Свет
Кремљ: Сајбер-војната меѓу Русија и САД е хипотетички можна
Портпаролот на Кремљ, Дмитриј Песков, смета дека хипотетички постои можност за сајбер-војна меѓу САД и Русија, пренесува ТАСС.
Москва му предлагаше на Вашингтон заедно да се борат против сајбер-криминалот, но таа идеја не наиде на прием, рече Песков, коментирајќи ги пишувањата на „Њујорк тајмс“ за интернет-напади на САД врз Русија.
„Претседателот Путин и руската страна повеќепати се обидуваа да иницираат меѓународна соработка за заеднички да се борат против секоја појава на сајбер-криминал. За жал, американските партнери не се одѕваа на таквите предлози,“ посочи Песков.
Тој потврди дека руските стратешки објекти редовно се цел на сајбер-напади од странство, но дека соодветните служби успешно се борат против нив.
Повикувајќи се на непознати извори и бивши владини претставници, „Њујорк тајмс“ во саботата објави дека САД ги засилиле сајбер-нападите врз енергетскиот систем на Русија и дека така ја покажуваат ослучноста на Трамп поагресивно да ги употреби сајбер-алатките.
Трамп ги осуди пишувањата на весникот како предавство на државата.
„Ако претпоставиме дека некои владини одделенија го прават тоа без да го известат шефот на државата, тогаш таа информација ја покажува хипотетичката можност за сајбер-војна и сајбер-акции против Руската Федерација“, посочи Песков.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Белгија издвојува девет милиони евра за украинската енергетска инфраструктура
Белгија ќе додели дополнителна помош од девет милиони евра за да придонесе за поправка на оштетената енергетска инфраструктура во Украина, најави белгиската министерка за развојна соработка, Каролин Генез.
„Преку ОН, Белгија ќе придонесе за поправка на енергетската инфраструктура околу градот Харков, кој сега секојдневно трпи бомбардирање од руската армија. Со воена поддршка, овие средства ќе помогнат да се изгради отпорноста на Украина“, рече министерот, пренесува RTBF.
Според неа, Белгија ќе одвои средства за поддршка на проекти во рамките на Програмата за развој на Обединетите нации, која е специјализирана за економски развој.
Свет
Генералното собрание на ОН го повика Советот за безбедност да ја прими Палестина за членка
Генералното собрание на Обединетите нации ги зајакна правата на Палестина во рамките на организацијата и повика таа да биде прифатена како членка, пренесува Би-Би-Си.
Палестина има статус на земја-набљудувач не-членка од 2012 година, што дозволува некои права помалку од полноправна членка.
За членството може да одлучува само Советот за безбедност на ОН.
САД неодамна ставија вето на кандидатурата за полноправно членство, но гласањето денска може да се смета како гест на поддршка за Палестинците.
Палестинскиот претседател Махмуд Абас ја поздрави резолуцијата, велејќи дека таа ги поддржува палестинските напори за уште едно гласање за ова прашање од страна на Советот за безбедност.
Свет
Шпанија, Ирска и Словенија ќе ја признаат Палестина на 21 мај
Шпанија, Ирска и Словенија планираат симболично да ја признаат Палестинската држава на 21 мај, изјави шефот за надворешна политика на ЕУ, Жозеп Борел.
Тој го потврди датумот во интервју за шпанското јавно радио, откако ирскиот јавен радиодифузен сервис РТЕ објави дека тоа е моментот кога сите три земји планирале да дејствуваат.
Словенечката влада вчера соопшти дека донела декрет за признавање на палестинска држава, што ќе биде внесен во нејзиниот парламент до средината на јуни.
Потоа, најверојатно ќе има повеќе нации што ќе го следат примерот бидејќи и Белгија одлучи да го стори тоа, додаде Борел.