Свет
Морничаво откритие на семејството на жртва од „Ер Индија“: „Во ковчегот на мајка ми имаше остатоци од други лица“

Речиси два месеца по смртоносната авионска несреќа на летот „Ер Индија 171“, во која загинаа 53 британски државјани, семејствата на жртвите сè уште се соочуваат со незамислива болка. Некои од нив со недели чекале на погребите, а едно семејство открило дека во ковчегот на нивната мајка имало посмртни остатоци од други лица.
На комеморацијата во Вембли, на која присуствуваа околу 300 пријатели и членови на семејства, Митен Пател им се обрати на присутните носејќи го смарагдниот прстен на својот татко, кој чудесно бил пронајден во остатоците од авионот. Неговите родители, Ашок и Шобхана Пател, се враќале дома во Кент од духовно патување во Индија кога загинале во несреќата на 12 јуни.
Нивниот погреб бил одложен за неколку недели поради ужасното откритие. Митен објасни дека посмртните останки на неговите родители први биле вратени во Обединетото Кралство.
„Кога се вратија дома, првото нешто што го направија беше КТ-скенирање. И тогаш се откри – КТ-скенот покажа дека покрај мајчините посмртни останки имало и останки од други лица“, изјави Митен за „Скај њуз“.
Ова сознание дополнително ја продлабочило тагата на семејството. Како најстар син, Митен ја презел организацијата на прошталната церемонија, а грижата околу останките на мајка му ја одложила можноста за достојно жалење.
„Мислам дека треба некој да преземе одредено ниво на одговорност. Зошто се случи ова? Каде настанала грешката во тој процес? Разбирам дека луѓето брзале, биле многу изморени. Знаете, да се соберат сите останки, па потоа да се раздвојуваат преку ДНК анализа, тоа е долг процес. Но, за нас како блиски, тоа е многу вознемирувачко“, истакна тој.
Портпаролот на индиската влада, Рандхир Џајсвал, изјави дека земјата тесно соработува со британската страна и дека надлежните власти ја спровеле идентификацијата на жртвите според утврдените протоколи.
„Сите посмртни останки беа обработени со највисок степен на професионалност и со должно почитување на достоинството на починатите“, рече тој, додавајќи дека продолжуваат да работат на решавање на сите отворени прашања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Украина: Нападнавме аеродром на Крим, штетата се мери во десетици милиони долари

Украинската безбедносна служба (СБУ) соопшти дека извршила напад врз руската воена база Саки на Крим, при што, според нивните тврдења, целосно бил уништен еден борбен авион од типот Су-30М, а биле оштетени уште четири бомбардери од типот Су-24.
Според соопштението на СБУ објавено на Телеграм, погодено било и руско складиште за авионско вооружување. Вкупната проценета штета за руската страна, според нив, изнесува десетици милиони долари.
„Успешната специјална операција на СБУ во Саки е уште еден чекор кон ослабување на способноста на непријателот да води агресивна војна против Украина. Окупаторите мора да знаат дека никогаш нема да се чувствуваат безбедно на нашата земја!“, се вели во соопштението на СБУ.
Аеродромот Саки се наоѓа во западниот дел на Крим, кој е под руска окупација од 2014 година, и често служи како база за воздушни напади врз украинска територија.
Свет
Маж на возраст од околу 40 години загина на концерт на „Оејсис“, полицијата бара сведоци

Маж на возраст од околу 40 години загина откако падна од височина за време на концерт на „Оејсис“ на лондонскиот стадион Вембли, соопшти Метрополитенската полиција, а пренесе Би-Би-Си.
Полицајци и медицински лица на стадионот Вембли реагирале на дојава за повреден маж околу 22:19 часот. Мажот бил „пронајден со повреди кои соодветствуваат на пад“ и бил прогласен за мртов на самото место, соопшти портпаролот на полицијата.
Во изјава од стадионот Вембли се наведува дека на повредениот маж му била укажана помош од страна на медицинските лица, полицијата и лондонската итна помош.
„И покрај нивните напори, посетителот на концертот за жал почина. Сочуствуваме со неговото семејство, кое е информирано и му се дава поддршка од специјално обучени полициски службеници“, се наведува во соопштението.
„Оејсис“ во својата изјава соопшти дека се „шокирани и нажалостени“ од веста за смртта на обожавателот.
Најверојатно, мажот паднал од горниот кат.
Полицијата изјави дека стадионот бил преполн и дека „веруваат оти најверојатно имало повеќе луѓе кои биле сведоци на инцидентот или свесно или несвесно го снимиле со мобилен телефон“.
Метрополитенската полиција ги замоли сите што имаат информации да се јават на бројот 101.
Бендот ја започна својата турнеја по повод повторното обединување. Саботниот концерт беше дел од седум распродадени концерти на стадионот Вембли, кој има капацитет од 90.000 луѓе на три ката.
Следните концерти на бендот ќе се одржат во Единбург на 8., 9. и 12. август, по што следува турнеја низ Ирска, Канада, САД и Мексико, пред повторно да се вратат на Вембли на 27. и 28. септември.
Свет
Двегодишно девојче најдено живо во куфер во автобус на Нов Зеланд

Двегодишно девојче е пронајдено живо во куфер што се наоѓал во багажниот простор на автобус на Нов Зеланд, пренесува „Скај њуз“. Според полицијата, детето било во прегреана состојба при пронаоѓањето, но немало видливи повреди.
Инцидентот се случил во неделата за време на застанување во местото Каивaка, околу сто километри северно од Окленд. Возачот на автобусот забележал движење во куферот откако една патничка побарала пристап до багажниот простор. Кога го отворил сомнителниот куфер, следувал шок – внатре се наоѓало девојчето.
Главниот детектив, Сајмон Харисон изјави дека девојчето било „многу загреано, но физички изгледало неповредено“. Веднаш било пренесено во болница, каде било задржано за детални прегледи.
Полицијата уапсила 27-годишна жена, чиј идентитет не е објавен, под сомнение за занемарување и злоупотреба на дете. Не е соопштено колку долго девојчето било во куферот, ниту на која делница се движел автобусот.
Жената треба да се појави пред суд во понеделник, а случајот е пријавен и до надлежните служби за заштита на деца.
Компанијата Entrada Travel Group, која управува со националната автобуска линија InterCity, потврди дека инцидентот се случил во еден од нивните автобуси. „Полицијата беше повикана да реагира и го истражува случајот. Никој не беше повреден за време на инцидентот“, се наведува во соопштението на компанијата.
За среќниот исход заслуга има возачот на автобусот, кој доби пофалби од детективот Харисон, кој истакна дека „забележал дека нешто не е во ред и веднаш презел мерки, спречувајќи многу полоша завршница“.