Претседателката на Европската комисија, Урсула фон дер Лајен, денес изјави дека ЕУ и Велика Британија на денешниот Самит во Лондон „свртија нова страница“ во односите и дека партнерството во областа на безбедноста и одбраната опфаќа многу теми.

„Ова ќе ја поттикне соработката во областа на одбраната“, изјави Фон дер Лајен на конференција по завршувањето на самитот ЕУ-Велика Британија, според „Гардијан“.

Таа рече дека ова е првиот чекор кон учеството на Велика Британија во заедничката програма за јавни набавки со ЕУ вредна 150 милијарди евра.

Таа процени дека договорот влијае на „милиони пријателства“ на луѓе што живеат во Велика Британија и ЕУ.

Зборувајќи за одлуката за истрага на учеството на Велика Британија на пазарот на електрична енергија на ЕУ, таа рече дека тоа е добро за „стабилноста на енергетските текови“.

„Ова е добро за нашата заедничка енергетска безбедност, бидејќи знаеме дека поголем пазар ќе биде добар и за намалување на цените на енергијата, а исто така ќе привлече повеќе приватни инвестиции поради регулаторната стабилност и предвидливост што постојат за да се искористи огромниот потенцијал што го нуди Северното Море, особено за обновлива, евтина и домашна енергија“, изјави Фон дер Лајен.

Таа истакна дека договорот за правилата за санитарните мерки значи „поголема безбедност, поголема стабилност за земјоделците и производителите на храна“.

„Договорот за рибарство ќе значи поголема долгорочна стабилност и предвидливост за рибарскиот сектор“, рече таа.

Претседателот на Европскиот совет, Антонио Кошта, на конференцијата изјави дека Велика Британија и ЕУ „работеле многу“ за да ја поддржат Украина и дека ќе го зголемат притисокот врз Русија со нов пакет санкции, со цел да го принудат рускиот претседател Владимир Путин да учествува во преговорите за завршување на војната.

Кошта додаде дека ЕУ и Велика Британија ќе го одржуваат самитот еднаш годишно.

Новоизбраниот папа Лав XIV изјави денес, за време на состанокот со претставници на други конфесии и цркви, дека ова е момент за дијалог и градење мостови, објавија италијанските медиуми.

„Убеден сум дека, ако се согласиме и се ослободиме од идеолошките и политичките условувања, можеме да кажеме „не“ на војната и трката во вооружување и „да“ на мирот и разоружувањето“, истакна папата, додавајќи дека во исто време можеме да ја отфрлиме економијата што ги осиромашува луѓето и планетата Земја и да прифатиме интегрален развој, објави агенцијата Анса.

На поранешниот американски претседател Џо Бајден му е дијагностицирана агресивна форма на рак на простатата, која се проширила и на неговите коски, соопшти вчера неговиот кабинет.

„Минатата недела поранешниот претседател Џо Бајден беше прегледан поради јазол на простатата кога забележа зголемени уринарни симптоми. Во петокот му беше дијагностициран рак на простатата со (највисок степен, група 5) со коскени метастази“, се вели во соопштението додавајќи: „Иако станува збор за поагресивна форма на болеста, ракот е чувствителен на хормонска терапија, што овозможува ефикасен третман“, пренесуваат медиумите во регионот.

Бајден (82) и неговото семејство „моментно ги разгледуваат опциите за лекување со своите лекари“, се вели во соопштението. Оваа вест доаѓа неколку дена откога портпаролот на Бајден изјави дека поранешниот претседател е на преглед поради мал јазол откриен на простатата.

Џо Бајден денес проговори првпат по појавувањето на веста дека боледува од рак.

Тој објави фотографија на X со сопругата Џил и нивната мачка. „Ракот нè допира сите. Како и многумина од вас, Џил и јас научивме дека сме најсилни кога сме скршени. Вашите љубов и поддршка нè подигнаа. Ви благодариме“, напиша Бајден.