Свет
Мобс: Првата дама на САД е тивката сила на Трамп за да се сврти кон Украина
Првата дама на Соединетите Американски Држави, Меланија Трамп, беше клучна фигура, која вршеше притисок врз својот сопруг, претседателот Доналд Трамп, да се сврти кон поддршка на Украина, тврди Меган Мобс, ќерка на специјалниот пратеник на претседателот за Киев, Кит Келог.
Во интервју за британскиот „Телеграф“ таа рече дека првата дама била тивка сила, која го охрабрила Трамп да ја препознае итноста од заштита на „невините Украинци од нападите на руските сили под водство на Владимир Путин“.
Според неа, Меланија Трамп не е само сопруга на претседателот, туку и еден од неговите најблиски и највлијателни советници.
Мобс истакна дека нивниот однос е отворен и комуникативен и дека советите на Меланија се важни за Трамп.
Неодамнешните потези на Трамп, вклучително и договорот за оружје од 1 милијарда долари за Украина и санкциите против Русија, јасно укажуваат на неговата промена во надворешната политика за која Мобс тврди дека била под влијание на Меланија.
Во еден момент претседателот изјави дека, по разговорот со Путин, оној со неговата сопруга бил клучен.
„Таа рече: ‘Знаете, уште еден град е погоден’“, ги пренесе Мобс зборовите на Трамп забележувајќи дека Меланија не е задоволна од постапките на Путин кон Украина.
Мобс верува дека влијанието на Меланија може да биде одлучувачко, особено ако Трамп успее да обезбеди долгорочен мир во регионот.
Мобс, која живее во Киев под речиси секојдневни напади, верува дека посетата на Меланија на Украина би била значаен сигнал за поддршка.
Таа исто така истакнува дека договорот за снабдување со оружје на Украина е постигнат благодарение на брзите чекори преземени од администрацијата на Трамп.
Според неа, Меланија Трамп се покажа како клучен фактор во промената на надворешнотрговскиот курс на администрацијата на Трамп кон Украина, што вклучува значителна воена и финансиска поддршка за таа земја.
Нејзиното влијание, заедно со стратегиите формирани од специјални пратеници како Келог, може да ги обликуваат исходот од овој конфликт и имиџот на Трамп во историјата, оцени Мобс, пренесува „Танјуг“.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Трамп вели дека Украина не изразила никаква благодарност за напорите на САД
Американскиот претседател Доналд Трамп денеска изјави дека Украина не изразила никаква благодарност за напорите на САД.
-„Лидерството“ на Украина изрази нулта благодарност за нашите напори, а Европа продолжува да купува нафта од Русија. САД продолжуваат да продаваат огромни количини оружје на НАТО, за дистрибуција во Украина (измамникот Џо даде сè, бесплатно, вклучително и „големи“ пари), напиша Трамп на платформата „Truth social“.
Тој ја даде изјавата додека високи функционери од САД, Украина и советниците за национална безбедност на Франција, Велика Британија и Германија разговараат за нацрт-планот на САД за завршување на војната во Украина во Женева.
-Војната меѓу Русија и Украина е насилна и ужасна војна која, со силно и вистинско американско и украинско лидерство, никогаш немаше да се случи. Започна долго пред да го земам мојот втор мандат, за време на администрацијата на заспаниот Џо Бајден, и само се влоши, рече Трамп.
„Доколку претседателските избори во 2020 година не беа наместени и украдени, немаше да има војна меѓу Украина и Русија…Наследив војна што никогаш не требаше да се случи, војна што е губитничка за сите, особено за милионите луѓе што толку непотребно загинаа, заклучи Трамп.
Свет
Зеленски: Мировниот план на САД може да вклучува елементи од клучно значење за Украина
Предлогот на САД за запирање на војната во Украина може да вклучува делови што се засноваат на украинските перспективи и се од клучно значење за украинските национални интереси, изјави денеска претседателот на земјата, Володимир Зеленски.
„Веќе имаме кратка информација од членовите на делегацијата за резултатите од првиот состанок и првите преговори“, напиша Зеленски на „Х“ за разговорите со ЕУ и САД во Женева.
-Работата продолжува за постигнување на главната цел што ја очекува нашиот народ: да се стави крај на крвопролевањето и војната, додаде тој.
Во исто време, американскиот претседател Доналд Трамп изјави дека украинските власти не изразиле никаква благодарност за напорите на САД по ова прашање, а Европа продолжува да купува нафта од Русија.
Свет
Фон дер Лајен: ЕУ мора да игра централна улога во обезбедувањето мир во Украина
Претседателката на Европската комисија (ЕК), Урсула фон дер Лајен, денеска изјави дека ЕУ мора да игра „централна улога“ во обезбедувањето мир во Украина и дека ова е еден од главните елементи за „праведен и траен мир и суверенитет на Украина“.
Делегација од Украина, европски безбедносни претставници и американска делегација предводена од државниот секретар Марко Рубио денеска се среќаваат во Женева за да разговараат за неодамна протечениот предлог на САД за прекин на војната во Украина.
Во соопштение објавено на веб-страницата на ЕК, фон дер Лајен изјави дека одржливиот мировен план, покрај запирањето на војната, не смее „да сее семе на иден конфликт“.
Таа додаде дека „границите не можат да се менуваат со сила“ и го отфрли ограничувањето на персоналот во украинската армија, што е една од точките на протечениот мировен план.
-Не може да има ограничувања на украинските вооружени сили што би ја направиле земјата ранлива на идни напади и со тоа би ја поткопале европската безбедност, се вели во соопштението.
Фон дер Лајен изјави дека „Украина мора да има слобода и суверено право да ја избере својата судбина“ и дека избрала „европска судбина“, додавајќи дека ЕУ ќе продолжи да работи со Украина, коалицијата на земји што ја поддржуваат Украина и САД за да се постигне „вистински напредок кон мирот“.
Таа изјави дека „клучен елемент“ на мировниот договор мора да биде и „враќањето на секое украинско дете киднапирано од Русија“.

