Свет
Меланија Трамп: Луѓето не сфаќаат дека не зависам од Доналд

Меланија Трамп наскоро повторно ќе стане прва дама на САД. Во пресрет на почетокот на вториот мандат на нејзиниот сопруг, Меланија даде интервју за Фокс њуз во кое сакаше да се прикаже како жена која не е зависна од него.
„И првиот пат бев своја, едноставно ми се чинеше дека луѓето не ме сфаќаат сериозно или не ме прифаќаат, можеби сега ќе биде поинаку. Немав голема поддршка. Можеби некои луѓе ме гледаат само како сопруга на претседателот, но јас стојам на свои нозе, имам свои размислувања“, истакна таа.
„Понекогаш ги слуша моите совети, понекогаш не. Не секогаш се согласувам со она што го кажува или прави мојот сопруг и тоа е во ред“, рече Меланија.
Идната прва дама откри дека нема трајно да се пресели во Белата куќа, туку по потреба ќе живее и во Њујорк и Палм Бич на Флорида.
Уште во септември минатата година, таа рече дека Барон решил да живее во Трамп Тауер, семејната резиденција на Менхетен. И покрај тоа, вели таа, за него е подготвена соба во Белата куќа, во која ќе може да биде кога ќе реши да го посети семејството.
Откако ја напушти Белата куќа во 2021 година, Меланија помина време помеѓу Палм Бич и Њујорк додека нејзиниот сопруг се соочуваше со низа правни проблеми и се подготвуваше за својата трета кампања. Иако другите членови на семејството Трамп редовно му се придружуваа на поранешниот претседател на суд и во кампањата, Меланија главно се повлече од јавниот живот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Авион се урна покрај автопат во САД, има загинати

Има сомнежи дека две лица загинале во мал авион што се урнал во јужниот дел на американската сојузна држава Луизијана, соопштија властите.
Авионот вчера околу 20 часот и 30 минути по локално време, паднал во мочурлив простор во близина на автопатот, а причината за уривањето ја утврдуваат Националниот одбор за безбедност на транспортот и Федералната управа за авијација, пренесува АП.
До утрото, официјалните лица стигнаа до урнатините, а голем дел од авионот со двете лица бил под вода.
Официјален претставник на канцеларијата на шерифот ги потврди медиумските извештаи за Асошиетед прес дека и двете лица се претпоставува дека се мртви.
Свет
Венс за падот на берзата: Беше тоа само еден лош ден, ќе имаме бум

Американскиот потпретседател Џеј Ди Венс изјави за Newsmax дека вчерашниот пад на берзата, најголем од 2020 година, е само еден лош ден.
„Но, долго време ќе имаме бум на берзата, бидејќи повторно инвестираме во САД“, рече тој.
Потпретседателот нагласи дека владата сака Волстрит да работи успешно: „Но она што ни е најважно се американските работници и американските мали бизниси. Тие се оние кои ќе имаат најголема корист од овие политики“.
Венс, исто така, рече дека воведените царини можеле да бидат многу повисоки, но дека Трамп се обидува да испрати порака дека САД ќе бидат донекаде попустливи.
Свет
Данската премиерка за Америка: „Не можете да анектирате друга земја, дури и со аргументот за меѓународна безбедност“

Премиерката на Данска Мете Фредериксен вчера повторно ги отфрли повиците на американскиот претседател Доналд Трамп за анексија на Гренланд.
Трамп повеќе пати повторуваше дека сака големиот арктички остров да стане дел од Соединетите Американски Држави. Гренланд моментално е автономен дел од Кралството Данска.
На конференцијата со новоизбраниот премиер на Гренланд Јенс-Фредерик Нилсен и неговиот претходник Муте Егед, Фредериксен директно им се обрати на САД. „Не можете да анектирате друга земја, дури и со аргументот за меѓународна безбедност“, рече таа.
Таа рече дека САД и Данска се блиски пријатели и дека не сака ништо друго освен да го продолжи тоа пријателство.
„Ако дозволиме да бидеме поделени како сојузници, тогаш им правиме услуга на нашите непријатели“, рече таа. „Но, кога барате да преземете дел од територијата на Кралството Данска, кога се соочуваме со притисок и закани од нашиот најблизок сојузник, што да мислиме за земјата на која и се восхитуваме толку години?“
Таа рече дека не се работи само за Гренланд или Данска. „Се работи за светскиот поредок што го градиме заедно преку Атлантикот со генерации“.
Тридневната посета на данската премиерка на Гренланд дојде откако американската делегација предводена од потпретседателот Џеј Ди Венс минатата недела пристигна на островот.
Фредериксен се соочува со предизвикот да ги балансира односите со САД како важен трговски партнер, истовремено поддржувајќи го правото на Гренланд на самоопределување и одржување на кохезијата во Данска.