Шефот на руската дипломатија Сергеј Лавров денеска изјави дека претседателите на Русија и на САД веќе покажале подготвеност за контакти.

„Што се однесува до контактите, претседателот на Русија, Владимир Путин, на прашањето дали е подготвен за контакти, одговори позитивно, а потоа претседателот на САД, Доналд Трамп, рече дека има намера да контактира со претседателот на Руската Федерација во блиска иднина, така што одговорот е одамна познат“, рече Лавров на прес-конференција по разговорот со ерменскиот министер за надворешни работи, Арарат Мирзојан, пренесе „РИА новости“.

Лавров рече дека заканите на Трамп за воведување царини за БРИКС и повлекување од голем број договори укажуваат на методите што тој ќе ги користи за промовирање на интересите на САД во светот.

Тој посочи дека политиката на Вашингтон на светската сцена не се менува во зависност од тоа кој е во Белата куќа: демократите или републиканците.

„Овој интерес е секогаш да се биде посилен од кој било конкурент“, нагласи Лавров.

Трамп претходно се закани дека ќе воведе царини од 100 отсто за земјите од БРИКС доколку не се откажат од плановите за создавање алтернативна валута на доларот. Во исто време, Путин рече дека е премногу рано да се зборува за создавање единствена валута за БРИКС. Трамп исто така потпиша наредба за повлекување на САД од Светската здравствена организација (СЗО) и од Парискиот климатски договор.

Поранешната американска потпретседателка Камала Харис, по враќањето во Калифорнија, рече дека најважно за неа е да им даде до знаење на луѓето погодени од пожарите во таа американска држава дека не се сами.

По посетата на противпожарната станица во Алтадена, Калифорнија, таа и нејзиниот сопруг Даг Емхоф поделиле бесплатни оброци во народната кујна, пренесува американски „Политико“.

„Ние сме некои од среќниците, нашиот дом е сè уште таму. Сакавме да излеземе и да ја видиме оваа извонредна заедница и само да им дадеме до знаење на луѓето дека ги гледаме и дека се згрижени“, рече Харис, чиј дом е во задолжителната зона за евакуација од пожари во Палисадес.

Харис не зборуваше за политика, туку повеќе ја истакна важноста на волонтерите.

„Моментите на криза навистина ги изнесуваат хероите меѓу нас“, рече таа пофалувајќи ги пожарникарите и волонтерите, кои ги загубија своите домови, но сè уште работат на помош на својата заедница.

Таа не зборуваше ниту за своите идни планови ниту, пак, одговори на новинарско прашање дали ќе се кандидира за гувернер на Калифорнија.

Веднаш по инаугурацијата, Харис ја ажурира својата официјална веб-страница објавувајќи нова фотографија и натпис „Канцеларија на Камала Д. Харис“.

Веб-страницата вклучува и линк до нејзината нова е-пошта, која гласи: „Контактирајте со поранешниот потпретседател“ и „Камала Д. Харис секогаш се бори за народот“.

Потпретседателката на шпанската влада, Јоланда Дијаз, денеска изјави дека ќе престане да ја користи социјалната мрежа Х, во сопственост на милијардерот Илон Маск, поради неговото однесување во понеделникот за време на настаните поврзани со инаугурацијата на новоизбраниот американски претседател, Доналд Трамп.

„Нема да бидам дел од социјална мрежа заснована на употреба на алгоритми што поттикнуваат ксенофобични идеи, се спротивставуваат на човековите права и ја охрабруваат екстремната десница во светот“, изјави Јоланда Дијаз.

Таа рече дека ја донела одлуката не само поради гестовите на Маск туку и поради она што тој го кажал, пренесува „Ројтерс“.

Маск ја крена раката на начин што привлече споредби со нацистичкиот поздрав на настан поврзан со инаугурацијата на Трамп.

Неодамна, германските министерства за надворешни работи и за одбрана објавија дека ќе престанат да ја користат мрежата Х, што веќе го направија неколку универзитети во Велика Британија и Германија.