Свет
Лавров: Имаме докази дека во Суми имало состанок на воени претставници

Русија има докази дека во објектот во Суми, кој беше погоден од руски ракетен напад, се одржал „состанок“ на украинските воени лидери со нивните западни колеги, изјави денес рускиот министер за надворешни работи Сергеј Лавров.
Во интервју за „Комерсант“, Лавров рече дека Русија „има информации за тоа кој бил во објектот што бил погоден во Суми“, пренесе ТАСС.
„Имаше уште една средба\ на украинските воени лидери со нивните западни колеги, кои се преправија дека се платеници или не знам кои. Таму има војници на НАТО и тие беа во директна контрола“, рече Лавров.
Рускиот министер изјави дека „сите знаат“.
„Њујорк тајмс“ неодамна објасни како Американците одиграа одлучувачка улога во нападите врз Русија (од Украина) уште од самиот почеток. Без таа улога, повеќето ракети со долг дострел воопшто немаше да ги напуштат своите бази“, рече Лавров.
Како што претходно денес објави украинската регионална воена администрација во градот Суми, бројот на убиени Украинци во вчерашниот руски напад врз тој град се искачи на 34, а меѓу жртвите има две деца, додека 120 лица се ранети, меѓу кои 15 деца.
Во неделата, руските сили започнаа напад врз центарот на Суми користејќи две балистички ракети, а нападот беше осуден од западните претставници, вклучувајќи ја претседателката на Европската комисија, Урсула фон дер Лајен, и американскиот претставник Кит Келог.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Фридрих Мерц не ја доби поддршката за нов канцелар на Германија

Конзарвативниот германски лидер на Христијанско-демократската унија (CDU/CSU) Фридрих Мерц не успеа да го обезбеди потребното мнозинство во Бундестагот за да стане германски канцелар во првиот круг од гласањето, задавајќи изненадувачки удар на неговата нова коалиција со социјалдемократите.
69-годишниот Мерц, кој ја предводеше Христијанско-демократската унија до федералната победа во февруари и се договори за коалиција со социјалдемократите (SPD), доби само 310 гласови во долниот дом на парламентот, изјави претседателката на Бундестагот, Јулија Клокнер. Му беа потребни најмалку 316 гласови за да биде избран во првиот круг.
Клокнер ја прекина седницата за да можат парламентарните групи да одржат консултации за следните чекори.
Бундестагот сега има 14 дена да го избере Мерц или друг кандидат за канцелар со апсолутно мнозинство, а нов круг гласање би можел да се одржи уште денес.
Христијанските демократи на Мерц ги добија изборите во февруари со 28,5 проценти од гласовите, но им треба барем еден коалициски партнер за да формираат мнозинска влада.
Вчера тие потпишаа договор за коалиција со социјалдемократите, кои освоија само 16,4 проценти на изборите, што е најслабиот резултат во историјата на партијата од крајот на Втората светска војна.
Регион
Украл автомобил со мало девојче внатре: драма на бензинска пумпа во Србија

Полицијата во Обреновац од синоќа бара „Пунто“ кое еден маж го украл од бензинска пумпа, забрзал и избегал, објави „Телеграф.рс“.
Во моментот на кражбата, во автомобилот имало 12-годишно девојче.
Како што дознава Телеграф.рс, 26-годишна девојка дошла со „пунтото“ на нејзиниот татко на бензинската пумпа во Обреновац. Во еден момент, таа отишла да плати за бензин и ги оставила внуката и клучевите од автомобилот во возилото. Непознат маж го искористил невниманието на девојката, влегол во автомобилот и избегал. Малото девојче кое било во возилото успеало да скокне од него.
Како што дознава Телеграф, детето не било повредено. За случајот беше информирано и обвинителството.
Полицијата се обидува да го идентификува крадецот врз основа на снимка.
Свет
Министерка на Трамп до Харвард: Нема потреба повеќе да барате владини пари, нема да ги добиете

Министерството за образование на САД во понеделник го извести Универзитетот Харвард дека ги замрзнува милијардите долари наменети за идни истражувачки проекти и други форми на помош сè додека најстариот и најбогат универзитет во САД не се согласи со низа барања од администрацијата на Трамп.
Ова е само најновиот потег на администрацијата на Трамп да користи финансиски притисок за да ги принуди институциите, од адвокатски фирми до универзитети, да спроведат големи промени или да ризикуваат губење милијарди долари во федерални грантови и договори, објавува Ројтерс.
Во писмо до Харвард, министерката за образование Линда Мекмахон напиша дека универзитетот мора да се справи со загриженоста за антисемитизмот на кампусот, универзитетските политики што ја земаат предвид расата на студентите, како и поплаките од администрацијата дека универзитетот се откажал од својата потрага по „академска извонредност“, а воедно вработил релативно мал број конзервативни наставници.
„Ви пишуваме за да ве информираме дека Харвард повеќе не треба да бара финансирање од федералната влада, бидејќи нема да го добие“, напиша министерката Мекмахон.
Харвард соопшти дека писмото на министерката дополнително ги зајакнува барањата за воведување „невидена и несоодветна контрола“ врз универзитетот и вклучува нови закани за „незаконско“ задржување на средства наменети за истражувања што спасуваат животи.
„Харвард, исто така, ќе продолжи да се брани од незаконско пречекорување на владините мерки насочено кон задушување на истражувањата и иновациите што обезбедуваат поголема безбедност и заштита за Американците“, изјави портпаролот на универзитетот.
Замрзнувањето на идното финансирање претставува делумна промена во тактиката на администрацијата на Трамп, чии претходни обиди за замрзнување на средствата што веќе им се доделени на универзитетите покренаа правни прашања.
Трамп го нападна Харвард поради наводите за антисемитизам на кампусот за време на пропалестинските протести. Тие протести избувнаа по воената офанзива на американскиот сојузник Израел во Газа, која следеше по нападот врз Израел од страна на палестинските милитанти Хамас во октомври 2023 година.