Свет
Либанскиот хаос може да предизвика нова мигрантска криза

Поранешниот италијански министер за внатрешни работи, Марко Минити, предупреди дека евентуалниот колапс на владата во Либан, по експлозијата во Бејрут, може да предизвика домино-ефект и да предзвика хаос на Медитеранот, пренесува „Ил Џорнале“.
Минити изјави дека актуелната криза во Либан, во која владата поднесе оставка по експлозијата во Бејрут, во која загинаа најмалку 170 лица и направи 300.000 бездомници, може да доведе до колапс на земјата и да предизвика здравствена, економска и хуманитарна вонредна состојба.
Поранешниот министер посочи дека повлекувањето на САД од Средоземното Море довело до тоа држави како Турција и Русија да се борат за моќ и влијание.
„Тоа е најголемата промена во политичкиот баланс за 100 години. Европа веќе не може да стои настрана. Ако не сториме ништо, првото оружје со кое ќе бидеме погодени е нов бран миграција среде вонредната состојба поради коронавирусот“, рече Минити.
Тензиите на Медитеранот се зголемуваат и меѓу Турција и неколку други медитерански нации, вклучително и Грција и Египет. Турција неделава распореди десет воени брода за придружба на истражувачкиот брод „Оруч реис“, кој има цел да спроведе сеизмичка студија во област што Грција ја смета за дел од својата ексклузивна економска зона (ЕЕЗ).
Турција го објави сеизмичкото истражување кон крајот на минатиот месец користејќи го системот НАВТЕКС. Како одговор на тоа, Грција ги стави своите вооружени сили во состојба на готовност. Турција неделава издаде нов НАВТЕКС за да се спротивстави на грчкиот НАВТЕКС, кој откажа претходна турска порака.
И Европската комисија ја коментира тензичната ситуација, при што портпаролот за надворешни работи на ЕУ, Петер Стано, рече дека случајот во источен Медитеран е крајно загрижувачки и дека ЕУ целосно ги поддржува и Грција и Кипар.
Тензиите на Медитеранот доаѓаат во период кога Италија продолжува да забележува наплив на мигранти на своите брегови. Многу од нив беа позитивни на коронавирусот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Зеленски: Украина редовно ќе користи свои балистички ракети во иднина

Претседателот на Украина, Володимир Зеленски, денес изјави дека Украина успешно ги користела ракетите „Нептун“ и дека ќе дојде време кога редовно ќе ги користи своите балистички ракети.
Зеленски зборуваше за време на Меѓународниот форум на одбранбената индустрија, нагласувајќи дека еден од приоритетите е максимално зголемување на производството на пресретнувачки беспилотни летала за соборување беспилотни летала од типот „Шахед“, објави украинскиот „Униан“.
„Во моментов има одреден дефицит, но работиме на тоа. Истото важи и за развојот на украинските балистички способности. Успешно го користевме „Нептун“ – нашите крстосувачки ракети – неколку пати. Ќе дојде време кога редовно ќе ги користиме сопствените балистички ракети“, рече Зеленски, пренесува Танјуг.
Тој нагласи дека ова е една од клучните безбедносни цели за државата, како и за сите компании и поединци кои учествуваат во развојот на украинската ракетна програма. „Имањето сопствена ефикасна балистика е една од гаранциите за безбедност“, рече украинскиот претседател.
Зеленски, исто така, истакна дека од почетокот на војната, потенцијалот на украинската одбранбена индустрија се зголемил многукратно и дека за следната година се проценува дека производствениот капацитет на беспилотни летала и ракети ќе достигне 35 милијарди долари.
Фото: принтскирн
Свет
Орбан: ЕУ се распаѓа

Унгарија не треба да го усвои еврото затоа што Европската унија се распаѓа и Унгарија не треба поцврсто да ја врзува својата судбина за блокот, изјави унгарскиот премиер Виктор Орбан во интервју за бизнис-страницата EconomX.
Унгарија, која ја модернизираше својата економија со милијарди евра од Брисел откако се приклучи пред две децении, во моментов не ги исполнува условите за усвојување на еврото.
За разлика од Данска, Унгарија нема законско ослободување од приклучување кон валутниот блок. Некои од источните соседи на Унгарија, вклучувајќи ги Полска, Чешка и Романија, исто така остануваат надвор од еврозоната, барем засега.
Орбан, кој е на власт од 2010 година, стана сè погласен критичар на ЕУ, која задржа милијарди евра средства за Унгарија поради реформите за владеење на правото.
„Унгарија не треба да ја врзува својата судбина поцврсто со Европската Унија отколку што ја врзува сега, а воведувањето на еврото би било најблиската можна врска“, предупреди Орбан.
Фото: ЕПА
Регион
Пронајдени се телата на браќата од Хрватска во словенечките Алпи

Словенечките планински спасувачи ја продолжија својата акција утрово под врвот Тошќ, во Јулиските Алпи, каде што вчера лавина затрупа тројца хрватски планинари.
Исчезнатите лица, по кои се трагаше од вчера, за жал се пронајдени мртви, објавува словенечки 24ur. Како што неофицијално дознава словенечкиот медиум, двајца од нив биле браќа.
„Ги пронајдовме двајцата – едниот беше закопан околу еден метар во снегот, а другиот околу метар и пол. Првиот успеавме да го транспортираме во долината со хеликоптер, додека сè уште чекаме транспорт за вториот. Самиот терен е многу тежок бидејќи е карпеста, стрмна клисура со бројни карпести скокови, што ја направи работата опасна и тешка за спасувачите. За жал, ќе кажам дека сите тројца планинари што ги пронајдовме во лавината починаа. Им изразувам искрено сочувство на нивните семејства“, рече тој.