Свет
Мерц верува дека ЕУ и САД ќе постигнат трговски договор до крајот на јули

Германскиот канцелар Фридрих Мерц денес изрази оптимизам дека Европската Унија и Соединетите Американски Држави би можеле да постигнат трговски договор најдоцна до крајот на јули.
Мерц пред членовите на Бундестагот рече дека целта е да се намалат царинските давачки и да се зајакнат економските врски меѓу двата најголеми западни пазара, пренесува „Ројтерс“.
„Нашата цел е што побргу да постигнеме трговски договор со САД, договор што би ја поврзал меѓусебната трговија со најнискиот можен царински товар“, рече Мерц.
Канцеларот додаде дека е во постојан контакт со американскиот претседател Доналд Трамп и со Европската комисија и нагласи дека постои политичка волја од двете страни на Атлантикот за склучување на договорот на краток рок.
Досега администрацијата на Трамп не испратила писмо до Европската Унија со информации за новите царини, што многумина го толкуваат како сигнал дека на крајот ќе се постигне договор меѓу Вашингтон и Брисел, објавува Си-ен-ен.
Претседателката на Европската комисија, Урсула фон дер Лајен, во неделата имаше телефонски разговор со претседателот на САД, Доналд Трамп, а портпаролката на Комисијата изјави дека станува збор за добар разговор, објавија медиумите, пренесува „Танјуг“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Путин: Победуваме во Украина

Рускиот претседател Владимир Путин во понеделникот изјави дека руските сили ја добиваат она што тој ја нарече „праведна битка“ во Украина. „Нашите борци и команданти одат во офанзива, а целата земја, цела Русија, се бори во оваа праведна битка и работи напорно“, рече Путин во видео објавено на веб-страницата на Кремљ.
„Заедно ја браниме нашата љубов кон татковината и единството на нашата историска судбина, се бориме и победуваме.“
Русија започна инвазија на Украина на 24 февруари 2022 година, нарекувајќи ја „специјална воена операција“ за демилитаризација и денацификација на својот сосед. Киев и неговите сојузници велат дека инвазијата е неиспровоциран империјалистички обид за заземање на земјата.
Не се гледа крај на војната, и покрај дипломатските напори на американскиот претседател Доналд Трамп за прекин на конфликтот, вклучувајќи одделни самити со Путин, украинскиот претседател Володимир Зеленски и други европски лидери.
Русија контролира речиси 114.500 квадратни километри, или 19 проценти, од Украина, вклучувајќи го Крим, и голем дел од источниот и југоисточниот дел на земјата, според мапите на бојното поле.
Трамп, менувајќи го својот претходен став, минатата недела изјави дека Украина има шанса да ја врати територијата, а Вашингтон соопшти дека го разгледува барањето на Киев за купување крстосувачки ракети „Томахавк“ за напади длабоко во Русија.
фото: принтскрин
Европа
Мерц: Не сме во војна, но веќе не сме ни во мир

Германскиот канцелар Фридрих Мерц вчера изјави дека Европа „не е во војна, но повеќе не е во мир“ со Русија.
„Дозволете ми да го кажам ова во реченица што на прв поглед може да изгледа малку шокантно, ние не сме во војна, но повеќе не сме во мир“, рече Мерц на медиумски настан во Диселдорф. Војната на Русија е „војна против нашата демократија и војна против нашата слобода“, рече Мерц, додавајќи дека намерата на Москва е да го поткопа единството во блокот.
Тој, исто така, се осврна на неговата неодамнешна поддршка за планот на ЕУ за користење на замрзнати руски средства за финансирање на воените напори на Украина, велејќи дека овој потег би можел да обезбеди воена поддршка за Украина од три до пет години. Мерц рече дека во тој период би можело да стане економски неодржливо за Русија да ја продолжи својата војна против Украина.
Мерц претходно даде слична изјава, но сега ја именуваше Русија.
фото: принтскрин
Свет
Катар го прифати извинувањето на Нетанјаху

Катар го поздрави извинувањето и ветувањето на израелскиот премиер Бенјамин Нетанјаху дека Израел нема повторно да изврши напад врз Доха, соопшти Белата куќа.
Нетанјаху претходно денеска од Белата куќа телефонски разговарал со катарскиот премиер Мохамед бин Абдурахман Ал Тани, извинувајќи се за нападот насочен кон раководството на Хамас, со кој била нарушена катарската сувереност.
Во заедничкото соопштение беше потврдено дека е воспоставен „трилатерален механизам“ за подобрување на односите. Катарскиот премиер ги поздравил гаранциите од Израел, нагласувајќи ја подготвеноста на Доха за понатамошна соработка во интерес на регионалната безбедност и стабилност.