Свет
Мајка пронајдена убиена, двете мали ќерки исчезнати: активиран амбер аларм во САД

Две девојчиња се исчезнати во Луизијана откако нивната мајка беше брутално убиена во нивниот дом во четвртокот рано наутро.
Државната полиција издаде итен налог за потрага по сестрите Џејла (6) и Ерин (4) по нивното исчезнување. Се верува дека тие биле киднапирани пред 8 часот во четвртокот.
Исчезнувањето на Кали Брунет (35) било пријавено 24 часа порано и на крајот била пронајдена мртва во нејзиниот дом, пишува „Daily Mail“.
Полицијата соопшти дека нејзиниот татко го пронашол безживотното тело на подот во спалната соба и се верува дека таа е убиена.
Инспекторите го нарекоа местото на настанот „очигледно убиство“ и рекоа дека има причина да се верува дека децата се во непосредна опасност.
Кали била пријавена за исчезната повеќе од 24 часа пред детективите да го пронајдат нејзиното тело.
Началникот на полицијата рече дека децата во овој момент би можеле да бидат на половина пат низ државата, но дека ги користат сите средства да ги најдат и да ги вратат дома.
Тој додаде дека децата исчезнале заедно со автомобилот на нивната мајка.
Во моментов нема осомничени, ниту пак се знае каде би можеле да бидат децата.
Инспекторите ја истражуваат смртта на мајката како убиство, но не се знае начинот на нејзината смрт.
Активиран е амбер аларм, мажот се смета за вооружен и опасен и на јавноста и се препорачува да не му приоѓа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Инциденти по протестот во Белград: Петпати фрлија солзавец, но луѓето бришат солзи и не се откажуваат, летаат јајца и шишиња по полицијата

Голема толпа народ не се повлекува од улиците на Белград иако студентскиот протест, преку кој испратија порака за предвремени парламентарни избори, заврши. Полициски кордони има насекаде и се обидуваат да ја потиснат масата луѓе. Граѓаните на многу места фрлаат со шишиња, лименки, камења и јајца по полицијата, се жалат дека се чувствува солзавец во воздухот, но велат дека нема да се откажат.
„Бевме пред кордонот полиција, во првиот ред. Петпати фрлија солзавец, но луѓето бришат солзи и не се откажуваат. Доста е страв, нема понатаму. Ова е нивен крај, не наш. Остануваме до крај“, вели за српската телевизија „Н1“ студентка која на протестот е со мајка си и не сака да си замине.
„Спуштете ги штитовите“ извикуваат граѓаните и не сакат да отстапат. Ставаат маски на лицата и пренесуваат повик „да не се откажуваме, се додека сме мирни, ништо не можат“.
Студентскиот протест на кој беа пренесени пораките за предвремени избори заврши мирно, а инцидентите почнаа во моментот кога студентите ги соблекоа елеците.
Регион
(Видео) Студентите на протестот во Белград ќе развеат знаме „какво што не се очекува“

Студентскиот протест во Белград почна со огромен број луѓе кои се уште се слеваат кон плоштадот Славија. Студентите за вечерва најавија дека ќе развеат знаме „какво што досега не е видено“. Откога почна протестот тие на социјалните мрежи објавија кусо видео од последните подготовки за изнесување големо знаме на улица со најава дека „тоа ќе биде знаме кое не сте го очекувале“.
Biće to zastava koju niste ocekivali pic.twitter.com/qeFNGlGmHD
— Žaklina Tatalović (@zaklina_prva) June 28, 2025
Протестот е предвидено да заврши во 21 часот кога истекува рокот кој студентите го дадоа на власта за распуштање на Народното собрание распишување предвремени парламентарни избори како и растурање на протестот во Пионерскиот парк каде некои студенти на контрапротест три месеци кампуваат и бараат продолжување на универзитетската година. За се што ќе се случува по 21 часот, студентите кажаа дека не се надлежни, а претседателот на Србија, Александар Вучиќ, попладнево рече дека очекува насилство, токму во периодот од 21 до 22 часот.
Регион
Плоштадот Славија во Белград се преполни, реки луѓе доаѓаат од сите страни на видовденски протест

Под слоганот „Се гледаме на „Видовден“ попладнево плоштадот Славија во Белград, Србија се преполни луѓе. Српските медиуми јавуваат дека реки народ се уште доаѓаат кон плоштадот од сите страни на државата.
Студентите, поддржани од огромен број граѓани имаат две барања од властите. Првото барање е распуштање на Народното собрание и распишување предвремени парламентарни избори до 21 часот денес, а второто барање е да прекине протестот на некои од студентите кои бараат продолжување на универзитетската година и три месеци кампуваат во Пионерскиот парк во центарот на Белград.
Студентите кои го организираат протестот најавија дека тој ќе трае три часа, треба да заврши во 21 часот и се огласија за ненадлежни за се што ќе се случува по 21 часот.
Претседателот на Србија, Александар Вучиќ, денес изјави дека очекува насилство на протестот кое ќе почне меѓу 21 и 22 часот.