Свет
Москва ја демантира измислената вест за тајни разговори меѓу Салвини и рускиот вицепремиер

Рускиот вицепремиер Дмитриј Козак никогаш не се сренал со својот италијански колега Матео Салвини и немал разговори со него, а тврдењата во медиумите за таков настан се невистинити, изјави портпаролот на Козак, Илија Џус, во неделата.
Претходно во неделата, италијанскиот весник „Еспресо” објави статија во која се вели дека Салвини ја посетил Русија за „тајни преговори” за да добие финансиска поддршка за својата партија Лига. Во статијата се тврди дека Салвини се сретнал со Козак инкогнито.
„Т.н. истражувачка сторија на „Еспресо“ се базира на неосновани претпоставки, кои не му прават услуга на весникот. Козак лично никогаш лично не се запознал со Салвини, ниту официјално ниту тајно не се сретнал со него, никогаш не пиеле кафе во оваа или некоја друга канцеларија , рече Џус.
Сторијата на „Еспресо“ во петокот ја презеде „Ла стампа“, која е дел од истата издавачка куќа. Во нивната статија се тврди дека финансиската помош била формализирана како договор за продажба на гориво со рускиот нафтен гигант „Роснефт”. Средствата- околу 3 милиони евра – биле примени од Лига за финансирање на кампањата на изборите во Европскиот парламент.
Од партијата изјавија за ТАСС дека Салвини не планира да ја коментира статијата за да не троши време на демантирање на апсолутно апсурдните и неосновани шпекулации на новинарите. „Роснефт“ побара од „Ла стампа“ да објави дека статијата е неоснована.
Покрај тоа, „Роснефт” апелираше до уредникот на „Ла стампа“ веднаш да ја повлече дезинформацијата за компанијата објавена во текстот, а во случај да биде одбиена, компанијата има намера да ги брани своите права на суд.
„Ла стампа” подоцна објави соопштение од руската компанија во кое се вели дека информациите во статијата во врска со „Роснефт” се целосно невистини, лажни, и објавени со цел да ѝ се наштети на деловната репутација на компанијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Србија им препорачува на граѓаните да не патуваат во Хрватска на почетокот на август

Министерството за надворешни работи на Србија им препорача на граѓаните на Србија да се воздржат од патување во Хрватска во периодот од 1 до 10 август.
Во соопштението Министерството им советува на граѓаните што ќе бидат на територијата на Хрватска во тој период да избегнуваат собири и други јавни собири, кои може да носат ризик од инцидентни ситуации.
Во тој период – на 5 август, Хрватска ја одбележува годишнината од воено-полициската операција „Бура“. Прославата се одржува на денот кога завршила акцијата. Во Србија годишнината од „Бура“ е на 4 август, денот кога почнала, како ден на сеќавање на жртвите и протераните Срби.
Свет
Откриен можниот мотив на убиецот од Њујорк – оставил проштално писмо

Шејн Девон Тамура (27), напаѓачот кој вчера уби четири лица во деловна зграда во Њујорк, пред да си го одземе животот, оставил проштално писмо во кое тврдел дека боледува од хронична трауматска енцефалопатија (ЦTE) и побарал неговиот мозок да биде анализиран по смртта, јавува „Си-ен-ен“.
Во краткото писмо од три страници, пронајдено во неговиот џеб по пукањето, Тамура напишал: „Тери Лонг и американскиот фудбал ми ја донесоа ЦTE, поради што испив литри антифриз. Не можете да се борите против NFL – ќе ве згази.“ Тери Лонг, поранешен играч на Pittsburgh Steelers, беше дијагностициран со ЦTE и изврши самоубиство во 2005 година.
Тамура во пораката додал: „Ве молам, проучете ми го мозокот. Жал ми е. Кажете им дека ми е жал за сè.“
Според извори на „Си-ен-ен“, Тамура во младоста играл американски фудбал, што дополнително го поддржува неговото тврдење дека страдал од ЦTE – болест што најчесто се поврзува со повторувачки удари во глава кај спортисти, дури и без забележани потреси на мозокот.
Според досегашните сознанија, Тамура бил незадоволен од начинот на кој Националната лига за американски фудбал (NFL) со години го игнорира проблемот со ЦTE, кој е потврден кај бројни поранешни играчи по нивната смрт, а многумина имаат проблеми и додека се живи. Полицијата претходно објави дека Тамура имал „историја на ментални нарушувања“.
Тој влегол со пушка во зградата каде се наоѓа седиштето на NFL и почнал да пука во фоајето, а потоа и на 33. кат, пред да си го одземе животот. Еден вработен во NFL е тешко повреден, додека останатите биле навреме евакуирани.
Пријател од училишните денови, Калеб Кларк, го опишал Тамура како „најголемиот шегаџија во одделението, полн со енергија“. „Никогаш не би помислил дека би можел да биде поврзан со насилство. Луѓето му велеа дека е талентиран и посебен, но тој никогаш не кажуваше дека ќе игра во NFL,“ изјавил Кларк.
Во 2015 година, Тамура се преселил во Гранада Хилс и работел во казино во Лас Вегас, каде што поседувал дозвола за носење оружје.
Свет
Кремљ: Путин му се јави на Нетанјаху, разговараа за Сирија и за Иран

Претседателот на Русија, Владимир Путин, разговараше по телефон со израелскиот премиер Бенјамин Нетанјаху, објави прес-службата на Кремљ. Според руските власти, лидерите на двете земји разговарале за напнатата ситуација на Блискиот Исток.
„Руската страна ја потврди својата цврста позиција во корист на исклучиво мирно решавање на проблемите и конфликтите што постојат во регионот“, вели Кремљ. Путин ја нагласи важноста од поддршка на единството, суверенитетот и територијалниот интегритет на Сирија.
Рускиот претседател исто така ја изрази подготвеноста на Русија да помогне во наоѓањето преговарачки решенија поврзани со нуклеарната програма на Иран.