Американскиот претседател Џо Бајден, вчера, разговара со катарскиот емир, шеикот Тамим бин Хамад ал-Тани, за случувањата во Газа и за итните тековни напори да се обезбеди ослободување на заложниците што ги држи милитантната група, соопшти Белата куќа.

Бајден недвосмислено го осуди држењето заложници од страна на Хамас, вклучително и многу мали деца, меѓу кои има тригодишен американски државјанин, чии родители беа убиени од групата на 7 октомври, се вели во соопштението на Белата куќа.

„Двајцата лидери се согласија дека сите заложници мора да бидат ослободени без дополнително одлагање“, се вели во соопштението.

Борците на Хамас ја преминаа границата од Газа во Израел на 7 октомври убивајќи речиси 1.200 луѓе и зедоа повеќе од 200 заложници, според израелските власти. До денес ослободени се само четворица заложници. Во израелското бомбардирање на Газа оттогаш загинаа повеќе од 11.000 Палестинци, од кои 40 отсто се деца, објавија здравствените власти на територијата под контрола на Хамас.

„Ројтерс“ минатата недела објави дека Катар, кој е дом на неколку политички лидери на Хамас, го предводел посредувањето меѓу Хамас и израелските претставници за заложниците.

Советникот на Бајден за национална безбедност, Џејк Саливан, во неделата изјави за Си-ен-ен дека активни, интензивни преговори со Израел, Катар, Египет и со САД се во тек за ослободување уште заложници, но не е јасно дали сите се живи.

„Целта е да се направи она што е неопходно на преговарачката маса за да се обезбеди безбедно враќање на сите заложници, вклучително и Американците“, рече Саливан за Си-ен-ен истакнувајќи дека девет Американци се водат за исчезнати заедно со едно лице, кое е постојан жител на САД.

„Не го знаеме статусот, дали се живи или починале, но сакаме да обезбедиме безбедно закрепнување на сите тие луѓе“, рече тој.

Американскиот функционер изјави и дека Брет Мекгурк, високиот советник на Бајден за Блискиот Исток, утре ќе го посети Израел и ќе се сретне со израелскиот премиер Бенјамин Нетанјаху, а планирани се дополнителни посети на Брисел, Саудиска Арабија, Јордан и на Катар.

Катарската влада претходно соопшти дека Ал Тани во разговор со Бајден ја нагласил потребата од итен прекин на огнот во Газа и трајно отворање на преминот Рафа во Египет.

Вашингтон ги отфрли повиците на арапските лидери и други да инсистираат Израел да го прекине нападот врз Појасот Газа, кој е под контрола на Хамас.

Во соопштението на Белата куќа не се споменува никаква дискусија за прекинот на огнот, но се вели дека лидерите разговарале за потребата „да се заштитат невините цивили и тековните напори за зголемување на протокот на хуманитарна помош во Газа“.

Бајден исто така ја потврди својата визија за идна палестинска држава „каде што Израелците и Палестинците ќе може да живеат рамо до рамо со еднакви мерки на стабилност и достоинство“, соопшти Белата куќа додавајќи дека Хамас долго време е пречка за тоа.