Река верници, во текот на ноќта и до раните утрински часови денес, на последниот ден од збогувањето со папата Франциско пред неговиот погреб утре, се упатуваат во базиликата „Свети Петар“.

Базиликата беше отворена поголемиот дел од ноќта затворајќи ги вратите само три часа помеѓу 2.30 и 5.30 часот наутро.

Filipino Cardinal Louis Antonio Gokim Tagle led the fourth recitation of the Rosary in memory of Pope Francis at the Basilica of Saint Mary Major on Thursday evening, 24 April.https://t.co/g3UH8wNftf pic.twitter.com/NcT5eipwTP

— Vatican News (@VaticanNews) April 24, 2025

„Ноќта е најинтимниот момент, секогаш ноќе се манифестира Господ. Беше многу трогателно“, изјави за АФП, Николета Томасети, 60-годишна Италијанка, која го посети ковчегот на папата.

Телото на 88-годишниот папа, кој почина во понеделникот во своите соби во ватиканската црква „Света Марта“ по мозочен удар, беше однесено во церемонијална поворка до базиликата „Свети Петар“.

Оттогаш, речиси 130.000 луѓе од целиот свет се збогуваа со папата, соопшти Ватикан. „Чекаме со часови и часови, но не се чувствуваме уморно, не чувствуваме глад, не чувствуваме жед“, рече брат Вандо, 40-годишен бразилски капуцински монах.

Ковчегот ќе биде затворен вечерва во 20 часот. Кардиналот Камерленго Кевин Фарел, кој ќе ги води секојдневните работи на Ватикан сè додека не се избере нов папа, ќе ја предводи церемонијата на запечатување на ковчегот.

Се очекува денес во Рим да пристигнат повеќето од 50-те шефови на држави и 10 монарси, кои досега го потврдија своето присуство на погребот, вклучувајќи го и американскиот претседател, Доналд Трамп.

Италијанската агенција за цивилна заштита проценува дека неколку стотици илјади луѓе ќе пристигнат во Вечниот град овој викенд.

Италијанските и ватиканските власти воведоа строги безбедносни мерки околу плоштадот „Свети Петар“, при што илјадници волонтери и полицајци се распоредени во областа, систем против дронови, снајперисти на покривите и борбени авиони подготвени за полетување.

Конклавата за избор на нов папа, веројатно, нема да почне пред 6 мај. Во меѓувреме, кардиналите присутни во Рим, кои го презедоа привременото управување со Католичката црква, која брои 1,4 милијарда членови, ќе се состануваат секојдневно на општи конгрегации, пренесуваат светските агенции.

Продолжија подготовките во базиликата „Света Марија Велика“ во Рим, каде што папата Франциско ќе биде погребан в сабота.

Безбедносните мерки околу базиликата се засилени со зголемувањето на бројот на посетители, јавува агенцијата „Анадолија“, според списанието „Феникс“.

В сабота, 26 април, по погребот, што ќе се одржи во 10 часот наутро во базиликата „Свети Петар“, ковчегот на папата Франциско ќе биде префрлен во црквата „Света Марија Велика“. На надгробниот споменик, според неговата изречна желба, ќе стои само зборот: Франциско.

Традицијата вели дека повеќето папи се погребани во ватиканските пештери, но „Света Марија Велика“ веќе ги примила останките на седум папи: Хонориј III (1227), Николај IV (1292), Пиј V (1572), Сикст V (1590), Климент VIII (1605), Павле V (1621) и Климент IX (1669).

Почнувајќи од сабота, во базиликата „Света Марија Велика“, покрај гробовите на другите седум папи, ќе се наоѓа и гробницата на папата Франциско, потопена во евокативна атмосфера, збогатена со елементи додадени со текот на годините, но кои ја зачувуваат оригиналната палеохристијанска структура.

Секој агол од базиликата потсетува на побожност, историја и уметност.

На 14 март 2013 година, денот по изборот, папата приватно отишол во „Света Марија Велика“ за да се помоли пред Дева Марија. Гестот го означувал почетокот на ритуалот што ќе се повторува пред и по секое апостолско патување.

Градоначалникот на Киев, Виталиј Кличко, изјави за Би-би-си дека Украина можеби ќе мора да отстапи дел од територијата како дел од мировниот договор со Русија поради зголемениот притисок од претседателот Доналд Трамп да прифати територијални отстапки.

„Едно од сценаријата е да се отстапи територија. Тоа не е фер. Но, за мир, привремен мир, можеби тоа може да биде решение, привремено“, рече тој, според Би-би-си.

Но, 53-годишниот поранешен шампион во бокс, а сега политичар, нагласи дека украинскиот народ никогаш нема да прифати окупација од страна на Русија.

Кличко сега е еден од највисоките украински политичари што јавно наговести дека неговата земја можеби ќе мора привремено да отстапи дел од територијата.

Градоначалникот на Киев и претседателот Володимир Зеленски се политички ривали. Кличко постојано ги обвинуваше претседателот и неговиот тим дека се обидуваат да го поткопаат неговиот авторитет.

Во разговор за емисијата „Тудеј“ на „Би-би-си радио 4“ од својата канцеларија во центарот на Киев, Кличко нагласи дека е одговорен за главниот град на Украина опишувајќи го како срце на земјата разурната од војна. Тој рече дека претседателот Володимир Зеленски можеби ќе биде принуден да донесе болна одлука за да постигне мир.

На прашањето дали Зеленски разговарал со него за деталите за евентуален договор, Кличко кратко одговори: „Не“. „Претседателот Зеленски го прави ова самиот. Тоа не е моја функција“, додаде тој.

Осврнувајќи се на јавната расправија меѓу Зеленски и Трамп во Белата куќа во февруари, градоначалникот посочи дека клучните прашања меѓу врвните политичари би било подобро да се дискутираат без видеокамери.

Претходно оваа недела, Трамп го обвини Зеленски дека им штети на мировните преговори откога украинскиот лидер повторно го отфрли признавањето на руската контрола врз Крим, јужниот украински полуостров што Москва нелегално го анектира во 2014 година.

Трамп рече дека Крим бил изгубен пред многу години и дека во моментот не е ни тема на дискусија.

Сепак, Зеленски се потсети на Декларацијата за Крим од 2018 година, издадена од тогашниот државен секретар Мајк Помпео, во која се наведува дека САД „го отфрлаат обидот за анексија од страна на Русија“. Украина и нејзините европски сојузници изразија загриженост во последните недели за она што многумина на континентот го сметаат за зближување на Трамп со Владимир Путин и Русија.