Свет
Лекар силувал и сексуално злоставувал 299 деца во текот на три децении: во Франција започна неговото судење

Во Франција денеска почна судењето на поранешниот лекар Жоел Ле Скварнек, обвинет за силување или сексуално злоставување на 299 луѓе, главно деца, кои беа негови пациенти повеќе од три децении.
За време на четиридневното судење, кое се одржува во градот Ван во Бретања, 74-годишниот Ле Скуарнек ќе се соочи со стотици свои жртви, пренесува АП.
Доколку биде прогласен за виновен, му се заканува затворска казна до 20 години, покрај 15-годишната казна што веќе ја отслужува откако беше прогласен за виновен во 2020 година за силување на дете. Адвокатот на лекарот, Максим Тесије, пред судот изјави дека неговиот клиент ја прифаќа одговорноста за повеќето обвиненија против него.
Некои од жртвите на Ле Скуарнек не се сеќаваат на нападот бидејќи во тоа време биле под анестезија. Многу жртви, иако не се сеќавале на нападите, опишуваат дека се чувствувале депресивно, иако не ја знаеле причината за тоа.
Случајот со поранешниот лекар почна да се расплетува во 2017 година, кога шестгодишно девојче кое живее до него рече дека тој ја допрел низ оградата меѓу нивните имоти.
Потоа следеше претрес во куќата на Ле Скуарнек при што беа откриени повеќе од 300.000 фотографии, 650 видео фајлови со педофилска содржина, како и дневници во кои тој детално ги опишал своите активности, покажуваат судските документи.
Тој беше осуден во 2020 година за силување и сексуален напад на четири деца, вклучително и две негови братучеди, и беше осуден на 15 години затвор.
На судењето во Ван ќе бидат разгледани случаите на силување извршени од него во периодот од 1989 до 2014 година против 158 мажи и 141 жена, кои во тоа време во просек имале 11 години.
Лекарот сексуално злоставувал и момчиња и девојчиња кога биле сами во болничките соби, покажуваат документите од истрагата.
Ле Скуарнек веќе еднаш во 2005 година беше осуден за поседување материјал за злоупотреба на деца и доби условна казна од четири месеци, но и покрај тоа следната година беше назначен за општ лекар во болница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Шахта во Њујорк експлодира неколку секунди откако по неа помина жена со деца

Безбедносна камера во американскиот град Паукипси, Њујорк, снимила драматичен момент кога капак на шахта експлодирал неколку секунди откако покрај неа поминала жена со количка и две деца, објави Би-Би-Си.
На видеото се гледа како жена турка количка и држи дете за рака додека оди по улица. Во моментот кога се оддалечени само неколку чекори има силна експлозија и од земјата избива оган и чад.
Според соопштението на противпожарната служба во инцидентот нема повредени, но во неколку згради во блокот била откриена висока концентрација на јаглерод моноксид.
„Жителите од околните згради се евакуирани додека нивото на гас не се сведе на безбедно ниво“, соопштија пожарникарите.
Причината за експлозијата се уште не е официјално потврдена, но се сомнева дека има технички дефект во електричната или гасната инфраструктура под коловозот.
Свет
Објавен мистериозниот портрет на Трамп кој Путин му го подари на американскиот претседател

Американската телевизиска мрежа Си-Ен-Ен го објави портретот што рускиот претседател Владимир Путин му го испрати на подарок на американскиот претседател Доналд Трамп во март.
На него е претставен американскиот претседател по обидот за атентат, а автор на портретот е рускиот уметник Никас Сафронов.
Сликата го покажува Трамп со крената тупаница и траги од крв на лицето – потсетување на моментот на атентатот за време на настап во кампањата во Пенсилванија на 13 јули 2024 година.
Зад него се вее американско знаме, а во позадина се видливи Статуата на слободата и Менхетен во Њујорк.
Свет
Зеленски: Спремни сме на директни разговори со Русија

Украинскиот претседател, Володимир Зеленски, изјави дека Украина е подготвена за директни разговори со Русија по прекинот на огнот
„Подготвени сме да седнеме во кој било формат“, изјави украинскиот претседател за новинарите на брифинг.
Да потсетиме дека вчера и рускиот претседател Владимир Путин изјави дека е подготвен за директни преговори со Киев.
Во изјавата за новинарите, Путин рече дека би било можно директно да се разговара со Киев за прекин на нападите врз цивилната инфраструктура.
„Имаме позитивен став кон прекинот на огнот“, рече Путин, мислејќи на одлуката на Русија да спроведе изненадувачки 30-часовен Велигденски прекин на огнот.