Европа
Медведев: Мојата тажна шега изгледа се претвора во застрашувачка реалност

Поранешниот руски претседател и актуелен заменик-шеф на рускиот совет за безбедност Дмитриј Медведев испрати предупредување до САД во објава на Телеграм. Тој ги критикуваше наводите што се појавија во Русија, според кои се подготвува трансфер на нуклеарно оружје од САД во Украина. „Немаме планови да ја опремиме Украина со нуклеарно оружје“, изјави Белата куќа за Њузвик како одговор на овие извештаи и коментарите на Медведев.
„Американските политичари и новинари сериозно разговараат за последиците од префрлањето на нуклеарното оружје во Киев. Се чини дека мојата тажна шега за лудиот, сенилен Бајден, кој реши достоинствено да го напушти овој свет, земајќи со себе значаен дел од човештвото. се претвора во застрашувачка реалност“, напиша Медведев.
„Да се даде нуклеарно оружје на земја во војна со најголемата нуклеарна сила? Идејата е толку апсурдна што предизвикува сомнеж за параноична психоза кај Џо и кај секој кој би советувал таков потег“, додаде тој.
Тој продолжи: „Сепак, морам да ја коментирам оваа глупост:
Самата закана за пренос на нуклеарно оружје на режимот во Киев може да се смета за подготовка за нуклеарен конфликт со Русија. Преносот на ваквото оружје може да се поистоветува со акт на напад врз нашата земја според член 19. Основата на државната политика во областа на нуклеарното одвраќање. Последиците ќе бидат очигледни“, напиша тој.
Според членот 19 од Основата на државната политика на Руската Федерација за нуклеарно одвраќање, на која се повика Медведев, од 2020 година „условите што ја специфицираат можноста за употреба на нуклеарно оружје од страна на Руската Федерација вклучуваат добивање на веродостојни информации за можното лансирање балистички ракети на територијата на Руската Федерација и/или нејзините сојузници“.
Рускиот претседател Владимир Путин неодамна потпиша ажурирана нуклеарна доктрина, која нагласува дека Русија ќе направи „се што е потребно за да ја намали нуклеарната закана“ и се обидува да спречи ескалација на тензиите меѓу државите што може да доведе до „воени конфликти, вклучително и нуклеарно“.
Доктрината, исто така, наведува „неизбежна одмазда во случај на агресија против Руската Федерација и/или нејзините сојузници“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Украинците објавија снимка: „Со беспилотно летало уништивме моќен руски дрон во лет“

Украинските сили соборија руски повеќенаменски дрон Zala Kub со помош на беспилотно летало FPV, а снимката од акцијата беше споделена на социјалните мрежи од украинскиот волонтер Серхи Стерненко, пренесува „Милитарњи“.
„Таквото летало можеше да предизвика голема штета, па затоа е одлично што беше уништен во воздух“, рече Стерненко.
Zala Kub е дизајниран за прецизни удари на копнени цели – кога ќе ги открие, вертикално навлегува и исфрла експлозивен товар на горниот дел од возилото, каде што тенковите и оклопните возила се најранливи поради нивниот потенок оклопен слој.
Ова беспилотно летало е развиено од рускиот концерн „Калашников“, а првпат беше прикажано во 2019 година на меѓународната воена изложба IDEX во Обединетите Арапски Емирати.
Украина долго време користи беспилотни летала FPV како пресретнувачи за уништување руски летала. Ваквите дронови, во зависност од опремата, како дневни и термални камери, чинат меѓу 1.600 и 2.500 долари. Тие може да летаат со брзина до 160 километри на час, да имаат дострел до 35 километри и да останат во воздухот до еден час.
Европа
Судот ќе ја изрече пресудата за Депардје во мај

Кривичниот суд во Париз во четвртокот објави дека на 13 мај ќе ја изрече пресудата за актерот Жерар Депардје за сексуално вознемирување две жени за време на снимањето филм во 2021 година.
Француското Обвинителство во четвртокот побара 18-месечна условна казна и глоба од 20.000 евра за Депардје, објави весникот „Ле Паризиен“ и другите медиуми.
Седумдесет и шестгодишниот Депардје, истакната личност во француската кинематографија, е обвинет за сексуално вознемирување две жени за време на снимањето филм од 2021 година. Ова е првпат актерот, кој се соочува со многубројни обвинувања за сексуално вознемирување во текот на годините, да биде изведен пред суд.
Депардје призна дека ја фатил една од жените за бутот, но негира дека тоа е напад. Неговиот адвокат рече дека наводите против клиентот се лажни и дека истражителите биле пристрасни.
Европа
(Видео) Нереални снимки од протестот: Пикачу ги поддржа граѓаните во Турција

Надреално видео од Покемон кој наводно бега од полицијата за време на протестите во Турција стана вирална. Имено, некој облечен како Пикачу е снимен како бега од полицијата која брка демонстранти. Снимката наводно е направена во Анталија.
Виралното видео, кое нашироко се споделува на социјалните мрежи, се чини дека потекнува од турскиот фоторепортер Исмаил Коцероглу.
Исмаил во четвртокот објави видео на својот Инстаграм профил, на кое се гледа како костимиран демонстрант бега со толпа граѓани.
Дали е автентична снимката на која Пикачу бега од полицијата не е потврдено.
Сепак, Исмаил продолжи да поставува видеа од овој маскиран демонстрант. Синоќа, тој повторно објави видео од Пикачу како шета низ улиците на Анталија, наведувајќи дека Пикачу „се приклучил на осмиот ден од демонстрациите“.