Речиси секој четврти вработен во Европа сега е мигрант. Особено во земјите со високи плати, овие луѓе играат сè поголема улога, според Меѓународната организација на трудот. Така, во северниот, јужниот и во западниот дел на Европа, во периодот од 2013 до 2022 година, бројот на мигранти работници се зголемил од 22,5 на 23,3 отсто.

Мигранти се сите луѓе што работат во друга земја од нивната матична земја, го пренесува „Дојче веле“ текстот од порталот tagesschau.de.

„Работниците мигранти се неопходни за да се ублажи проблемот со недостигот на работна сила и да се придонесе за економскиот раст“, ​​рече генералниот директор на Меѓународната организација на трудот, Гилберт Ф. Хонгбо.

Организацијата ги смета за мигранти и лицата со работна виза и оние што работат во странска земја без валидна работна дозвола. Во глобална споредба, уделот на работниците мигранти во целото работоспособно население е особено висок во Европа, Северна Америка и во арапските земји.

Овие региони се од една страна интересни за мигрантите поради високите плати, а од друга страна потребата во овие региони е особено голема. Еден од факторите што го поттикнува ова е сè постарата популација во овие земји. На тој начин мигрантите доаѓаат на оние работни места кои остануваат празни откако луѓето ќе се пензионираат, а во исто време расте потребата од старатели за стари лица.

Оваа состојба се рефлектира и во бројките: речиси две третини од сите работници во европските земји, кои доаѓаат од друга земја, биле вработени во услужниот сектор. Кај домашното население овој удел изнесува околу половина од работната сила.

Во светот уделот на мигрантите во работната сила во 2022 година беше 4,7 отсто. Меѓународната организација на трудот го проценува вкупниот број работници мигранти во светот на 284,5 милиони. Речиси 255,7 милиони од нив биле постари од 15 години и со тоа биле способни за работа.

Стапката на невработеност кај мигрантите изнесува 7,2 отсто, што е малку повисока отколку кај локалното население (5,2 отсто). Според оваа организација на ОН, причините за тоа би можеле да бидат од лингвистичка природа, значи можните јазични бариери. Но, како причини се наведуваат непризнаените дипломи или уверенија, како и дискриминацијата.

Патријархот на Руската православна црква, Кирил, постојаниот претставник на Русија во Обединетите нации, Василиј Небензја, Рускиот олимписки комитет и два фудбалски клуба не беа вклучени во 15. пакет антируски санкции на Европската Унија благодарение на напорите на Унгарија, изјави унгарскиот министер за надворешни работи, Петер Сијарто.

Според шефот на унгарската дипломатија, предлозите изнесени во врска со овој пакет-санкции не биле ништо помалку од луди. Тој тврди дека некои предложиле санкциите да ги вклучат патријархот Кирил, рускиот претставник во ОН, рускиот олимписки комитет и двајца руски прволигаши.

„Ние ставивме вето. Едноставно, рековме дека нема да поддржиме такви санкции“, им рече Сијарто на унгарските новинари. Сепак, според него, Унгарија го поддржала 15. пакет-санкции бидејќи има исклучоци за унгарската нафтена компанија МОЛ, која ќе може да продолжи да извезува нафтени деривати произведени во нејзините фабрики со руска нафта.

Вчера, Европската Унија усвои нов пакет-санкции против Русија поради нејзината инвазија на Украина вклучувајќи построги мерки против кинеските субјекти и повеќе бродови од таканаречената руска флота во сенка, објави денеска Европската комисија во соопштение.

Комисијата подготвува 16-ти пакет-санкции за јануари, кој би можел да вклучи пошироки мерки, како што се рускиот течен природен гас и извозните ограничувања на подружниците на компаниите од ЕУ во трети земји, изјавија извори за „Ројтерс“.

Полскиот министер за надворешни работи изјави дека Русија, а не Украина, треба да биде принудена на мировни преговори. Тој ги повика ЕУ и САД да и помогнат на Украина за да постигне подобра преговарачка позиција. „Москва, а не Киев, треба да биде принудена на мировни преговори бидејќи Кремљ е тој што не сака мир“, изјави полскиот министер за надворешни работи, Радослав Сикорски, а пренесува „Дојче веле“.

Поделбата на задачите треба да биде таква што и САД и Европската Унија ѝ помагаат на Украина да постигне подобра преговарачка позиција за потенцијалните идни преговори, кои треба да бидат поттикнати и принудени од агресорот, а не од жртвата, нагласи политичарот.

Според него, Европската Унија треба да се мобилизира уште повеќе во пресрет на претстојната администрација на Доналд Трамп.

Идниот американски специјален претставник за Украина, Кит Келог, смета дека Доналд Трамп би можел да да ги покани украинскиот претседател, Володимир Зеленски, и рускиот претседател, Владимир Путин, на преговори во Вашингтон по неговата инаугурација и е убеден дека е можно решение за украинско-руското прашање во следните неколку месеци.