Свет
Курц повторно вети борба против политичкиот ислам по нападот во Виена

По терористичкиот напад во Виена, австрискиот канцелар, Себастијан Курц, изјави дека очекува Европа да се откаже од, како што рече, погрешно сфатената толеранција, повикувајќи на напори во ЕУ за борба против политичкиот ислам, пренесува РТ.
„Очекувам крај на погрешно разбраната толеранција… во сите европски земји“, рече Курц за германски „Ди Велт“, додавајќи дека идеологијата на политичкиот ислам ја загрозува нивната слобода, како и самиот европски модел на живот.
Курц тврди дека ова прашање е доволно сериозно за да се одговори на европско ниво, додавајќи дека веќе ја покренал оваа тема во разговор со многу европски лидери и планира да почне борба против политичкиот ислам, кој е ставен како точка на агендата на претстојните самити на ЕУ.
Зборувајќи за австриските медиуми, Курц исто така ја нарече „дефинитивно погрешна“ одлуката за условна слобода на напаѓачот од Виена. Претходно, министерот за внатрешни работи на Австрија, Карл Нехамер, призна дека исламистичкиот радикал кој уби четири лица и повреди уште 23 лица во понеделникот во Виена „ја измамил“ програмата за дерадикализација надгледувана од Министерството за правда.
Напаѓачот претходно бил осуден на 22 месеци затвор во април 2019 година поради поврзаност со Исламска држава и обид да им се придружи на терористите во Сирија. Сепак, тој бил ослободен само осум месеци подоцна бидејќи веќе не бил сметан за закана.
„Да не беше ослободен од затвор, ваков терористички напад не можеше да се случи“, призна Курц.
Сепак, канцеларот нагласи дека има само еден виновник за овој варварски, кукавички исламистички терористички напад, а тоа е самиот напаѓач.
По нападот во понеделникот, Курц очигледно се обиде да ги смири потенцијалните тензии велејќи дека тоа не е „судир меѓу христијани и муслимани, или меѓу Австријци и мигранти“, туку меѓу „цивилизацијата и варварството“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Данската премиерка: Русија нема да застане кај Украина

Украина се бори за цела Европа, додека Русија не покажува знаци дека сака мир и дека ќе застане кај Украина, изјави денес данската премиерка, Мете Фредриксен во Архус.
„Мора да ја зајакнеме нашата поддршка за Украина бидејќи таа се бори за сите нас“, рече Фредриксен на заедничката прес-конференција со претседателката на Европската комисија, Урсула фон дер Лајен.
По повод преземањето на ротирачкото претседателство, данската влада го прими Колеџот на комесари на Европската комисија во Архус, вториот по големина град во Данска.
„Ни секунда не верувам дека Путин сака мир и има намера да застане кај Украина, затоа мора да ја ставиме Украина во најсилната можна позиција“, рече Фредриксен, додавајќи дека е потребно да се продолжи со работата за слабеење на руската економија, зајакнување на санкциите и запирање на увозот на руски гас.
Претседателката на Комисијата, фон дер Лајен, изјави дека одлуката на САД делумно да ја суспендира воената помош за Украина покажува дека ЕУ мора да ја засили својата поддршка за нападнатата земја.
Фон дер Лајен ги повика земјите-членки да ја користат кредитната програма SAFE, вредна 150 милијарди евра, за воена помош за Украина, преку купување воена опрема за Украина или инвестирање во украинската одбранбена индустрија.
Данската премиерка додаде дека нејзината земја почнала да инвестира во производство на оружје и друга воена опрема на украинска територија уште порано.
„Функционира многу добро, бидејќи тие произведуваат побрзо, подобро и поевтино од сите нас“, рече Фредриксен, додавајќи дека Украинците сè уште имаат 40 проценти неискористен капацитет за производство на оружје и опрема.
Таа, исто така, оцени дека запирањето на американската помош за Киев би значело „сериозен удар за Украина, Европа и НАТО“.
(Фото: ЕПА)
Свет
Путин вели дека денес ќе разговара со Трамп

Рускиот претседател, Владимир Путин, денес изјави дека подоцна во текот на денот ќе разговара со својот американски колега Доналд Трамп.
Ова ќе биде шестиот јавно познат разговор меѓу двајцата лидери откако Трамп се врати во Белата куќа во јануари, а ќе се одржи во услови на досега неуспешни напори на Соединетите Американски Држави да преговараат за прекин на огнот во Украина.
Двајцата претседатели последен пат разговараа на 14 јуни, а главната тема на нивниот разговор беше Иран.
Европа
Украина припаѓа на Европската Унија, му рече данската премиерка на Зеленски

Претседателот на Украина, Володимир Зеленски, пристигна во Орхус, западна Данска, каде што ќе присуствува на одбележувањето на почетокот на данското претседателство со Советот на Европската Унија.
Според најавата на данската влада, Зеленски ќе разговара со премиерката Мете Фредериксен, претседателката на Комисијата, Урсула фон дер Лајен, и со претседателот на Европскиот совет, Антонио Коста.
Тие ќе разговараат за поголема воена поддршка за Украина, соработка со украинската одбранбена индустрија и нови санкции против Русија.
„Украина припаѓа на Европската Унија, тоа е во интерес и на Данска и на Европа. Затоа данското претседателство ќе направи сè што може за да ѝ помогне на Украина на патот кон членство во ЕУ“, рече Фредериксен.
Данската премиерка истакнува дека ЕУ мора да ја зајакне Украина и да ја ослаби Русија.
„Украина е клучна за безбедноста на Европа. Мора да го зголемиме притисокот врз Русија“, рече Фредериксен.