Пред самитот за поддршка на Украина во Париз, францускиот претседател Емануел Макрон ја изложи својата визија за потенцијалното распоредување на европските сили во Украина, нагласувајќи дека нивната улога би била да ги обезбедат клучните градови и бази, наместо да се вклучат во борбите на првата линија против руските сили.

Макрон рече дека присуството на европските трупи ќе послужи како одвраќање, спречувајќи ја обновената руска агресија и помагајќи му на Киев да ја задржи контролата врз својата територија.

Говорејќи по консултациите со украинскиот претседател Володимир Зеленски, Макрон истакна дека доколку Русија започне нова офанзива во Украина, европските трупи ќе бидат во позиција да „одговорат“. Тој не понуди детали за тоа како би изгледал европскиот воен одговор на руски напад.

Денеска во Париз се собираат највисоките претставници на 31 земја кои го поддржуваат Киев. Франција и Велика Британија ја предводат иницијативата за формирање коалиција, која би се состоела од земји кои се подготвени да дадат безбедносни гаранции во случај на прекин на огнот меѓу Русија и Украина.

Според информациите на агенцијата дпа, западните сојузници на Украина размислуваат за мониторинг на можна демилитаризирана зона на границата меѓу Русија и Украина. Тоа би се правело првенствено од воздух и со помош на технички средства како сателити и дронови. Поморските единици би можеле да бидат распоредени и за следење на слободата на пловидба во Црното Море.

Зеленски изрази благодарност до Макрон за најновата воена помош на Франција, нарекувајќи ја „силен пакет“. Тој го информираше и за тековните преговори за прекин на огнот.

Сепак, тој предупреди дека спроведувањето на договорот постигнат со посредство на Белата куќа за прекин на употребата на сила во Црното Море ќе биде значително поголем предизвик бидејќи Русија продолжува да се залага за дополнителни отстапки, како што е олеснување на санкциите.

Претседателот Доналд Трамп најави нова царина од 25 отсто за која рече дека ќе се применува на „сите возила што не се произведени во САД“. Ќе стапи на сила на 2 април, истиот ден кога Трамп планира да објави одмазднички тарифи против американските трговски партнери, ден што тој го нарекува „Ден на ослободувањето“. Самата наплата на царината ќе започне следниот ден.

Трамп сугерираше дека дури и возилата што содржат делови произведени во САД, но не се склопуваат во земјата, исто така ќе бидат предмет на царини.

Трамп рече дека мерката ќе доведе до „огромен раст“ за американската автомобилска индустрија, ветувајќи дека ќе поттикне нови работни места и инвестиции во САД.

На прашањето дали царините за автомобили ќе бидат отстранети, Трамп одговори дека тие се „трајни, 100 проценти“.

Овие царини ќе дојдат како дополнување на веќе постоечките, додаде тој, говорејќи од Овалната соба.

Трамп рече дека не е особено загрижен за падот на пазарот што му претходеше на неговото објавување на царини. „Сето тоа само ќе успее“, рече тој. Но, и покрај ваквата изјава, тој чекаше да се затворат маркетите за да ги објави новите царини.

Сегашната царина за странски автомобили во САД е 2,5 проценти, така што ова е значително зголемување. Приближно половина од сите продадени автомобили во САД се увезени.

Царините за увезените автомобили се голем удар за европските производители на автомобили и ќе го зголемат притисокот врз Европа да одговори со контрамерки. Соединетите Американски Држави се најголемиот пазар за европски автомобили, со речиси една четвртина од сите возила извезени од ЕУ.

Земјите од Европската унија веќе ги објавија плановите за укинување на царините наметнати за време на првиот мандат на Трамп и рекоа дека ќе воведат нови царини за широк спектар на американски производи – од долна облека до производи од соја – до средината на април.

Сепак, овие мерки беа одговор на царините за челик и алуминиум. Првата фаза, која требаше да ги погоди американското виски и мотоцикли, беше одложена за да се даде повеќе време за преговори и поради стравувањата од остра американска реакција што може да го уништи европскиот извоз на вино и шампањ.

Овие царини, исто така, се очекува силно да ја погодат Јапонија, за која автомобилите се главен во извозот.

Руските сили извршија масовен напад со беспилотни летала врз Харков, вториот по големина град во Украина, доцна вчера вечер, при што беа повредени девет лица и предизвикана значителна материјална штета, објави Ројтерс.

Камерата на фудбалскиот терен го сними моментот на нападот. На игралиштето владееше голема паника.

There was a massive Russian drone attack on Kharkiv tonight. About 15 explosions were heard in the city.

A residential building is on fire. A 14 year old girl is in hospital, her condition is critical.

People were playing football as the attack started. They were terrified. pic.twitter.com/t5433a1jks

— Anton Gerashchenko (@Gerashchenko_en) March 26, 2025

Градоначалникот на Харков, Ихор Терехов, изјави дека имало најмалку 12 напади со беспилотни летала врз градот, честа цел на руската војска, кој се наоѓа на околу 30 километри од границата.