Свет
Лори Лов: Шансите Асанж да добие фер судење во САД се рамни на нула

Британскиот хакер Лори Лов, кој успешно се избори против американската екстрадиција од Велика Британија, вели дека шансите Џулијан Асанж да добие фер судење во САД се рамни на нула, пренесува РТ.
Зборувајќи за сослушувањето за екстрадиција на Асанж во САД, кое беше одложено до февруари 2020 година, Лов рече дека Асанж се соочува со тешка битка за враќање на нарацијата што се шири во американската јавност.
Лов (34) се соочи со екстрадиција во САД за да му се суди за наводно хакирање илјадници безбедни мрежи во Федералните резерви, НАСА и во ФБИ. Наредбата за екстрадиција беше поништена во 2018 година од министерот за правда на Велика Британија бидејќи, според него, тоа нема да биде во интерес на правдата поради голем број причини вклучувајќи го и високиот ризик дека Лов ќе се самоповреди.
Лов проценува дека шансите на Асанж успешно да го добие својот случај за екстрадиција се силни со оглед на огромната јавна поддршка што ја има во Велика Британија. Меѓутоа, ако Асанж ја загуби правната битка и биде испратен преку Атлантикот, Лов предупредува дека е малку веројатно дека тој ќе помине добро во американскиот правен систем.
„Шансите за фер судење во САД се рамни на нула; 97 отсто од обвинетите за федерално кривично дело воопшто не излегуваат на суд зашто ги принудуваат на вонсудска спогодба“, тврди Лов.
Со оглед на веќе лошата здравствена состојба на Асанж, Лов е загрижен дека таа ќе се влоши во условите во центрите за притвор во САД, што значи дека губењето на процеот за екстрадиција може да има сериозни последици.
„Мислам дека треба да победиме тука. Ако го екстрадираат, мислам дека тоа ќе заврши со трагедија. Не само за Џулијан како човечко суштество туку и за светот поради напуштањето на некој чие единствено дело е да ја зборува вистината пред власта“, додаде тој.
Лов рече дека верува оти еден од најтешките елементи со кои Асанж се соочува е затворање во нехумани услови во САД не поради вистинска правда, туку за да се испрати порака до другите луѓе дека вистината не треба да се кажува“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Неколкумина загинаа откако патнички воз излета од шините во југозападна Германија

Неколку лица загинаа, а многу други се повредени откако патнички воз излета од шините во југозападна Германија, јави ДПА, повикувајќи се на безбедносни извори.
Спасувачките тимови се на местото на настанот и го пребаруваат возот и околината во потрага по патници.
Свет
Тројца мажи завршија во болница поради топлотен удар во Кипар

Тројца мажи се хоспитализирани денеска во Лимасол и Никозија во Кипар поради топлотен удар, при што еден од нив е во критична состојба.
Во исто време, двајца постари мажи, на возраст од 78 и 89 години, се хоспитализирани во Никозија во сериозна, но стабилна состојба. Уште еден 88-годишен пациент бил примен со симптоми на топлинска исцрпеност и е надвор од животна опасност.
Се апелира населението, особено до ранливите категории, да избегнуваат директна изложеност на сонце, да бидат внимателни и да внесуваат доволно течности, поради екстремно високите температури што зафатија делови од островот.
Свет
Фон дер Лајен се сретна со Трамп во обид да се договорат околу царините

Претседателката на Европската комисија, Урсула фон дер Лајен попладнево во шкотското место Трнбери ќе се сретне со американскиот претседател Доналд Трамп, во обид да биде постигнат трговски договор во пресрет на истекот на крајниот рок – 1 август за воведување на царини од 30 отсто за извозот на европски производи во САД.
Најавувајќи ја средбата во објава на Икс, Фон дер Лајен наведе дека со Трамп ќе „разговараат за трансатлантските трговски односи и за тоа како тие може да се одржат силни“.
Американската администрација веќе воведе царина од 50 отсто за увозот на челик и алуминиум од ЕУ, од 25 проценти за автомобили и автомобилски делови, како и основен данок од 10 отсто за поголемиот дел европски производи, со кои е опфатен околу 70 проценти од вкупниот извоз на Унијата во САД.
Средбата се одржува во услови на зголемени надежи во ЕУ дека Европската комисија би можела да постигне договор со Вашингтон по примерот на оној постигнат претходно неделава меѓу САД и Јапонија за просечна царина од 15 отсто на извозот на јапонски стоки на американскиот пазар.
ЕУ се надева дека, исто така, ќе постигне договор со САД за царинска стапка од 15 проценти, која би ја вклучувала и просечната царина од 4,8 отсто што ја плаќаат европските извозници на американскиот пазар уште од пред враќањето на Трамп во Белата куќа во јануари годинава.
Средбата доаѓа откако во четвртокот Европската комисија усвои пакет контрамерки на увозот на американски стоки во ЕУ, како одговор на најавената царина од САД од 30 отсто.
Портпаролот на ЕК за економска безбедност, трговија и царини Олоф Гил во четвртокот изјави дека фокусот на ЕУ е на постигнување на договор со САД за царините, а доколку тоа не се случи усвоените контрамерки ќе стапат во сила на 7 август.