Европа
Медведев обвини земја членка на ЕУ дека подготвува напад врз Русија

Заменик-претседателот на Рускиот совет за безбедност, Дмитриј Медведев, тврди дека денешна Финска, со поддршка на НАТО, води „конфронтациска политика на подготовка за војна со Русија“ и создава „отскочна даска за напад“.
Во колумна објавена од ТАСС, Медведев ги поврза сегашните одлуки на Хелсинки со постапките на финското раководство за време на Втората светска војна, кога Финска беше сојузник на нацистичка Германија. Според него, тогашните планови за „Голема Финска“ продолжуваат и денес преку политика која, како што тврди, ја загрозува безбедноста на Русија.
„Хелсинки, под маската на „одбрана“, води конфронтациска политика на подготовка за војна со Русија, очигледно создавајќи отскочна даска за напад врз нас“, напиша Медведев.
Бази на НАТО и воени вежби во Финска
Медведев наведува дека Финска потпишала договор за одбрана со Соединетите Американски Држави според кој на американските војници им е дозволен пристап до 15 фински воени објекти. Тој, исто така, предупредува дека НАТО воспоставува командни структури во Лапонија и Микели, како и дека се градат нови касарни на места што се наоѓаат само неколку десетици километри од руската граница.
Тој ја издвои изградбата на „новата линија Манерхајм“, која ја опиша како „подготовка на воената инфраструктура за нова агресија против Русија“.
Тој, исто така, ја обвини Финска за „намерно поткопување на регионалната безбедност“ со повлекувањето од конвенцијата за забрана на противпешадиски мини. Во текстот, тој наведе и голем број големи вежби на НАТО одржани во Финска – од артилериската „Lightning Strike 24“ до претстојните маневри „Northern Star 25“ и „Atlantic Trident 25“.
Медведев потсети дека Финска му платила на СССР 226 милиони долари репарации по војната, но тврдеше дека оваа сума „ни оддалеку не ја покрива целата штета“.
Тој заклучи дека политиката на Финска на „антируска хистерија“ веќе има последици – спомена рецесија, зголемена невработеност на истокот од земјата и пад на инвестициите – и предупреди дека продолжувањето на сегашниот курс може да има драматични последици.
„Соочувањето со нас може да заврши со конечен колапс на финската државност. Овој пат, никој нема да биде толку нежен како во 1944 година“, рече Медведев.
фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Данските власти поставија воен радар на аеродромот во Копенхаген за откривање дронови

Откога неидентификувани дронови беа забележани над данските аеродроми и воени бази речиси секоја вечер минатата недела, данските власти презедоа низа мерки за да се осигурат дека претстојниот состанок на лидерите на Европската Унија во Копенхаген ќе помине без безбедносни закани.
Откога минатата сабота беше забранета целата активност на дронови над Данска, фрегатата на германската морнарица „ФГС Хамбург“ се закотви во пристаништето во Копенхаген во неделата. Германскиот брод ќе придонесе за надзор на данскиот воздушен простор за време на самитот на Европската Унија, објавија данските медиуми.
Најновата мерка на данските власти е инсталирање современ радар за откривање и следење дронови „Вајбел Ксента“ на аеродромот „Каструп“ во Копенхаген.
Данската полиција и Генералштабот на вооружените сили не сакаа да дадат подетаљни информации за радарот што може да се види зад оградата кај „Каструп“. Познато е само дека станува збор за уред од данската компанија „Вајбел саентифик“, што може да детектира сите летала на растојание до 30 километри.
фото: принтскрин
Европа
Орбан: Секој друг извор на нафта и гас, освен рускиот, е несигурен и поскап

Снабдувањето на гас и нафта од Русија е загарантирано за Унгарија, а секој друг извор на енергија е несигурен и поскап, изјави денес унгарскиот премиер, Виктор Орбан.
„Ниеден разумен човек не би разменил нешто сигурно за нешто неизвесно“, рече Орбан денес во поткастот Fight Hour, како што објави унгарската агенција MTI. Унгарскиот премиер рече дека испораката на енергија од Русија е загарантирана и дека цената е пониска отколку од другите земји. Доколку Унгарија купува нафта и гас од други земји по повисока цена, ќе мора да им наплаќа повеќе на своите жители, рече Орбан.
Унгарија, Словачка и Чешка се трите европски земји на кои им се дадени ослободувања од европските санкции за увоз на руска нафта. Чешка оттогаш обезбеди други извори на снабдување, но Унгарија и Словачка продолжуваат да увезуваат нафта од Русија преку нафтоводот „Дружба“.
фото: принтскрин
Европа
Рекорден премин на Ла Манш: 125 мигранти пристигнаа со еден брод

Рекорден премин на Ламанш беше забележан во саботата кога дури 125 лица пристигнаа во еден мал брод, што е досега најголем број патници во еден брод. Вкупно, речиси 900 мигранти го преминаа Ламанш во саботата, пишува Би-би-си.
Со ова е соборен претходниот рекорд од август, кога во еден брод имаше 106 лица. Официјалните податоци од Министерството за внатрешни работи потврдуваат дека 895 мигранти пристигнале во 12 бродови во саботата, со што вкупниот број на преминувања од почетокот на 2025 година достигна приближно 33.000.
Во сенка на нова трагедија
Веста доаѓа откако уште еден мигрант почина обидувајќи се да премине, а неговото тело беше пронајдено во неделата наутро на плажа во близина на Булоњ-сур-Мер во северна Франција, објави новинската агенција АФП.
Возраста и националноста на починатиот сè уште не се познати. Обвинителката на пристанишниот град, Сесил Гресиер, изјави за АФП дека истрагата ќе утврди дали постои врска помеѓу оваа смрт и обидот за премин во близина на Екиен-Плаж, каде што беше пронајдена 49-годишна жена и однесена во болница поради хипотермија.
Во саботата, две жени од Сомалија исто така ги загубија животите откако нивниот импровизиран чамец наиде на проблеми. Со ова, бројот на смртни случаи при обид за нелегално преминување од Франција во Велика Британија оваа година се искачи на најмалку 27.
фото: принтскрин