Свет
Мнозинството Швеѓани сакаат построги закони за намалување на имиграцијата
Мнозинството Швеѓани, или 54 отсто, сакаат да ги променат законите така што помалку луѓе ќе добиваат дозвола за престој, пренесува дневниот весник „Свенска дагбладет“ објавувајќи ги резултатите од истражувањето на анкетарот „Сифо“.
Најмалку 21 отсто од испитаниците сакаат Шведска да прими толку мигранти колку што има денес, други 10 отсто би сакале да се зголеми бројот, додека 14 отсто биле неопределени.
Истражувањето е спроведено помеѓу 4 и 6 март, односно откако Турција се закани дека ќе ја отвори границата со ЕУ за мигрантите, но јавното мислење остана релативно стабилно, со приближно ист процент на одговори за и против миграцијата како оние добиени во јуни 2017 година.
Шефот на „Сифо“, Тоиво Сјорен, тврди дека мигрантската криза во 2015 година сè уште влијае врз ставовите на Швеѓаните.
„Многу луѓе сè уште се поврзуваат и зборуваат за 2015 година без оглед на која политичка партија припаѓаат. Се зборува за претходните бегалски бранови“, рече Сјорен.
Економистот Јоаким Руист, кој е специјализиран за имиграција, го повтори ова мислење. Тој исто така се согласи дека повеќето луѓе не знаат колку баратели на азил Шведска прима или како се менува бројот со текот на годините. Наместо тоа, нивниот одговор рефлектира нешто друго, „инстиктот“ под влијание на важните настани како кризата во 2015 година.
Руист исто така посочи дека, иако заканата на Турција дека ќе ги отвори вратите не е целосно остварена, повеќе луѓе би сакале да забележат намален прием на мигранти ако тоа се случи.
Можеби очекувано, гласачите на антимигрантските шведски демократи, најмногу сакаат да ја намалат миграцијата, па 98 отсто од нив се изјасниле за тоа. Големо мнозинство од либерално-конзервативните модерати и социјално-конзервативните христијански демократи, со 78 и 71 отсто, исто така би сакале да стават рампа за миграцијата.
На другиот крај на спектарот, партијата на „зелените“ и Левицата имаат најмногу симпатизери кои би сакале зголемена миграција со 47 и 41 отсто од анкетираните.
Од мигрантската криза во 2015 година, ставот на Шведска кон миграцијата драстично се промени. Иако во 2015 година премиерот Штефан Лофвен експлицитно изјави дека неговата Европа не гради sидови, денес тој инсистира надворешната граница на ЕУ да биде непробојна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Стари книги обложени со отров отстранети од Француската национална библиотека
Властите отстранија четири книги од Француската национална библиотека поради можноста нивните корици да содржат отровен арсен. Имено, некои книги од 19 век, печатени во Британија, имаат смарагдно зелени корици. Арсенот често се користел за боење книги во тоа време.
Научниците од Универзитетот во Делавер во САД ги класифицираа отстранетите томови како потенцијално опасни, но библиотеката вели дека ракувањето со овие книги би предизвикало само мала штета на здравјето. „Ги ставивме во карантин овие дела. Ќе ги анализираме во лабораторија за да можеме да процениме колку арсен е присутен во секој том“, рече портпаролот на Француската национална библиотека, а пренесе Би-би-си.
Списокот на потенцијално опасни книги е составен од „Poison Book Proect“ , иницијатива покрената од научници од Универзитетот во Делавер во соработка со музејот Винтертур во Делавер. Од 2019 година, тимот тестираше стотици корици книги за тешки метали и состави листа на наслови кои се потенцијално опасни.
Издавачите од викторијанската ера користеле арсен за да ги обојат кориците. Светската здравствена организација (СЗО) предупреди на долгорочна изложеност на арсен во водата за пиење и храната, велејќи дека супстанцијата е многу токсична. Сепак, таа не дала никакви упатства за ракување со предмети што го содржат овој отров.
Во 2022 година, библиотекарите во Лидс, Англија открија ретка книга со арсен. Библиотекар ја открил потенцијално отровната книга додека ја споредувал збирката на библиотеката со базата на податоци на проектот „Poison Book“.
Свет
Мигранти плаќале 18.000 евра за превоз преку Ла Манш, биле сексуално експлоатирани
Виетнамска криминална мрежа беше пресечена со акција на полициите на Франција и Англија, со поддршка на Европол.
Оваа група шверцувала мигранти преку Ла Манш и организирала нивна сексуална и трудова експлоатација како и перење пари.
Главниот организатор, идентификуван како десна рака на водачот на оваа банда, го организирал шверцот, додека друг нивни соучесник бил задолжен за собирање пари и организирање на транспортот на мигрантите, кои плаќале од 15.000 до 18.000 евра за превоз преку каналот , соопшти Европол.
На пат од Полска за Франција, некои од мигрантите шверцувале метамфетамин во парискиот регион, снабдувајќи ги азиските групи за шверц на дрога со седиште во областа во замена за намалена цена на патувањето.
Уапсени се 16 членови на оваа група и одземени се разновидна луксузна стока, 100.000 евра во кеш и уште 298.000 евра на банкарски сметки.
Свет
(Видео) Израелски министер доживеа сообраќајка: автомобилот превртен
Автомобилот на министерот за национална безбедност на Израел, Итамар Бен Гвир се превртел при сообраќајна несреќа.
Полицијата соопшти дека во судирот учествувале две возила и дека три лица се пренесени во болница откако биле полесно повредени, додека службениот автомобил на министерот завршил на неговиот покрив.
השר בן גביר היה מעורב בתאונת דרכים סמוך לזירת הפיגוע ברמלה, מצבו קל
(אורלי אלקלעי) @OferHalfonKan pic.twitter.com/iDT6Aq0OIo
— כאן חדשות (@kann_news) April 26, 2024
Од кабинетот на Бен Гвир велат дека министерот е во добра состојба и свесен, но е префрлен на понатамошно лекување во блискиот медицински центар Шамир.
Сликите од местото на настанот покажуваат дека неговото службено возило се превртело, додека друг автомобил бил згмечен напред.
Полицијата соопшти дека ги истражува причините за несреќата.