Свет
Лори Лов: Шансите Асанж да добие фер судење во САД се рамни на нула

Британскиот хакер Лори Лов, кој успешно се избори против американската екстрадиција од Велика Британија, вели дека шансите Џулијан Асанж да добие фер судење во САД се рамни на нула, пренесува РТ.
Зборувајќи за сослушувањето за екстрадиција на Асанж во САД, кое беше одложено до февруари 2020 година, Лов рече дека Асанж се соочува со тешка битка за враќање на нарацијата што се шири во американската јавност.
Лов (34) се соочи со екстрадиција во САД за да му се суди за наводно хакирање илјадници безбедни мрежи во Федералните резерви, НАСА и во ФБИ. Наредбата за екстрадиција беше поништена во 2018 година од министерот за правда на Велика Британија бидејќи, според него, тоа нема да биде во интерес на правдата поради голем број причини вклучувајќи го и високиот ризик дека Лов ќе се самоповреди.
Лов проценува дека шансите на Асанж успешно да го добие својот случај за екстрадиција се силни со оглед на огромната јавна поддршка што ја има во Велика Британија. Меѓутоа, ако Асанж ја загуби правната битка и биде испратен преку Атлантикот, Лов предупредува дека е малку веројатно дека тој ќе помине добро во американскиот правен систем.
„Шансите за фер судење во САД се рамни на нула; 97 отсто од обвинетите за федерално кривично дело воопшто не излегуваат на суд зашто ги принудуваат на вонсудска спогодба“, тврди Лов.
Со оглед на веќе лошата здравствена состојба на Асанж, Лов е загрижен дека таа ќе се влоши во условите во центрите за притвор во САД, што значи дека губењето на процеот за екстрадиција може да има сериозни последици.
„Мислам дека треба да победиме тука. Ако го екстрадираат, мислам дека тоа ќе заврши со трагедија. Не само за Џулијан како човечко суштество туку и за светот поради напуштањето на некој чие единствено дело е да ја зборува вистината пред власта“, додаде тој.
Лов рече дека верува оти еден од најтешките елементи со кои Асанж се соочува е затворање во нехумани услови во САД не поради вистинска правда, туку за да се испрати порака до другите луѓе дека вистината не треба да се кажува“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Најстуден 30-ти јуни во Москва откако почнаа да се мерат температурите

Метеоролозите вчера во Москва го регистрираа најстудениот 30-ти јуни откако се мерат температурите.
„Москва денес сруши рекорд: толку студен 30-ти јуни никогаш не е виден. Во нашиот главен град, последниот ден од јуни беше најстудениот во целата историја на главната метеоролошка станица. Во 15 часот по московско време, термометарот покажа само плус 12,6 степени“, напиша на Телеграм Евгениј Тишковец, висок член на метеоролошкиот центар Фобос.
„Ова ги срушува претходните рекорди од 1962 и 1976 година, кога на 30-ти јуни беа регистрирани плус 14 и плус 14,7 степени“, додаде тој.
Што се однесува до понатамошната временска прогноза за руската престолнина, денес се очекуваат ниски температури, слични на вчерашните. Сепак, утре се очекува затоплување.
Свет
Трамп ги понитшти мерките воведени од Бајден за Куба

Белата куќа објави дека американскиот претседател Доналд Трамп потпишал меморандум со кој се воспоставува строга американска политика кон комунистичка Куба и се поништуваат мерките наметнати од поранешниот американски претседател Џо Бајден.
Со него ќе се воведе законска забрана за американски туризам во Куба, а воедно ќе се одржи економското ембарго врз земјата, соопшти Белата куќа.
Иако Американците не можат да ја посетуваат Куба за одмор, патувањето е дозволено за активности, вклучително и образовни или хуманитарни патувања.
Во еден од своите први потези по преземањето на функцијата во јануари, Трамп, жесток критичар на Куба, ја поништи одлуката на администрацијата на Бајден да ја отстрани земјата од списокот на држави спонзори на тероризам во САД. Тој, исто така, делумно го ограничи влезот за луѓе од Куба.
Според меморандумот објавен вчера, Трамп ја обнови забраната за директни или индиректни финансиски трансакции со субјекти контролирани од кубанската војска, со исклучоци за трансакции што ги унапредуваат целите на американската политика или го поддржуваат кубанскиот народ.
Бајден ја поништи наредбата на Трамп од 2017 година со која беа ограничени финансиските трансакции со одредени воени и владини субјекти поврзани со Куба.
Новиот меморандум „ја спроведува забраната за американски туризам во Куба и обезбедува усогласеност преку редовни ревизии и задолжително водење евиденција за сите трансакции поврзани со патувања најмалку пет години“, според соопштението за медиумите на Белата куќа.
Исто така, го поддржува економското ембарго врз Куба и се спротивставува на повиците во Обединетите нации и другите меѓународни форуми за негово прекинување.
Кубанскиот министер за надворешни работи, Бруно Родригез, објави на социјалната мрежа Икс дека „претседателскиот меморандум против Куба објавен од американската влада ја зајакнува агресијата и економската блокада што го казнува целиот кубански народ и е главна пречка за нашиот развој“. „Тоа е кривично дело и кршење на човековите права на целата нација“, рече тој.
Свет
Трамп потпиша укинување на санкциите против Сирија

Американскиот претседател Доналд Трамп вчера потпиша извршна наредба со која се укинуваат санкциите на САД врз Сирија, со што се става крај на изолацијата на земјата од меѓународниот финансиски систем.
САД ќе можат да ги задржат санкциите против поранешниот сириски претседател Башар ал-Асад, неговите соработници, злоупотребувачите на човекови права, трговците со дрога, луѓето поврзани со употребата на хемиско оружје, Исламската држава и ИСИС, како и лица блиски до Иран, изјави портпаролката на Белата куќа, Каролин Ливит, на брифингот за новинарите.
Асад беше соборен од власт во декември во молскавична офанзива од бунтовниците предводени од исламистите, а Сирија оттогаш презеде секаков чекор за повторно воспоставување на меѓународните врски.
Сирискиот министер за надворешни работи, Асаад ал-Шибани, напиша на социјалната мрежа Икс дека укинувањето на санкциите против Сирија од страна на Трамп ќе „ја отвори вратата за долгоочекуваната реконструкција и развој“.
Тој додаде дека овој потег ќе „отстрани пречка“ за економско закрепнување и ќе ја отвори земјата за меѓународната заедница.
Сирискиот претседател Ахмед ал-Шара и Трамп се сретнаа во Ријад во мај, каде што, во голем политички пресврт, Трамп неочекувано објави дека ќе ги укине санкциите против Сирија.
Некои пратеници во Конгресот бараат мерките целосно да се укинат, додека Европа објави дека ќе ги укине економските санкции.
„На Сирија мора да ѝ се даде шанса, и тоа е она што се случи“, изјави за новинарите специјалниот претставник на САД за Сирија, Томас Барак. Тој го опиша овој потег како „кулминација на многу внимателно осмислен, тежок процес на укинување на тие санкции“.
Белата куќа објави дека наредбата му наложува на државниот секретар повторно да го разгледа означувањето на бунтовничката група Хајат Тахрир ал-Шам како терористичка, предводена од Шараа и огранок на Ал Каеда, како и означувањето на Сирија како држава спонзор на тероризмот.
Во соопштението на Белата куќа се вели дека администрацијата ќе продолжи да го следи напредокот на Сирија во „преземањето конкретни чекори кон нормализирање на односите со Израел, решавање на прашањата поврзани со странските терористи, депортирање на палестинските терористи и забрана на палестинските терористички групи“.
Сиријците се надеваат дека олеснувањето на санкциите ќе го отвори патот за поголемо вклучување на хуманитарните организации што работат во таа земја, охрабрувајќи ги странските инвестиции и трговијата.