поради незавршената судска постапка.
Со Антикорупцискиот фонд беше главен иницијатор на масовните протести одржани во 2017-2018 година во Русија.
Тој се соочи со голем број тужби поднесени против него, кои ги сметаше за политички мотивирани. Во два случаја Европскиот суд за човекови права пресуди во корист на Навални.
Во 2009 година весникот „Ведомости“ го прогласи Навални за личност на годината. Во 2012 година магазинот „Тајм“ го вклучи на листата на 100 највлијателни луѓе во светот, а во јуни 2017 година на листата на 25 највлијателни луѓе на интернет. Во 2017 и 2019 година „Ведомости“ го прогласи за политичар на годината. Податоците од истражувачкиот центар „Ромир“, објавени есента 2020 година, покажуваат дека Алексеј Навални е меѓу првите пет јавни личности на кои Русите им веруваат. Тој беше номиниран за Нобеловата награда за мир во 2020 и 2021 година.
На 20 август 2020 година, најверојатно, поради последица од труење, Навални падна во кома. Од 22 август до 20 септември тој се лекуваше во болница во Берлин. Според Организацијата за забрана на хемиско оружје, тој бил отруен со хемиски нервен агенс од групата новичок. По враќањето во Русија, Навални и неговата сопруга беа уапсени на 17 јануари 2021 година за време на пасошка контрола. Труењето на Навални предизвика меѓународен бунт. Европската Унија и Велика Британија сметаат дека за неговото труење се одговорни шестмина високи руски функционери, како и Државниот институт за органска хемија и технологија. Руските власти ги отфрлија таквите тврдења и негираа вмешаност во труењето на Навални.
На 2 февруари 2021 година судот во Москва го осуди Навални на две години и осум месеци затвор прифаќајќи го барањето на обвинителот условната казна од три и пол години да се промени во затвор. Меѓународните организации за човекови права „Амнести интернешнл“ и „Меморијал“, шефовите на западните земји, како и голем број руски и странски медиуми, го коментираа случајот против Навални како политички мотивиран.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
„Рајанер“ го зголемува дозволениот бесплатен рачен багаж

„Рајанер“ ќе ја зголеми максималната големина на багажот што може да се носи во авион бесплатно и да се складира под седиштето за 20 проценти, откако Европската Унија презентираше предлог за нови закони што би дозволиле поголеми димензии.
Нискобуџетната авиокомпанија моментално им дозволува на патниците да земат бесплатен рачен багаж што се вклопува под седиштето, како што е чанта или мал ранец. Максималната големина сега се зголемува од 40x25x20 см на 40x30x20 см.
Иако станува збор за зголемување само од 5 сантиметри во ширина, ова значи дека волуменот на торбата се зголемува од 20 на 24 литри.
И покрај зголемувањето, „Рајанер“ сè уште заостанува зад својот главен конкурент „ИзиЏет“, кој дозволува багаж со димензии 45x36x20 см (32 литри), додека „ВизЕр“ веќе дозволува багаж со димензии 40x30x20 см.
„Рајанер“ изјави дека новите правила ќе бидат имплементирани во наредните недели.
Минатата недела, европратениците предложија патниците да имаат право на багаж со димензии од најмалку 40x30x15 см, како и дополнителен багаж со димензии до 100 см и тежина до 7 кг, без дополнителни трошоци со нивниот авионски билет.
Свет
САД воведоа нови санкции врз Иран и Хезболах

Соединетите Американски Држави воведоа нови санкции врз Иран и неговиот либански сојузник Хезболах, насочени кон високи функционери и мрежи кои помагаат да се избегнат санкциите на САД поврзани со продажбата и транспортот на иранска нафта.
Министерството за финансии соопшти дека неговата Канцеларија за контрола на странски средства „презема мерки против мрежите кои колективно транспортирале и купувале иранска нафта вредна повеќе милијарди долари, од кои дел им користеле на силите Кудс на Иранскиот корпус на револуционерната гарда (IRGC-QF), кој е прогласен за странска терористичка организација“.
Санкциите се насочени и кон бродовите вклучени во транспортот на нафта.
Министерот за финансии Скот Бесент изјави: „Министерството ќе продолжи да воведува мерки против изворите на приходи на Техеран и да го зголемува економскиот притисок за да го наруши (неговиот) пристап до финансиските ресурси што им овозможуваат на неговите дестабилизирачки активности“.
Санкции беа воведени и против неколку високи функционери и еден субјект поврзан со Хезболах поради помагање во избегнувањето на санкциите.
Овој потег ја нагласува посветеноста на попречување на напорите на Хезболах да ги избегне санкциите, според одделот.
Целта на санкциите беше и да се поддржат напорите на новата либанска влада да го ограничи влијанието на терористичката група, особено затоа што актери како финансиските институции на Хезболах продолжуваат да ја поткопуваат веќе кревката економија на Либан, соопшти одделот.
Свет
Путин разговараше со Трамп: „Нема да се откажам од своите цели во Украина“

Претседателот на САД, Доналд Трамп, и рускиот претседател, Владимир Путин, разговараа по телефон речиси еден час за војната во Украина, при што двајцата изразија подготвеност да бараат решение преку преговори, објави советникот на Кремљ, Јуриј Ушаков.
За време на разговорот, Трамп повторно го отворил прашањето за брзо завршување на војната во Украина, но Путин јасно ставил до знаење дека Русија нема да отстапи од своите цели, вклучително и, како што рекол, отстранување на причините што довеле до конфликтот.
„Нашиот претседател нагласи дека Русија ќе ги постигне целите што си ги поставила, а тоа е да ги елиминира познатите причини што доведоа до сегашната конфронтација“, рече Ушаков.
Путин му ги презентирал на Трамп и деталите за неодамнешниот договор со Украина за размена на затвореници и загинати војници и ја изразил подготвеноста на Москва да продолжи со преговорите со Киев.
Ушаков нагласи дека рускиот став е дека мировните преговори за Украина мора да се водат исклучиво меѓу Москва и Киев, без трети страни.