Свет
НАСА открива кога ќе се случи крајот на светот и како ќе изгледаат последните денови на Земјата

Иако крајот на светот можеби ни изгледа далечен и апстрактен, научниците од НАСА предупредуваат дека тоа не е сосема невозможно – и дека всушност има свој пресметан датум.
Неодамна научниците изразија загриженост за можните закани што би можеле да го загрозат опстанокот на животот на Земјата потсетувајќи на предупредувањата на познатиот физичар Стивен Хокинг, издадени само две недели пред неговата смрт во 2018 година.
Тим експерти од НАСА, во соработка со истражувачите од јапонскиот Универзитет „Тохо“, користеле математички модели и суперкомпјутери за да создадат временска рамка за целосно исчезнување на животот на Земјата. Врз основа на податоците и пресметките, животот на Земјата нема да преживее повеќе од следните милијарда години поради екстремните услови, кои на крајот ќе станат неподносливи за секој облик на живот.
Главниот виновник ќе биде Сонцето. Научниците предвидуваат дека неговата зголемена топлина постепено ќе ги проголта внатрешните планети на Сончевиот систем, вклучително и нашата. Според моделите, условите за живеење ќе станат сè понеповолни за неколку милиони години, а целосно исчезнување на животот се очекува околу 1.000.002.021 година.
Како што Сонцето продолжува да се шири, температурите на Земјата експоненцијално ќе се зголемуваат, а квалитетот на воздухот драстично ќе опадне, покажуваат податоците од суперкомпјутерот. Иако крајот изгледа далечен, ние веќе ги чувствуваме последиците – сончевите блесоци и короналните масовни исфрлања веќе предизвикуваат промени во атмосферата.
Во последните години е забележана најсилната сончева бура во последните две децении, со милијарди тони честички и моќно магнетно поле. Овие бури ја нарушуваат атмосферата, влијаат на нивото на кислород и дополнително го забрзуваат глобалното затоплување.
Климатските промени и сѐ поизразените ефекти од човековата активност сериозно го загрозуваат балансот на планетата. Експертите предупредуваат дека темпото на глобалното затоплување ги надминува претходните прогнози, што може да има катастрофални последици за опстанокот на сите живи суштества.
Сепак, постојат и оптимистички сценарија. Напредокот на технологијата би можел да помогне да се создадат затворени системи со вештачки услови за живеење – капсули што ќе обезбедат вода, воздух и заштита од надворешни влијанија. Како начин за зачувување на човечкиот вид се смета и колонизацијата на други планети, првенствено Марс.
Меѓу водечките поборници на идејата за колонизација на Марс е контроверзниот милијардер Илон Маск, чија компанија „Спејс икс“ веќе развива проекти за создавање човечки населби на Црвената планета.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Белата куќа: Се надеваме на директни преговори меѓу Русија и Украина следната недела

Белта куќа изрази надеж дека Русија и Украина ќе се сретнат следната недела во Истанбул и ќе продолжат со директни преговори со цел да се постигне напредок кон завршување на војната, пренесува агенцијата „Анадолија“.
„Колку што јас разбирам, а на тоа и се надеваме, дека Русија и Украина ќе учествуваат во директни разговори и преговори следната недела во Истанбул. Веруваме дека тој состанок ќе се одржи, а тоа е состанок што претседателот го поддржа и силно го застапуваше за двете страни да се сретнат и директно да преговараат“, изјави портпаролката на Белата куќа, Каролин Левит.
Таа додаде дека американскиот претседател, Доналд Трамп, од почетокот на војната јасно ставил до знаење дека сака решение на преговарачка маса, а не на бојното поле: „Тоа им го кажа и на двајцата лидери, и јавно и приватно. Значи, се надеваме дека следната недела ќе направиме чекор напред.“
Левит додаде дека нема планови претседателот да испрати американски претставник на преговорите, но не ја исклучи таа можност.
Втората рунда директни преговори меѓу Русија и Украина е предложена за 2 јуни во Истанбул, откако двете страни се сретнаа на 16 мај. Тогаш, меѓу другото, се договорија за размена на заробеници и за подготовка на нацрт-документи за понатамошни мировни чекори.
Додека Русија најавува дека ќе го претстави нацрт-документот на преговорите, Украина бара да го добие однапред, пред самата средба.
Кремљ го оцени ставот на Украина како неконструктивен.
Свет
Драма на најпрометниот аеродром во Лондон: луѓето во паника поради сомнителен пакет

Еден од терминалите на аеродромот Хитроу беше евакуиран поради „соменителен пакет“, оставајќи илјадници патници во неизвесност.
Патниците беа евакуирани од Терминалот 3 на најпрометниот британски аеродром по дојава за сомнителен предмет во зградата.
Метрополитенската полиција претходно соопшти дека е на терен и дека се справува со ситуацијата.
Портпарол на полицијата изјави за „Д Сан“: „Станува збор за сомнителен пакет и сме на лице место, постапуваме.“
На социјалните мрежи беа објавени бројни видеа и фотографии од луѓе кои сведочат дека биле евакуирани поради безбедносната закана.
Сепак, полицијата подоцна потврди дека станувало збор за „лажна тревога“ и дека повеќе нема закана.
Возовите на „Хитроу експрес“ исто така беа погодени од вонредната состојба – операторот објави на социјалните мрежи дека има доцнења на некои од нивните услуги.
Сè уште не е потврдено дали ќе има доцнења и кај летовите поради евакуацијата.
„Попладнево, нашите тимови реагираа на потенцијално сомнителен предмет во Терминал 3. Како претпазливост, еден мал дел од терминалот беше привремено евакуиран додека надлежните органи ги извршија потребните проверки. Проблемот сега е безбедно решен. Им се извинуваме на патниците за предизвиканата непријатност.“, беше соопштено.
Свет
Турција воведе казни за патниците кои ќе станат пред да запре авионот

Турција воведе казни за патниците кои ќе станат пред да се изгаси знакот за сигурносен појас по слетувањето, соопшти турската Агенција за цивилно воздухопловство, а пренесува Би-Би-Си.
Агенцијата наведува дека паричните казни се воведени поради поплаките од патници. Новите правила стапија на сила порано овој месец.
Агенцијата предупреди дека е забележано сериозно зголемување на ваквите инциденти, при што многу поплаки се однесуваат на патници кои земаат рачен багаж од преградите над седиштата пред целосното запирање на авионот.
Десетици милиони туристи секоја година ја посетуваат Турција. Воздухопловната агенција соопшти дека комерцијалните авиокомпании сега мора да ги информираат патниците за новите правила за време на летот и да ги пријават оние кои нема да ги почитуваат. Патниците мора да бидат информирани дека не смеат да ги одврзуваат појасите, да стануваат од седиштата и да ги отвораат преградите за багаж пред да се изгаси знакот за сигурносен појас.