Свет
Кремљ: Безбедносната архитектура на Европа се менува

Кремљ објави дека верува oти на Европа ѝ треба нова безбедносна архитектура и во иднина ќе бара многу напор.
Ова го одговори портпаролот на Кремљ, Дмитриј Песков, на новинарско прашање коментирајќи ја изјавата на францускиот претседател Емануел Макрон дека по војната во Украина, треба да се преиспитаат односите на Европа со Русија.
„Очигледно, поради фактот што безбедносната архитектура на Европа бргу се менува, неопходно е да се изгради нова безбедносна архитектура за Европа, што ќе бара многу напор во иднина“, изјави Песков за новинарите, а пренесува „РИА новости“.
Тој исто така рече дека секоја идна структура треба да ја гарантира руската безбедност преку цел систем на гаранции.
На денешното новинарско прашање за планот за победа на украинскиот претседател Володимир Зеленски за ставање крај на војната со Русија, Песков рече дека Кремљ ќе го проучи доколку има официјални информации за планот.
„Сметаме дека извештаите во медиумите не треба да се анализираат. Доколку информациите за ова се појават во официјални извори, ние, се разбира, внимателно ќе ги испитаме. Има многу контрадикторни и неверодостојни информации по ова прашање. Затоа ние сме многу внимателни во врска со ова“, рече Песков.
Оваа недела украинскиот претседател Зеленски треба да го претстави планот на американскиот претседател Џо Бајден и неговите двајца потенцијални наследници, Камала Харис и Доналд Трамп.
Зеленски патува за САД, каде што утре ќе одржи говор пред членовите на Генералното собрание на ОН. Планот, чии детали Зеленски досега не ги објави јавно, се чини дека е голем поттик за украинскиот претседател во неговите напори да го убеди Вашингтон и другите сојузници да обезбедат дополнителна и уште повеликодушна помош за неговата земја со цел да ја принуди Москва да се стави крај на конфликтот под услови прифатливи за Киев.
Руското Министерство за надворешни работи денеска соопшти дека за време на седумнеделниот напад на Украина врз западниот руски регион Курск загинале најмалку 56 цивили, а 266 биле ранети.
Портпаролот на украинското Министерство за надворешни работи изјави дека Украина се придржува до меѓународното хуманитарно право и не ги таргетира цивилите како дел од упадот во регионот Курск.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Европа разгледува воена тампон зона на украинска територија, објави „Политико“

Европа размислува да поддржи воспоставување тампон зона широка 40 километри на украинска територија како дел од напорите за завршување на војната, објави вчера „Политико“, повикувајќи се на неименувани европски дипломати.
Според нив, европските лидери ја разгледуваат идејата како една од опциите за прекин на огнот или како дел од повоениот договор меѓу украинските и руските сили. Вашингтон во моментов не е вклучен во овие дискусии, велат изворите.
Разговорите за тампон зоната доаѓаат во време кога американскиот претседател Доналд Трамп ги интензивира напорите за постигнување мировен договор. Трамп се сретна со рускиот претседател Владимир Путин на Алјаска на 15 август, а неколку дена подоцна во Белата куќа со украинскиот претседател Володимир Зеленски и европските лидери.
„Сите се обидуваат да дејствуваат што е можно побрзо по прашањето за безбедносните гаранции за да не се предомисли Трамп“, рече еден европски функционер. Предлогот, велат дипломатите, веројатно би вклучувал територијални отстапки од Украина, но не е јасно дали Киев е воопшто отворен за таков план.
Некои европски земји изразија загриженост дека тампон-зоната би можела да направи повеќе штета отколку корист и да ги изложи украинските градови на уште поголем ризик од руски напади. „Не е многу разумно против противник кој не преговара со добра намера“, рече еден од дипломатите, кој зборуваше под услов да остане анонимен.
Во исто време, источните членки на НАТО, вклучително и Полска, се загрижени дека испраќањето голем број војници во Украина би можело да го ослаби присуството на алијансата на исток и да ги направи ранливи на потенцијален руски напад.
Се очекува француските и британските војници да го формираат ‘рбетот на мировните сили, а Париз и Лондон ги охрабруваат другите сојузници да обезбедат воена опрема. Се проценува дека помеѓу 4.000 и 60.000 мировници би можеле да бидат распоредени во Украина за да го следат спроведувањето на мировниот договор. Нивната задача не би била само да патролираат во демилитаризираната зона, туку и да обучуваат украински војници.
Иако Соединетите Американски Држави изјавија дека нема да испраќаат свои мировни трупи, тие изразија подготвеност да обезбедат техничка поддршка. „Сите чекаат лидерите на политиката на Министерството за одбрана да разјаснат колку далеку се спремни да одат, а им дозволуваат на Европејците да ги покажат своите карти“, додаде еден европски функционер.
Додека дипломатските напори продолжуваат, шефот на претседателската администрација, Андриј Јермак, и секретарот на Советот за одбрана, Рустем Умеров, патуваат во Њујорк оваа недела за да разговараат за безбедносните гаранции.
Кремљ постојано го доведува во прашање легитимитетот на Зеленски, а рускиот министер за надворешни работи Сергеј Лавров на 24 август изјави дека Москва нема да го прифати потписот на Зеленски на никакви правни документи, пренесува медиумот.
Фото: принтскрин
Свет
Калас: Имаме 30 дена за дипломатско решение за иранската нуклеарна криза

Западните земји сега имаат 30 дена да најдат дипломатско решение за иранската нуклеарна криза, изјави денес високата претставничка на Европската Унија за надворешна политика и безбедност, Каја Калас.
„Влегуваме во нова фаза од 30 дена, кои навистина мора да ги искористиме за да најдеме дипломатски решенија“, изјави Каја Калас пред почетокот на состанокот на ЕУ во Копенхаген, еден ден откако Европејците одлучија да покренат механизам што повторно ќе воведе меѓународни санкции против Иран во рок од еден месец.
Тоа барање ќе биде разгледано денес од Советот за безбедност на ОН, пренесува Бета-АФП.
Фото: принтскрин
Европа
САД одобрија продажба на оружје на Украина во вредност од 825 милиони долари

Американскиот Стејт департмент одобри продажба на оружје на Украина, чија вредност се проценува на 825 милиони долари, објави Агенцијата за соработка во одбраната и безбедноста на САД (DSCA).
Пакетот вклучува ракети со долг дострел и соодветна опрема што ги побара Киев.
Како што е вообичаено со продажбата на странско оружје, агенцијата соопшти дека Конгресот е известен.
Американските власти велат дека продажбата ќе ги зајакне безбедносните капацитети на Украина и ќе придонесе за нејзината способност да се соочи со сегашните и идните закани, како и да спроведува мисии за самоодбрана и регионална стабилност.
Се вели дека купувањето е финансиски поддржано од САД, Данска, Холандија и Норвешка.
Објавата доаѓа откако Русија изврши повеќе од 600 ракетни и беспилотни напади во среда навечер, што е нејзина најтешко бомбардирање од крајот на јули, и покрај неделите дипломатски напори за прекин на конфликтот.
фото: принтскрин