Познатиот британско-американски историчар Нијал Фергусон од Универзитетот „Харвард“, кој го предвиде конфликтот во Украина и Газа, открива која е следната точка на конфликтот.

Во интервју за швајцарскиот весник „Ној Цирихер цајтунг“, зборувајќи за изборот меѓу Џозеф Бајден и Доналд Трамп на јануарските избори и прашањето кој е подобар за САД и Западот, тој рече дека американските гласачи се пред тешка одлука.

Ако го изберат Бајден, би можеле да ја спасат републиката, но речиси сигурно ќе ја изгубат империјата, а влогот е речиси еднакво голем во случајот со победата на Трамп, оцени Фергусон.

„Уште еден мандат на Бајден ќе го запечати падот на Америка како суперсила. Од друга страна, ако гласачите го изберат Трамп, кој јасно стави до знаење дека го презира американскиот Устав, тие ризикуваат да се збогуваат со државата.

Од друга страна, како што вели, САД се многу стабилна демократија, која секако би можела да го преживее вториот мандат на Трамп.

На прашањето кои се трите најкатастрофални одлуки што Трамп би можел да ги донесе доколку повторно стане претседател, Фергусон на прво место го става напуштањето на НАТО.

Тој истакнува дека е сигурен оти Украина би била изгубена со Трамп во Белата куќа, што, според него, би било катастрофа.

„Можеби ова е веќе така затоа што средствата се блокирани поради противењето во Претставничкиот дом. Според мене, би било катастрофа доколку Украина ја загуби војната против Русија. Тоа би довело до сосема нова безбедносна ситуација во Европа.

Сепак, прашањето за Тајван се издвојува како најсериозен проблем на новиот мандат на Трамп. Фергусон предупредува дека Трамп можеби воопшто не се грижи за тоа.

„Ако ги читате мемоарите на (поранешен советник на Трамп) Џон Болтон, Трамп во суштина е рамнодушен кон Тајван. Така, една можност е Трамп да ѝ каже на Кина: „Можеш да му направиш на Тајван тоа што му го направи на Хонг Конг. Јас не. Ајде да зборуваме за тарифи“.

Тој исто така посочува дека и остатокот од светот мора да се подготви за сценариото за победа на Трамп. Во таа насока, посочува Фергусон, Европа мора сериозно да се занимава со стратешка автономија, на која францускиот претседател почна да инсистира пред извесно време, што е далеку од реализација – Јапонија, наведува тој, е поблиску до стратешка автономија отколку европските членки на НАТО.

„Време е земјите од Европа, големи и мали, сериозно да ја сфатат сопствената одбрана бидејќи веќе не може да претпоставуваат дека секогаш ќе има американски гарант за нивната национална безбедност. Во Индо-Пацификот, Јапонија, Јужна Кореја и другите, мора да донесат одлука дали да ја прифатат кинеската доминација и да се подготват за тоа. Тие ќе се обидат да ги убедат САД да ја задржат својата доминација во регионот. Затоа многу ќе зависи од ставот на Трамп и неговиот тим за национална безбедност“, смета Фергусон.

Кога станува збор за Блискиот Исток, Фергусон наведува дека Израел мора да се обиде да го искорени Хамас, но забележува дека Иран е најголемиот проблем. „Речиси сите лоши актери се всушност ирански полномошници. Задржувањето на Иран е многу поважно од задржувањето на Израел. Мислам дека Израел е веќе сериозно ограничен од САД“.

Како човек што ги предвидел конфликтите во Украина и Газа, на прашањето што предвидува за 2024 година, тој одговара дека, според него, Тајван е, најверојатната, следна точка на конфликт.

Кога авторот на интервјуто изјавил дека светот е во нова студена војна и дека Западот може да победи, Фергусон истакнува дека, пред сѐ, на младите западњаци треба да им се објасни како изгледа поразот.

„Младите луѓе од двете страни на Атлантикот се многу задоволни со слободата. Изгледа дека не се грижат многу за тоа. Тоа е затоа што навистина не може да замислат како би било да немаш слобода. Посакувам подобро да објасниме како би изгледал свет во кој доминира Кинеската комунистичка партија. Што ќе беше ако сите наши повици и е-пошта и секоја трансакција беа под надзор на високоидеолошки режим“.

Исто така, како што наведува, западните функционери треба да се потсетат на една од лекциите од класичната историја и на вечната вистина за моќта – една од нив се состои во познатата изрека: Ако сакаш мир, подготви се за војна.