Свет
Мерц: Европа мора да биде подготвена да се брани без САД

Фридрих Мерц, кандидатот за иден германски канцелар, денеска изјави дека Европа мора да биде подготвена да се брани без Соединетите Американски Држави.
„Мораме да се подготвиме за можноста американскиот претседател Доналд Трамп веќе безусловно да ја поддржува заемната одбранбена обврска на НАТО“, рече Мерц, пренесе „Политико“. Мерц рече дека, според него, клучно е Европејците да вложат најголеми можни напори за да се уверат дека се способни барем сами да го бранат европскиот континент. Во последните денови се чини дека Трамп сѐ повеќе се согласува со рускиот претседател Владимир Путин обвинувајќи ја Украина, а не Кремљ, за почетокот на војната, која почна со рускиот напад во 2022 година, вели „Политико“.
Тие коментари следуваа по појавувањето на американскиот потпретседател Џеј ди Венс на Минхенската безбедносна конференција, каде што тој ги прикажа главните европски партии, а не Русија, како најголема закана за безбедноста на Европа.
Европските лидери оттогаш станаа сè позагрижени дека повеќе не може да се потпрат на клаузулата за колективна одбрана, која ја обезбеди основата за безбедноста на Европа од Студената војна. Лидерот на централнодесничарската Христијанско-демократска унија (ЦДУ) и на врвот на анкетите пред гласањето во недела рече дека Европа треба колективно да се подготви за можноста администрацијата на Трамп да не го поддржи членот 5 од НАТО, кој ги обврзува членките на алијансата на колективна одбрана.
На прашањето дали верува оти Трамп ќе ја поддржи клаузулата, Мерц рече дека не би се обложувал сѐ што има на кое било прашање што ќе му биде поставено, а секако не на тоа, пренесува „Танјуг“.
На прашањето дали Германија треба да бара заштита под францускиот нуклеарен чадор, Мерц призна дека францускиот претседател Емануел Макрон постојано му давал таква понуда на Берлин, но дека претходните германски влади го оставиле прашањето неодговорено.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Инциденти по протестот во Белград: Петпати фрлија солзавец, но луѓето бришат солзи и не се откажуваат, летаат јајца и шишиња по полицијата

Голема толпа народ не се повлекува од улиците на Белград иако студентскиот протест, преку кој испратија порака за предвремени парламентарни избори, заврши. Полициски кордони има насекаде и се обидуваат да ја потиснат масата луѓе. Граѓаните на многу места фрлаат со шишиња, лименки, камења и јајца по полицијата, се жалат дека се чувствува солзавец во воздухот, но велат дека нема да се откажат.
„Бевме пред кордонот полиција, во првиот ред. Петпати фрлија солзавец, но луѓето бришат солзи и не се откажуваат. Доста е страв, нема понатаму. Ова е нивен крај, не наш. Остануваме до крај“, вели за српската телевизија „Н1“ студентка која на протестот е со мајка си и не сака да си замине.
„Спуштете ги штитовите“ извикуваат граѓаните и не сакат да отстапат. Ставаат маски на лицата и пренесуваат повик „да не се откажуваме, се додека сме мирни, ништо не можат“.
Студентскиот протест на кој беа пренесени пораките за предвремени избори заврши мирно, а инцидентите почнаа во моментот кога студентите ги соблекоа елеците.
Регион
(Видео) Студентите на протестот во Белград ќе развеат знаме „какво што не се очекува“

Студентскиот протест во Белград почна со огромен број луѓе кои се уште се слеваат кон плоштадот Славија. Студентите за вечерва најавија дека ќе развеат знаме „какво што досега не е видено“. Откога почна протестот тие на социјалните мрежи објавија кусо видео од последните подготовки за изнесување големо знаме на улица со најава дека „тоа ќе биде знаме кое не сте го очекувале“.
Biće to zastava koju niste ocekivali pic.twitter.com/qeFNGlGmHD
— Žaklina Tatalović (@zaklina_prva) June 28, 2025
Протестот е предвидено да заврши во 21 часот кога истекува рокот кој студентите го дадоа на власта за распуштање на Народното собрание распишување предвремени парламентарни избори како и растурање на протестот во Пионерскиот парк каде некои студенти на контрапротест три месеци кампуваат и бараат продолжување на универзитетската година. За се што ќе се случува по 21 часот, студентите кажаа дека не се надлежни, а претседателот на Србија, Александар Вучиќ, попладнево рече дека очекува насилство, токму во периодот од 21 до 22 часот.
Регион
Плоштадот Славија во Белград се преполни, реки луѓе доаѓаат од сите страни на видовденски протест

Под слоганот „Се гледаме на „Видовден“ попладнево плоштадот Славија во Белград, Србија се преполни луѓе. Српските медиуми јавуваат дека реки народ се уште доаѓаат кон плоштадот од сите страни на државата.
Студентите, поддржани од огромен број граѓани имаат две барања од властите. Првото барање е распуштање на Народното собрание и распишување предвремени парламентарни избори до 21 часот денес, а второто барање е да прекине протестот на некои од студентите кои бараат продолжување на универзитетската година и три месеци кампуваат во Пионерскиот парк во центарот на Белград.
Студентите кои го организираат протестот најавија дека тој ќе трае три часа, треба да заврши во 21 часот и се огласија за ненадлежни за се што ќе се случува по 21 часот.
Претседателот на Србија, Александар Вучиќ, денес изјави дека очекува насилство на протестот кое ќе почне меѓу 21 и 22 часот.