Руските сили ги претрпеа најтешките загуби во 2024 година од почетокот на војната. Вкупните воени загуби достигнаа 434.000 војници, вклучително и приближно 150.000 загинати во борбите во текот на изминатата година, изјави врховниот командант Олександр Сирски во вчерашното интервју за украинскиот медиум ТСН, пренесува Гардијан.

„Путин загуби повеќе во 2024 година отколку во претходните две години војна заедно“, рече Сирски.

До вчерашниот ден Русија загубила вкупно 818.740 војници од почетокот на инвазијата, се наведува во извештајот на украинскиот Генералштаб. Проценката се совпаѓа со проценките на западните разузнавачки агенции и веројатно ги вклучува убиените, заробените, ранетите и исчезнатите. Русија постигна напредок во источна Украина и во регионот Курск во текот на изминатата година, но со големи загуби.

Руските загуби достигнаа рекордни нивоа во ноември и декември, со дневен максимум од 2.030 изгубени војници во ноември, што е највисока дневна загуба од почетокот на руската инвазија во 2022 година. Москва не го открива бројот на своите жртви, иако официјален претставник на Министерството за одбрана неодамна откри дека одделот примил 48.000 барања за идентификација на исчезнатите војници.

Според заедничката истрага на руско Би-би-си и „Медиазоне“, новинарите ги идентификувале имињата на 88.726 руски војници кои загинале за време на инвазијата на Украина. Според овие извори, 2024 година би можела да биде најсмртоносната година на војната, со во моментов повеќе од 20.000 потврдени смртни случаи во изминатите 12 месеци, иако конечните бројки сè уште се собираат.

Во декември, украинскиот претседател Володимир Зеленски откри дека Украина изгубила 43.000 војници на бојното поле од почетокот на инвазијата, тема за која често не разговара. Олександр Сирски на прашањето за украинските загуби генерално одговори, само рече дека тие се многу помали од руските. Доколку продолжи ваквото темпо на руски загуби, се очекува во следните шест месеци да бидат изгубени над еден милион војници.

Осум лица загинаа, а неколку се повредени во пожар што утрово околу 4 часот и 30 минути избувна во дом за стари лица во Велики Борак, во белградската општина Бараево, објави РТС. Пожарот е изгаснат, а во гаснењето учествувале голем број пожарникари и противпожарни возила.

Др. Виолета Николиќ од Итната медицинска помош за РТС изјави дека добиле повик од пожарникари за избувнување на пожар во дом за стари лица во Велики Борак.

Таа наведе дека четири повредени лица се пренесени на токсиколошкото одделение на ВМА, додека на две лица им е укажана помош во Ургентниот центар. На интервенција се упатени четири екипи од Итната медицинска помош, уште две дополнителни екипи од Лазаревац и една од Бараево.

Вршителот на должноста помошник министер и раководител на Секторот за вонредни ситуации, Лука Чаушиќ за РТС изјави дека се претпоставува дека во моментот на пожарот во објектот имало 30 корисници. Како што наведе, Брзата помош згрижила седум повредени и ги пренела во ВМА и Ургентниот центар.

Според него, по пријава во 3 часот и 32 минути, единиците на Секторот за вонредни ситуации веднаш биле испратени на местото на настанот, каде што го затекнале огромен пожар. „Во моментов се уште проверуваме дали има преостанати извори на пожар што би можеле да предизвикаат негово ширење, додека причината ќе се утврди во наредните часови“, рече Чаушиќ.

Тој додаде дека домот за стари лица се наоѓа далеку од фреквентни патишта, но противпожарните екипи брзо пристигнале, а на повредените им била укажана помош во рекордно време. „Ова е голема трагедија, но можеше да биде и многу поголема“, заклучи Чаушиќ.

Околу 70 милиони Американци долж источниот брег на САД се под предупредување за зимско невреме издадено од Националната метеоролошка служба, а прогнозата предвидува до 15 сантиметри снег на повеќето места.

Нова Англија е под предупредување за навлегување на арктичкиот воздух, како и делови од Масачусетс, Њу Хемпшир, Мејн и Конектикат, каде се прогнозира дека снежната покривка ќе достигне 25 сантиметри, пренесе АП.

Марк Ченард, метеоролог од Националната метеоролошка служба рече дека дури 70 милиони жители ќе бидат под некаков вид предупредување за зимско невреме во наредните денови, вклучително и Нова Англија и Средниот Атлантик.

Во Вашингтон се предвидува студено време во понеделник, поради што церемонијата на инаугурација на новоизбраниот претседател Доналд Трамп ќе биде преместена во затворен простор, во американскиот Капитол.

„Во понеделник ќе биде студен ден во Вашингтон, тоа е сигурно“, рече Ченард, кој рече дека градот се прогнозира да има минимална температура од -7 Целзиусови степени, со удари на ветер од 48 километри на час.

Во големите градови како Филаделфија, Њујорк и Бостон може да паднат до 10 сантиметри снег во текот на ноќта, а најобилните врнежи се очекуваат надвор од градовите.

Градоначалникот на Њујорк, Ерик Адамс, ги повика жителите на градот да се возат со метро и автобуси доколку мораат да патуваат за време на невремето, за да им олеснат на екипите да ги расчистат улиците.