Американскиот претседател Доналд Трамп ја коментираше одлуката на Украина да го прифати предложениот 30-дневен прекин на огнот, потврдувајќи дека ќе го покани украинскиот претседател Володимир Зеленски назад во Белата куќа.

„Сакаме да ставиме крај на војната во Украина“, рече Трамп.

Тој најави и дека американската делегација ќе се сретне со руската подоцна денеска или утре, како дел од понатамошните напори за постигнување договор.

Последната средба меѓу американскиот претседател Доналд Трамп и украинскиот претседател Володимир Зеленски во Белата куќа, одржана на 28 февруари, ненадејно заврши по жестока расправија.

Состанокот, првично планиран за потпишување договор за минерали од ретки земји, се претвори во вербален судир кога Трамп го обвини Зеленски за „коцкање со Третата светска војна“ затоа што одбил да направи компромис со Русија. По инцидентот, Трамп ја прекина средбата и ја откажа планираната прес-конференција, додека Зеленски ја напушти Белата куќа без да постигне договор.

Соединетите држави и Украина, претходно, издадоа заедничка изјава по состанокот во Џеда, Саудиска Арабија, потврдувајќи дека САД веднаш ќе ја укинат паузата во размената на разузнавачки информации и ќе продолжат со испраќање воена помош за Украина. Киев, исто така, изрази подготвеност да го прифати предлогот на САД за итен, привремен прекин на огнот во траење од 30 дена, кој може да се продолжи со заеднички договор на страните, под услов Русија да се согласи и истовремено да го спроведе.

Државниот секретар на САД, Марко Рубио рече дека сега топката е на страната на Русија и изрази надеж дека ќе го прифати предлогот за прекин на огнот.

Претседателите на Украина и на САД постигнале договор и што поскоро да склучат сеопфатен договор за развој на клучните минерални суровини на Украина. Целта на договорот, како што беше наведено, е да се прошири украинската економија, да се надоместат трошоците за американската помош и да се обезбеди долгорочен просперитет и безбедност на Украина.

Украинскиот министер за одбрана, Рустем Умеров, ги соопшти деталите од денешниот договор меѓу Украина и САД, по што беше предложен едномесечен прекин на огнот во Украина.

„Денеска во Џеда, со топлото гостопримство на престолонаследникот Мохамед бин Салман, САД и Украина презедоа важни чекори кон воспоставување траен мир во Украина. Претставниците на двете земји ја пофалија храброста на украинскиот народ во одбраната на својата татковина и се согласија дека сега е вистинско време да се иницира процес кој ќе доведе до траен мир. Украинската делегација ја повтори длабоката благодарност на украинскиот народ до претседателот Трамп, американскиот Конгрес и американскиот народ што овозможија значителен напредок кон мирот“, рече Умеров.

„Украина изрази подготвеност да го прифати предлогот на САД за итен, привремен 30-дневен прекин на огнот, кој може да се продолжи со взаемна согласност, што е предмет на прифаќање и истовремена имплементација од страна на Руската Федерација. Соединетите Држави јасно ќе и дадат до знаење на Русија дека реципроцитетот на договорот е клучен за постигнување мир“, рече Умеров.

Тој додаде дека САД веднаш ќе ја укинат паузата во размената на разузнавачки информации и ќе ја вратат воената помош за Украина.

„Делегациите разговараа и за важноста на хуманитарните напори како дел од мировниот процес, особено за време на споменатиот прекин на огнот, вклучително и размена на воени заробеници, ослободување на цивилни затвореници и враќање на насилно земените украински деца. Двете делегации се согласија да назначат преговарачки тимови и веднаш да започнат преговори за траен мир што ќе обезбеди долгорочна безбедност на Украина. САД се обврзаа да разговараат за овие конкретни предлози со руските претставници, додека Украина нагласи дека европските партнери ќе учествуваат во мировниот процес“, рече Умеров.

Додаде и дека претседателите на двете земји се согласија да склучат сеопфатен договор за развој на стратешките минерални ресурси на Украина што е можно поскоро, со цел да се зајакне украинската економија, да се надоместат трошоците за американската помош и да се обезбеди долгорочна стабилност и безбедност на Украина.

Украинскиот претседател Володимир Зеленски потврди дека Украина го прифатила предлогот на САД за 30-дневен прекин на огнот, кој би го опфатил Црното Море и целата линија на фронтот.

По состанокот на високи американски и украински претставници во Џеда, Зеленски рече дека украинската делегација предложила тишина во воздухот и во морето, како и вистински мерки за градење доверба, вклучително и размена на воени заробеници.

„Американската страна ги разбира нашите аргументи и ги прифаќа нашите предлози. Би сакал да му се заблагодарам на претседателот Трамп за конструктивноста на разговорите на нашите тимови“, рече Зеленски.

Тој потврди дека предлогот за целосен прекин на огнот дошол од САД и дека Украина го смета за позитивен и е подготвена на тој чекор.

Зеленски истакна дека САД сега мора да ја убедат Русија да се согласи на прекин на огнот.

„Клучен елемент на денешниот состанок беше подготвеноста на Америка да ја обнови одбранбената помош за Украина“, додаде тој.

„Украина е подготвена за мир. Русија сега мора да покаже дали е подготвена да ја заврши војната или да ја продолжи. Време е за целосна вистина“, рече тој.

Соединетите држави и Украина, претходно, издадоа заедничка изјава по состанокот во Џеда, Саудиска Арабија, потврдувајќи дека САД веднаш ќе ја укинат паузата во размената на разузнавачки информации и ќе продолжат со испраќање воена помош за Украина. Киев, исто така, изрази подготвеност да го прифати предлогот на САД за итен, привремен прекин на огнот во траење од 30 дена, кој може да се продолжи со заеднички договор на страните, под услов Русија да се согласи и истовремено да го спроведе. Државниот секретар на САД, Марко Рубио рече дека сега топката е на страната на Русија и изрази надеж дека ќе го прифати предлогот за прекин на огнот.