Канадскиот премиер Џастин Трудо одржа прес-конференција откако на полноќ по Вашингтон стапија на сила долгоочекуваните царини од 25 отсто на Трамп за Канада и Мексико.

„Денес Соединетите Држави започнаа трговска војна против Канада. Нејзиниот партнер и најблизок сојузник, нивниот најблизок пријател“, рече Трудо.

„Канаѓаните се разумни и пристојни, но ние нема да се откажеме од борбата, не кога е во прашање нашата земја и благосостојбата на сите во неа“, најави тој.

Потврди дека и канадските контратарифи стапиле на сила паралелно со американските тарифи.

„Канада ќе воведе царини од 25 отсто на стоки од САД во вредност од 155 милијарди долари, почнувајќи со царини за стоки во вредност од 30 милијарди долари веднаш, и царини за преостанатите 125 милијарди долари за стоки за 21 ден“, објасни тој.

Тој рече дека Канада планира да ги оспори „незаконските дејствија“ на САД со поднесување барање за решавање спор до Светската трговска организација, предупредувајќи дека Вашингтон го прекршил канадско-американскиот договор за слободна трговија.

Тој најави дека Канада ќе ги задржи царините за американските стоки додека САД не ги отстранат царините. Потврди дека разгледува и други опции за одговор освен контратарифи доколку Трамп не отстапи. Тој директно и се обрати на американската јавност.

„Ние не го сакаме ова, но вашата влада одлучи да ви го направи“, нагласи тој и додаде дека пазарите утрово се во пад и ги предупредува Американците дека инфлацијата во САД ќе се зголеми.

Тој рече дека трговската војна „пред се ќе им наштети на американските семејства“. „Нема апсолутно никакво оправдување или потреба за овие тарифи“, рече тој.

Истакна дека воведувањето тарифи го поткопува договорот што тој и Трамп го направија за справување со ширењето на фентанил. Тој повтори дека тврдењето на Трамп дека Канада не сака да се бори против дрогата е „целосно лажно“.

Тој рече дека сега сака директно да разговара со Трамп, истакнувајќи дека двајцата направиле „одлични работи заедно“ во минатото.

„Сега треба да работиме заедно за да обезбедиме уште поголем просперитет за северноамериканците“, рече тој.

„Нашите противници ширум светот сакаат да не видат како двајца пријатели се караме“, рече тој, додавајќи дека е време за соработка. Најави дека владата ќе ги искористи сите алатки што ги има за да им помогне на Канаѓаните да ја надминат оваа бура, од проширување на поддршката за луѓето кои ќе ги загубат своите работни места до помагање на бизнисите да преживеат.

„Без разлика колку долго ќе трае ова, федералната влада ќе биде со вас“, им вети тој на Канаѓаните, додавајќи дека Канада „немилосрдно ќе се бори“ да ја заштити својата економија.

Трудо очекува да разговара со Трамп во наредните денови.

„Она што тој сака е да го види целосниот колапс на канадската економија. Затоа што тоа ќе им олесни да не анектираат“, предупреди Трудо, но исто така рече дека тоа „никогаш нема да се случи“.

„Канада никогаш нема да биде 51-та држава“, продолжи тој.

Трудо призна дека ова ќе биде тешко време за Канада, но смета дека најважно е Канаѓаните да останат обединети. Тој повтори дека Канаѓаните се „повредени, лути и фрустрирани“.

Се осврна и на фактот дека американската национална химна била исвиркана на хокеј натпревар во Канада. Тврди дека свирежите не биле насочени кон американските хокеари, туку кон американската политика.

Откако украинскиот претседател Володимир Зеленски изрази подготвеност за мировни преговори под водство на американскиот претседател Доналд Трамп, стигна реакцијата на Илон Маск.

„Важно е да се дејствува, а не да се зборува. Ќе видиме какви акции ќе следат“, рече Маск, коментирајќи ја изјавата на Зеленски.

Зеленски претходно изјави: „Би сакал да ја повторам посветеноста на Украина за мир. Никој од нас не сака бескрајна војна. Украина е подготвена да седне на преговарачка маса што е можно поскоро за да се доближи траен мир. Никој не сака мир повеќе од Украинците“.

Украинскиот претседател истакна дека тој и неговиот тим се подготвени да работат под силно водство на претседателот Трамп за да се постигне мир.

Зеленски, исто така, изрази благодарност за американската помош досега и жалење за исходот од средбата во Овалната соба кога дојде до расправија со претседателот на САД.

Американскиот претседател Доналд Трамп му рекол на својот украински колега Володимир Зеленски за време на расправијата во Белата куќа дека „нема карти во рацете без Америка“.

Би-Би-Си во својата кратка анализа пишува дека реалноста сега се чини станала јасна, неколку часа откако Вашингтон ја прекина сета воена помош за Украина.

„Во еден твит, Зеленски попушти – барем кога станува збор за американскиот претседател, ако не и за Русија. Сепак, тој изрази подготвеност да размисли за делумен прекин на огнот – во воздух и во море – доколку Москва го стори истото“, пишува дописникот на Би-Би-Си за Европа, Дени Аберхард.

Зеленски предмалку на „Икс“ напиша дека е подготвен за договор предводен од САД што е можно поскоро и изрази жалење за расправијата во Овалната соба за време на состанокот со Трамп и неговиот потпретседател Џеј Ди Венс.

Тој повторно се заблагодари на Америка, конкретно спомнувајќи го Трамп, за нејзината претходна помош и рече дека е подготвен да потпише договор со САД за минерали.

„Украина издржа тригодишна сеопфатна инвазија на нејзиниот непријател Русија. Но, дејствијата на сојузниците ја оставија разоткриена нејзината слаба страна – радикалната промена во надворешната политика на САД под претседателот Трамп“, заклучува Би-Би-Си во својата анализа.