Свет
Лавров: Ја обновуваме соработката со САД, приемот на Украина во НАТО е закана

Сергеј Лавров, министерoт за надворешни работи на Русија, кој беше дел од делегацијата во Ријад, на прес-конференцијата рече дека Русија и САД се договориле да создадат услови за целосно обновување на соработката меѓу двете земји.
Лавров вели дека за време на средбата било забележано дека Доналд Трамп бил „првиот од западните лидери“ кој изјавил дека „воведувањето на Украина во НАТО е една од најголемите грешки на Бајден“.
Тој додава дека Путин во неколку наврати објаснувал дека проширувањето на НАТО и приемот на Украина во алијансата би претставувале „директна закана“ за Русија.
„Секое појавување на вооружените сили под некои други знамиња не менува ништо. Ова, се разбира, е целосно неприфатливо“, вели тој.
Лавров изјави дека руската и американската делегација на разговорите во Ријад „не само што се слушале туку и се слушнале“ и најави претстојно отворање на амбасади во двете земји.
Рече дека двете страни се договориле да се обезбедат најбрзо можно именување амбасадори во двете земји и отстранување на бариерите што американската администрација, особено онаа на претходниот претседател Џо Бајден, долги години ги поставуваше меѓу дипломатските претставништва.
Тој додаде дека заемното присуство на амбасадите било „практично договорено“, односно дека двете страни се договориле дека треба да ги решат прашањата за функционирањето на дипломатските претставништва, пренесува Гардијан.
Ги оцени разговорите меѓу двете делегации како многу корисни.
„Јас ги имам сите причини да верувам дека американската страна ја разбира нашата позиција“, вели тој. Лавров нагласи дека двете страни се договориле што е можно поскоро да го започнат процесот на мировни преговори за Украина.
Тој изјави дека Русија ќе почека САД да ги потврдат своите претставници за преговорите, а потоа ќе назначи свои. Лавров потврди дека договорените точки создаваат услови за поширока соработка меѓу САД и Русија, вклучително и продолжување на консултациите за геополитички прашања, како и отстранување на вештачките бариери на патот кон заемно корисна економска соработка, пренесува Танјуг.
Тој исто така посочи дека постои заедничка желба да се најдат решенија за војната во Украина. Лавров рече дека ги информирал своите американски колеги дека е неприфатливо за Русија испраќањето странски контингент од земјите на НАТО во Украина, пренесе РИА Новости.
„Појавувањето на вооружените сили од истите земји на НАТО, но под странско знаме, под знамето на Европската унија или под национални знамиња, не менува ништо во овој поглед. Ова е, се разбира, е неприфатливо за нас“, рече Лавров.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Германија најавува промени: ја зголемува минималната плата по час на 14,60 евра

Германија постепено ќе ја зголемува минималната плата по час на 14,60 евра од сегашните 12,82 евра до 2027 година, според предлозите на владината комисија, кои беа објавени денес.
Планирано е минималната плата по час да се зголеми на 13,90 евра на почетокот на 2026 година, а од минатата година, Германија има највисока минимална плата во Европската унија, по Луксембург, кој пропишува месечен минимум од 2.638 евра.
Три други земји од ЕУ имаат национална минимална плата над 2.000 евра месечно – Белгија, Холандија и Ирска, објавува Ројтерс.
Овој предлог на комисијата, која ја сочинуваат работодавачи и претставници на синдикатите, мора да го спроведе германското Министерство за труд.
Свет
Рама: Велика Британија e во многу темна состојба по Брегзит

Албанскиот премиер Еди Рама ја критикуваше британската политика за азил, тврдејќи дека земјата е „во многу темна состојба“ по Брегзит.
Во интервју за Гардијан, Рама ја обвини Велика Британија дека бара „места за испраќање имигранти“ инсистирајќи на формирање центри во трети земји, во кои би ги испраќале одбиените баратели на азил кои ги исцрпиле сите законски опции, објавува „Политико“.
Британскиот премиер Кир Стармер потврди минатиот месец дека Велика Британија преговара со други земји за овој план, но не кажа во кои земји. Стармер го објави ова за време на неговата прва официјална посета на Албанија.
Рама потоа рече дека Албанија сигурно нема да биде дел од тој план, бидејќи е „лојална на договорената соработка со Италија“.
„Фактот дека ова не само што е замисливо денес, туку веќе се случува, не е поради тоа што Стармер или Риши Сунак прават нешто скандалозно, туку затоа што Велика Британија е во многу темна состојба“, изјави Рама за Гардијан.
Албанскиот премиер изјави дека предлозите на Стармер се дел од „работите што се кажуваат, пишуваат или се прифаќаат како нормален дел од дискурсот во денешна Британија“ и посочи дека пред Брегзит тоа „би било целосно неприфатливо, смешно и срамно“.
Медиумот анализира дека за време на претходната конзервативна влада на Велика Британија, Лондон и Тирана потпишаа заедничка изјава и формираа работна група за борба против нелегалната миграција, што доведе до враќање на повеќе од 1.000 албански државјани од Велика Британија.
И покрај ова, односите меѓу двете земји честопати беа затегнати поради реториката на политичарите во Лондон за тоа како албанските баратели на азил ја „напаѓаат“ Велика Британија.
На крајот од интервјуто, Рама рече дека Стармер е „многу пристојна и прекрасна личност“ и јасно стави до знаење дека британскиот премиер јавно не побарал Албанија да се приклучи на неговата програма.
Регион
Зелено светло за Бугарија – од 1 јануари 2026 година може да го воведе еврото

Во четвртокот, Бугарија доби зелено светло од лидерите на Европската Унија за воведување на еврото од 1 јануари 2026 година.
Лидерите, собрани на самитот на ЕУ во Брисел, го поддржаа предлогот на Европската комисија да ѝ се дозволи на Бугарија да стане 21-ва членка на еврозоната и да го замени левот со евро, откако веќе планираше да го стори тоа во 2024 година, но беше одбиена.
Оваа балканска земја е членка на ЕУ од 2007 година и е првата земја што може да го воведе еврото по Хрватска во 2023 година.
Европскиот парламент и Европската централна банка (ЕЦБ) сè уште треба да бидат консултирани за потребните законски измени пред Бугарите да можат да плаќаат во евра, но тие чекори се сметаат за формалност.
Бугарија, според написите во медиумите од регионот како една од најсиромашните земји на ЕУ, останува на дното на листата од 27 членки во однос на бруто домашниот производ (БДП) по глава на жител, иако стапките на раст се повисоки од другите земји.
Покрај релативно ниските и стабилни стапки на инфлација, критериумите за пристапување вклучуваат стабилност на цените, здрави јавни финансии и стабилни девизни курсеви.
Комисијата неодамна изјави дека очекува стапка на инфлација од 3,6 проценти за Бугарија оваа година и 1,8 проценти во 2026 година, што доведе до позитивен рејтинг за Софија.
Во Бугарија, воведувањето на еврото беше проследено со жестоки протести. Во февруари, националистите запалија оган пред влезот на претставништвото на ЕУ во Софија и истурија црвена боја на стаклената фасада на зградата. Тие фрлаа молотови коктели и јајца.
Минатиот месец, поддржувачите на проруските и националистичките партии демонстрираа во главниот град Софија и во други градови, барајќи левот да се задржи поради стравувањата дека еврото ќе поттикне зголемување на цените.
Противниците на еврото собраа 604.000 потписи во корист на референдум за воведување на заедничката валута, но бугарскиот парламент го отфрли референдумот двапати – во 2023 година и во мај 2025 година.
Според анкетата спроведена од бугарскиот институт Мјара кон средината на мај, повеќе од половина од сите возрасни (54,9%) се противат на воведувањето на заедничка валута во 2026 година, додека стабилна третина (34,4%) се за приклучување кон еврозоната следната година, анализираат медиумите.