Свет
Летото 2023 година е најжешко во историјата, еден податок е особено алармантен

Летото во 2023 година беше најжешкото досега забележано, бидејќи климатската криза и феноменот Ел Нињо ги зголемија температурите и предизвикаа екстремни временски прилики ширум светот.
Во јуни, јули и август, просечната глобална температура достигна 16,77 степени Целзиусови, што беше 0,66 степени над просекот од 1991 до 2020 година.
Податоците од Службата за климатски промени на ЕУ, Коперник, покажаа дека август бил околу 1,5 степени потопол од прединдустрискиот просек за периодот од 1850 до 1900 година.
Океаните беа особено жешки во последните месеци, бидејќи секој ден во август глобалната просечна температура на површината на морето го надмина претходниот рекорд поставен во март 2016 година, кога се случи и Ел Нињо.
Температурата во северниот дел на Атлантскиот Океан на 31 август достигна нов рекорд од 25,19 степени Целзиусови.
„Глобалните температурни рекорди продолжуваат да паѓаат во 2023 година, со најтоплиот август по најтоплиот јули и јуни, што доведе до најтоплото бореално лето во нашите рекорди од 1940 година. Наодите се засноваат на компјутерска анализа на милијарди мерења од сателити, бродови, авиони и метеоролошки станици ширум светот“, рече претставничката на Службата за климатски промени на ЕУ, Саманта Бургес.
Топлотните бранови, пожарите и поплавите уништија животи и средства за живот низ целиот свет, од Северна и Јужна Америка, до Европа, Индија, Јапонија и Кина, пишува британскиот портал.
Професорот Марк Маслин од Универзитетскиот колеџ во Лондон рече дека 2023 година е година во која климатските рекорди не само што се уриваат, туку и се разорени.
„Екстремните временски услови сега се вообичаени и се влошуваат секоја година – тоа е повик за будење до меѓународните лидери брзо да ги намалат емисиите на јаглерод. Да се надеваме дека оваа порака ќе дојде од Cop28 овој декември и дека акцијата навистина ќе се случи“, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Кина го губи „Тик-ток“ во САД, „Бајт денс“ останува со мал удел

Американскиот претседател Доналд Трамп потпиша уредба со која се потврдува договорот за одвојување на „Тик-ток“ од кинеската компанија „Бајт денс“ и пренос на мнозинскиот удел во рацете на американски инвеститори.
Според планот, конзорциум предводен од софтверскиот гигант „Оракл“ ќе управува со американските операции на „Тик-ток“, ќе ги чува податоците во домашни сервери и ќе добие лиценца за алгоритмот што препорачува содржини. Очекувањата се американските инвеститори да држат околу 80 отсто од уделите, додека „Бајт денс“ ќе остане со минорен дел.
„Тик-ток“ во САД има околу 180 милиони корисници, а со овој договор платформата ќе продолжи да биде достапна под американска контрола и построг надзор. Од администрацијата на Трамп велат дека целта е заштита на националната безбедност и податоците на корисниците.
Свет
Трамп: Нема да дозволам Израел да го анектира Западниот Брег

Американскиот претседател Доналд Трамп изјави дека нема да дозволи Израел да го анектира Западен Брег, одбивајќи ги барањата на дел од крајно десните израелски политичари за проширување на израелскиот суверенитет врз оваа територија.
„Не, нема да дозволам. Тоа нема да се случи. Доста е, време е ова да запре“, рече Трамп во Белата куќа, објаснувајќи дека темата ја покренал по телефонскиот разговор со премиерот Бенјамин Нетанјаху за состојбата во Појасот Газа.
Притисокот за анексија доаѓа од дел од десното крило на коалицијата на Нетанјаху, кое бара формално воведување на израелскиот суверенитет врз Западен Брег. Овие барања предизвикуваат силна загриженост кај арапските лидери, од кои дел се сретнаа со Трамп на маргините на Генералното собрание на Обединетите нации во Њујорк.
Западен Брег е освоен од Израел во војната во 1967 година. Палестинците со децении го бараат како дел од својата идна држава, заедно со Источен Ерусалим и Појасот Газа. На оваа територија денес живеат околу 2,7 милиони Палестинци и околу 700.000 израелски доселеници. Повеќето земји во светот не ги признаваат израелските населби таму и ги сметаат за нелегални според меѓународното право.
Изјавата на Трамп доаѓа во чувствителен момент на засилени судири во Газа и зголемен дипломатски притисок за изнаоѓање долгорочно решение за израелско-палестинскиот конфликт.
Свет
Трамп најави нови царини на лекови, камиони и мебел

Американскиот претседател Доналд Трамп објави дека од 1 октомври ќе стапат на сила нови царини: 100 отсто на увоз на брендирани лекови, 25 на тешки камиони, 50 на кујнски ормари и 30 проценти на тапациран мебел.
Трамп изјави дека целта е заштита на домашното производство и националната безбедност, додека Американската стопанска комора и повеќе сојузници предупредија дека мерките ќе ги погодат блиските трговски партнери и голем дел од индустријата.