Свет
Нападнати американски воени бази во Ирак

Со дронови и ракети вчера вечерта е нападната воздухопловната база Аин ал Асад во западен Ирак, каде што се стационирани американски и други меѓународни сили, додека во базата се слушнаа неколку експлозии, изјавија два безбедносни извори. Ирачката армија извести дека ја затворила областа околу воздухопловната база, а во меѓувреме започнала истрага за случајот. Се уште не знае дали има жртви или материјална штета.
Покрај споменатата база на западот од земјата, проектили погодиле и воена база на американски војници во близина на аеродромот во Багдад, соопшти ирачката полиција, но без дополнителни информации. Во последните 24 часа мета биле четири воени бази во Ирак, каде се стационирани американски воени сили, при што помал број војници се здобиле со полесни повреди.
Минатата недела вооружените групи поврзани со Иран се заканија дека ќе гаѓаат објекти поврзани со САД со проектили и беспилотни летала доколку Вашингтон интервенира на страната на Израел во војната против Хамас во Газа.
Во моментов има 2.500 американски војници во Ирак и уште 900 во соседна Сирија, како дел од мисијата чија цел е да им помогне на локалните сили во борбата против Исламската држава, која зазеде делови од териториите на двете земји во 2014 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Адидас: Нашите патики ќе поскапат поради царините

Како што објави Би-би-си, спортскиот гигант „Адидас“ предупреди дека царините што ги воведе американскиот претседател Доналд Трамп ќе доведат до повисоки цени за популарните модели на тениски патики на американскиот пазар.
„Бидејќи во моментов речиси ниту еден од нашите производи не произведуваме во САД, овие повисоки царини на крајот ќе предизвикаат зголемување на трошоците за сите наши производи наменети за американскиот пазар“, изјави извршниот директор на „Адидас“, Бјорн Гулден.
Компаниите во делот на текстилот и обувките се меѓу најтешко погодените од новите царини, бидејќи поголемиот дел од своето производство го имаат во земји како Кина и Виетнам, кои сега се соочуваат со значителни американски царини.
„Адидас“ не кажа за колку ќе се зголемат цените, но рече дека трговската војна „го спречила“ планираното подобрување на финансиските прогнози на компанијата. Гулден додаде дека „моментално е невозможно да се квантифицира“ точно колку ќе се зголемат трошоците поради царините или да се процени каков ефект ќе имаат тие врз побарувачката за производите на „Адидас“.
„Поради неизвесноста околу преговорите меѓу САД и различните извозници, не знаеме колку ќе бидат царините на крајот. Поради ова, не можеме да донесеме конечни одлуки за понатамошните чекори“, рече Гулден.
Виетнам стана глобален центар за производство на спортски обувки и сега се соочува со едни од највисоките американски царини. Најк, Пума и Адидас имаат големи производствени капацитети во Југоисточна Азија.
Администрацијата на Трамп тврди дека царините имаат за цел да го поттикнат враќањето на производството во САД. Но, компании како „Адидас“ предупредуваат дека на САД им недостасуваат фабрики со специјализирана опрема и работници со потребното знаење за производство на спортски обувки.
Во разговор со новинарите, Гулден откри дека „Адидас“, со цел да го ублажи ефектот од царините, го зголемил извозот на производи во САД пред нивната примена и ги пренасочил производите од Кина наменети за американскиот пазар кон други пазари.
Компанијата минатата недела објави прелиминарни финансиски резултати, според кои нејзината добивка речиси се дуплираше – на 610 милиони евра во првите три месеци од годината, што е најсилниот резултат за тој период во историјата на „Адидас“.
Модели како Samba доживеаја голема побарувачка, а продажбата се зголеми на сите пазари надвор од САД.
„Иронично, сега имаме предност што не сме толку зависни од САД како можеби некои од нашите американски конкуренти“, рече Гулден, алудирајќи на главниот конкурент Најк.
Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.
Европа
Човек на Трамп: Предлогот на Путин е апсурден

Кит Келог, специјалниот претставник на американскиот претседател Доналд Трамп за Украина и Русија, го отфрли предлогот на рускиот претседател Владимир Путин за тридневен прекин на огнот. Келог истакна дека Вашингтон бара долгорочно примирје.
Коментирајќи го напредокот на мировните преговори во последните денови, тој изрази верување дека САД „се во прилично добра позиција кога станува збор за Украинците“. „А тридневно примирје е апсурдно“, нагласи тој, осврнувајќи се на предложеното примирје од 8 до 10 мај.
Тој додаде дека Трамп се залага за сеопфатен прекин на огнот „на море, во воздух и на копно“ што ќе трае најмалку 30 дена. „И потоа можеме да го продолжиме“, изјави тој.
„Кога ќе погледнете на сè околу што Украинците се подготвени да соработуваат, сега е до Русите, до Путин. Имаме една страна, ни треба друга страна. И мислам дека сме блиску“, продолжи тој.
Путин најави уште едно примирје кое ќе започне на полноќ на 8 мај и ќе трае до полноќ на 11 мај. Италијанската премиерка Џорџа Мелони изјави дека тридневното примирје објавено од Кремљ не е доволно, туку дека е потребен праведен и траен мир.
Британската одбранбена разузнавачка агенција верува дека тридневниот прекин на огнот што го објави Путин на Денот на победата има за цел да ја прикаже Русија како отворена за преговори и да ги ограничи украинските напади со долг дострел.